"Bowling a Columbine" - Les ermes da fuech ti Stac Unis

L Cineforum Val Badia mostrarà en venders, ai 23 de mei tla Ciasa J.B Runcher a Badia, da les 20, 30 l film documentar:  Bowling a Columbine / Usa 2002, regia: Michael Moore (sun l retrat), dureda 120' . "Bowling a Columbine" à davagné l pest dl Oskar sciche miour film documentar. Sciche Moore à sotrissé entratant la premiazion vuel i films documentars mostré su, documenté la realté. Moore denunzieia te sie film a na maniera ironica y dret taienta la lege americana che permet de vene ermes da fuech a vignun.  Al se damana sce i americans é tan mac do les ermes o sce i americans é  mac defin.  L  titul dl film se referesc a la tragedia suzeduda tl 1999 tla scola auta Columbine a Denver tl Colorado olache doi studenc à sclopeté a mort 12 compagns y n maester.

Tres intervistes y imajes toutes da notiziars proa l regist american de capì ciuldiche te sia tera él na gran pert dla popolazion tan mata do les ermes. L'America é l paisc che à l numer plu aut de vitimes de mort violenta y olache l numer dles ermes da fuech é plu aut de chel di litadours. L film met man con la secuenza olache l regist vuel daurì n cont te na banca tl Colorado y desche gadget giátel n sclop. Y chesta n'é nia finzion, ma la realté ti Stac Unis. 

Ulrike Frenademetz/Cineforum Val Badia