benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Consei Regional: prejentazion dla revista
scrit ai 18 May 2003 da les 09:06:54 da noeles

Cultura

 

De gran desvalivanzes danter les mendranzes - Al en é ence de cheles che é enstesses la gauja: ai ladins ti bástel les papes

 

Progrom, meltratament dla jent, de grups etnics, de populazions entieres y de mendranzes. Chest fova l titul sun l cuertl dl sfuei sozio-cultural-politich da denant. Sen án mudé l cuertl dl sfuei y la parola "Progrom" veiden apeina y a sie post végnel scrit cler "bedrohte Völker". An vuel a chesta moda sprigolé n pue de manco i letours, ma la realté dl contegnú di articui resta inant cruedia. Les situazions vegn prejentedes francamenter, en curt y con dramaticité. L lingaz adoré é enfin ciamò l todesch. L sfuei é vegnú prejenté en venders a Bulsan da trei colaboradours dl sfuei: Mateo Taibon, cefredadour y dai autri doi colaboradours: Karl Hinterwaldner y Mauro de Vieste en prejenza de n pice clap de personalités politiches, danter chestes l president regional Franz Pahl y l vize Carlo Willeit. Taibon á fat n pue la storia dl sfuei: nasciú l ann 1970 y al vegn dè fora vigni doi meisc. Al moment cumpeidel 5.000 abonés. L abonament anual costa 25 euros. La finalité dl sfuei é chela de lascé audí diretamenter les oujes dles mendranzes y no demé tres cheles dles maioranzes. I colaboradours scriv debant y vignun á sie ciamp da espert y al darà man man les infomazions nueves che roda te sie ciamp.



L sfuei é a chesta moda scrit da esperc, professours de université, jornalisc' y da autres persones competentes. An l liej saurí daviache al é linear, concret y en medias res, zenza de gran introduzions.

L colaboradour Hinterwaldner á prejenté dantfora valgugn argomenc che l sfuei tratarà: i megaproiec tla America Latina che va souradut a dann dla populazion dl post y a vantaje dles gran firmes internazionales: desboscament, dighes, coltivazion dla droga.

Mauro de Vieste á rejoné dl’ega, l 2003 é pue l’ann dl’ega. Interessant sie intervent persoura la vera y la pesc che pò depene da l’ega: les complicanzes politiches danter Turchia, Siria, Israel y Irak propi pervia dla chestion dl’ega, les relazions forzedes anter Israel y Siria per l passaje dl’ega che vegn da la Turchia. Conté dutes chestes cosses en curt ne sarà dessegur nia saurì.

Cialan n pue ju i sfueis dl 2002 veiden che Mateo Taibon, n ladin de Mareo, á scrit plu iadesc l editorial y an pò lieje valgugn de si articui sun l sistem lital te Südtirol, sun i mass- media rumanc, sun la scluta forzeda dl sfuei da vignidí spagnol "Egunkaria". Chest vuel dí che Taibon ti sta do ai problems che reverda la mendranza ladina, rumancia, catalana, basca, dutes mendranzes che viv economicamenter valgamia ben. Al podessa zenzauter lascé da na pert i ladins, i rumanc y catalans...percie che reverda i aspec negatifs, daviache per l plu é les medemes mendranzes la gauja. I ladins n’á nia sia politica, per la gran pert dla populazion ladina dess pensé i todesc o i talians a la politica, ai ladins ti bástel les papes. Paradlé i problems ladins cun chi dl’America dl Sud, dl Irak y e.i. é massa y an pò finamai ruvé ai descredité. Miec se limité a fé les critiches sun i organs de stampa locai. (jp)

 

L liam a la Lia per popui manacés, sezion Südtirol http://www.gfbv.it/


 
Liams emparentés
· Deplú sun l tema Cultura
· Chier te noeles


L articul plu liet te chest tema Cultura:
Sotescrivede l Manifest LADINIA 2005!


Valutazion dl articul
Cumpeida mesana de oujes: 5
Oujes: 1


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.397 seconc