Truep encensc te does inserzions alangrana tla "Z-Südtiroler Sonntagszeitung" y tl "Alto Adige"
Mesa na plata dla Z-Südtiroler Sonntagszeitung, "Eine Information der Südtiroler Landesregierung: Ein selbstbewusstes Volk behauptet sich!", n chert de plata "una minoranza forte e convinta - La Giunta Provinciale informa" tl Alto Adige, enscí i titui dles does inserzions alangrana vegnudes fora en l'edema passeda. Apostadour dles inserzions: l Govern Provinzial. L contegnú: al vegn decianté les "gran arjontes" per i ladins da pert di raprejentanc dl Govern a Bulsan y a Roma y l gran empegn dla "Südtiroler Landesregierung" per chest suzes. Cosses daldut normales per autri zitadins dla provinzia, sciche stredes, strutures sanitares, scoles y e.i. vegn colorides con la tintura dl "gran empegn y contribut dl jonta provinziala". Al se trata de informazions che essa podù vegní publichedes tl sfuei aposta sun les ativités dl Govern Provinzial, ma sciche inserzions te foliec y chel 5 meisc dant les lites giáteles la saour sterscia de reclam de partí. Sceben che al ne vegn nia nominé la Svp, él cler liejan tres chi che é minés sciche i gragn "benefatours". Les inserzions é entratant bele stedes l argoment per na interogazion da pert dla aconsiadoura di Verc, Christine Kury, al Govern provinzial per enrescí cie fins, tant che chest reclam vegn a costé y ciunes che é les gaujes per chest bujegn de informazion "fora de nia" dl Govern Provinzial sun i Ladins. Ence l president dla LL, Giovanni Mischí, á tout posizion te na intervista deda encuei (21.05.03) a la "Südtiroler Tageszeitung", definin les inserzions "unlautere Werbung" o reclam lital nia ametú y paz, sce al vegn fat ofizialmenter da na istituzion provinziala sciche l Govern, apeina asconú via sciche propaganda per n partí. Sun l retrat: l assessour Mussner.
Tl curt pream per ladin dantfora a les inserzions pòn lieje: "La mendranza ladina pò demé vive y cresce tles mioures condizions, sce ala pò tó pert vigni lunesc a les sentedes dl Govern Provinzial te Sudtirol y enscí tó pert a les dezijions te vigni setour. Chest dij con convinzion i ladins enstesc. Te chesta legislatura él vegnú fat de gragn varesc inant. L'ultima mudaziun sostanziala tl Statut de autonomia á porté a chest bel resultat. N raprejentant dl grup linguistich ladin pò da sen inant vegní cherdé a fé pert dl Govern provinzial, ence sce do l proporz ne tocássel nia chest ence con na persona cherdeda da defora. Chest resultat é vegnú arjont do passa 20 agn de engajament y cruzesc dl Govern Provinzial da pert di raprejentanc de Sudtirol tl Parlament a Roma. Perchel végnel dutaorela ence rejoné de n at de giustizia. Nia demé la senta tl Govern Provinzial, ma ence la poscibelté de tó ite les enciaries plu autes tl Consei Provinzial y Regional é sté n vare de gran importanza tla direzion de na parificazion y revalutazion dla mendranza ladina" .... l test va spo inant respetivamenter per todesch y talian ... y sce la mendranza ladina vuel tó pert vigni lunesc a les sentedes dess i litadours savei cie che ai á da lité, zeruch tl vilin dla Svp, enscí en curt l tenor. La gauja per chestes inserzions é clera, la tema che l assessour Florian Mussner ne arjonje nia les za. 9.000 oujes de preferenza pro les proscimes lites da d'auton é grana. La Svp vuel ti dé na sburla sciche al toca n chest iade. Sie candidat ladin ne dess nia plu resté sun streda. La chestion é ence internamenter, vual dí tla Svp ladina enstessa, zitia: deplú funzionars Svp tla Val Badia ne á nia cis chel gran plajei y entusiasm per Mussner y valch un che ne vuel nia vegní nominé, ti dá enfinamai pueces poscibeltés. Al se trata plu che auter de n sostegn decreté da l'auta ju (da Durnwalder), sciche al é ence vegnú a lum con les "condizions" che an ti á metú dant per l sostegn tl "Verbindungsausschuss".
A pert la forma á, Giovanni Mischí, president dla LL, definí ence l contegnú dles inserzions intort y fauz: al vegn dit che i ladins é raprejentés tl Govern provinzial, ma al vegn scuté via che l post da assessour é demé na poscibelté, ma degun dert dla mendranza. La maioranza, la Svp, po l tré ite, sce al ti scusa. Enscí él suzedú con Mussner. Donca ésen ciamò dalonc da n veir dert de autoraprejentanza tl Govern Provinzial. Chestes inserzions, enscí Mischí, é n segn de na scleta coscienza. (ac)
