benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Diesc agn do la scluta dla chestion südtiroleisa dant da la ONU
scrit ai 20 May 2003 da les 15:48:57 da noeles

Politica

 

"La fin de n conflit"... ma la chestion ladina resta dutaorela daverta - Fascia à n certl lital, a Bulsan l megher resultat dla  poscibelté de cherdeda de n "assessour ladin" a plajei dla maioranza

de Giovanni Mischì

Ai 19 de jugn 1992 él vegnù deponù dant da la ONU la conclujion formala dl conflit che à despartì per 32 agn alalongia la Talia y l’Austria sun la chestion de Südtirol. En ocajion dl 10. aniversar  él vegnù fora n liber dal titul: 1992. Fin de n conflit. Diesc agn da la scluta dla chestion südtiroleisa danter la Talia y l’Austria. Chest liber é l frut de n convegn tegnì sun iniziativa dla Presidenza dl Consei provinzial da d'auton 2002 a Bulsan per recordé chest moment storich y per sotlinié sia importanza per la storia de Südtirol, ma ence per l’Europa. Sot chest aspet é l liber n strument de reflescion per cie che é suzedú y per tegnì viva la recordanza tl davegnì.

La publicazion contegn deplú contribuc che va ite sun tematiches de natura desvaliva, ence n contribut dla presidenta dla Union Generela di Ladins dles Dolomites, Hilda Pizzinini.

 



La pruma pert é dedicheda a la recostruzion dl cheder storich; al vegn cumpedé su les stazions plu importantes dla chestion südtiroleisa da l’Acordanza de Paris (1946) al papier liberatore relascé da l’Austria dl 1992. La parola ti vegn spo passeda a testemones che é enstesc stés protagonisc' dl prozes de desliament dl conflit. Tla terza pert dl liber végnel aprofondì les tematiches giuridich-istituzionales revardentes l model de Südtirol. Plu inant végnel reporté testimonianzes de raprejentanc de d’autres does autonomies speziales: la comunité germanofona dl Belge y la region autonoma dla Val d’Aosta. Tl’ultima pert dl liber végnel svilupé argomenc dret concrec y de n’atualité particolara: l sistem politich, les relazions danter politica y mass media, la scola, la cultura, la politica dl teritore, les medemes oportunités. Da auzé fora é l articul scrit da la Presidenta dla Union Generela di Ladins dles Dolomites (UGLD), Ilda Pizzinini, sot al titul: “La chestion ladina – tres ciamò daverta”, olache an po lieje do les posizions che l grup ladin à tout ite y les condizions enlaouta metudes dant per dè pro a la scluta dl conflit.

 

N valgugn pensiers fondamentai fora dla relazion tegnida da Ilda Pizzinini

 

Desche i savon él dut pié via con l’acordanza danter Gruber y Degasperi l ann 1946, olache al mancia en dut n referiment ai ladins. Les conseguenzes de chesta ignoranza s’à trat fora per i agn y an les sent enfin encuei: i ladins n’à mai ciamò arjont l reconesciment y la parité giuridica sciche i autri doi grups de nosta provinzia.

L Statut Spezial dl ann 1948 nomineia i ladins y contegn valch pueces normes de sconanza (l’ensegnament dl ladin te scola, l’ adoranza dla toponomastica, la sconanza dla cultura ladina en general).

Corp à la sconanza a ben di Ladins empermò metú man da giaté con l Statut Spezial Nuef per la Region Trentin-Südtirol (l “Pachet”) dl 1972,  che contegn deplù normes de sconanza che valoriseia l grup ladin. Entratant i agn dedò éla juda da fé n zacotan de normes d’atuazion per ti dé n contegnù plu concret:

 

  • Norma sun la proporzionala
  • Norma sun la declarazion de pertignenza al grup linguistich
  • Norma d’atuazion sun la scola
  • Norma d’ atuazion sun la sconanza culturala
  • Norma d’ atuazion sun l reconesciment dl lingaz

 

N majer profit à l grup arjont tres l’autonomia locala  tl ciamp dla promozion culturala: Istitut Ladin, Museum Ladin, Intendenza. L bon svilup dl’economia tles valedes à ence portè pro sia pert.

 

Les gaujes prinzipales per che la “chestion” romagn per l grup ladin dutaorela daverta :

 

Les ultimes normes de sconanza per l grup ladin é ruvedes adalerch tres l’ultima reforma dl Statut l ann 2001. L’empegn da pert di ladins en ocajion dles mudazions al Statut é sté gran, ma l resultat é tomé fora desvalif: depierpul che i ladins de Fascia à fat con l’arjonta de n certl lital (che met al segur l’autonomia y l’aministrazion dl comprensore ladin) n gran vare inant, n’él per i ladins da Bulsan nia sauté fora les arjontes che an s’aspetova. Chilò les plu importantes:

 

-         norma litala costituzionala (do l’ejempl de Fascia)

-         l dert de raprejentanza te Jonta Provinziala

-         la sconanza costituzionala dl lingaz ladin.

 

Efetivamenter arjont él vegnù:

 

-         l’azes a les Vizepresidenzes di Conseis (provinzial y regional)

-         la poscibelté (!) de cherdeda de n assessour ladin

-         les bones sconanzes per i ladins de Trent

 

 

Cie che al mancia dutaorela tl’aplicazion dles mesures per na bona sconanza di ladins é l empegn per na politica unitara, che fossa l majer debujegn per che nost grup posse sté y laoré plu adum.

 

La sconanza positiva de na mendranza peia via dal debujegn primar de na unité y coejion.

Les autonomies regionales à enfin encuei trascuré chest debujegn daviache al mancia l Ordinament aldò, na basa legislativa che conduj adum l grup (al mancia p.ej. la raprejentanza politica per cie che reverda la colaborazion dla scola, tla sconanza ofiziala dl lingaz, tl’autonomia locala).

 

Da 50 agn encà laora la UGLD per defene i interesc di ladins. Sun la basa dla lege nazionala per les mendranzes él da s’aspeté che al saute  ence fora valch  frut per i ladins, dal moment che chesta contegn de bones poscibeltés da porté i ladins plu adum y da consolidé sia unité.

La mendranza ladina adora na sia rapresentanza: les normes y les leges che vegnirà fates à perchel da garantì l plu autonomia poscibel. Daverta resta la chestion dl lingaz che adora:

 

-         na mioura normativa interna (lingaz con n bon livel de codificazion y standardisazion)

-         na majera reconescenza y estenjion dla ofizialité (les normes revardentes limiteia gonot sia adoranza ofiziala, dantaldut fora dles valedes. Chilò él samben da reconesce l vare ch’an à fat con l trilinguism- per l ladin dessegur n gran vare inant.

-         L’amiscion y la prejenza dl ladin ti massmedia é dutaorela debla, la stampa à debujegn de n ampliament cualitatif.

 


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 5
Oujes: 2


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: Diesc agn do la scluta dla chestion südtiroleisa dant da la ONU (ponc: 1)
da Dolasila ai 21 May 2003 da les 11:09:39
(Infos sun l utilisadour | Ti mané n messaje privat)
n bel test.
mo bela ince l'intervista da incö, 21 de mà, tla Neue Südtiroler Tageszeitung.
Da non pedere.


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.449 seconc