benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Colaborazion teatrala anter Selva y La Val
scrit ai 16 May 2003 da les 13:38:48 da noeles

Cultura

 

I "7 picés mortai" - chi da Selva raprejenteia "la gola" y "la libido" y chi da La Val "la superbia" y "la varizia" - Chest y l auter fin d'edema sun palch

La Val / Selva - Les Unions de Teater de Selva y da La Val fej teater deberieda. L' idea de chesta colaborazion é nasciuda fora de na amizizia che lieia bele da n grum d' agn  chisc grups de joblers che jiva vigni iade a ti cialé a cie che i autri fajova. Enscì òven emparè a se conesce y enscì é ence nasciuda l' idea de jì adum sun palch. L' ann passé d' isté fora ova l' idea de fé teater adum metù man da giaté trac concrec. Do che al fova vegnù constaté desponibelté y bona volenté te trames les unions, vegnívela da chirì fora l toch da fé. Samben fòvel da tegnì cont dles complicazions che chest proiet comportova, sciche per ejempl chela dl lingaz, dles proes (olà pa?), dl scenar (l conduje via y ca?) y e.i.. Tolan la dezijion de fé "I picés"  de Franz Kranewitter (sun l retrat a mandreta)  él vigni union che à podú fé gran pert dles proes te sie luech, zenza messei jì o vegnì a Selva o La Val y podarà fé si toc te sie lingaz. Davia che chest teater ne ghira nia n scenar compliché, jívela da nen fé doi: un per Selva y un per La Val. Al é la poscibelté de giaté chertes dantfora.



"I picés" ("Die sieben Todsünden") de Franz Kranewitter (1860-1938) é n certl de de pici teatri che à vignun sciche tema un di set vizesc capitai o picés mortai. I set picés mortai é bele conescius da l'eté medievala inant, ma Franz Kranewitter é l prum che à abù l'idea de i lié adum te n zicl de teatri (do da el él ence sté B. Brecht y F. Mitterer che à scrit teatri soura chest tema). Tant gran che Kranewitter (che é – zenza gauja – tres resté tl'ambria dl ater autour de teatri dl Tirol de sie temp, Karl Schönherr) é veramenter, chel testimonieia la cornisc imponenta dles set tragedies te un n at soul, che al à scrit dal 1905 fin al 1925, una a la outa amesa si autri teatri ite. Do l melsuzes de sie "André Hofer" à Kranewitter endò metù man de scrive soura l mond da paur de vigni dí, ence sce l paur ne é nia plu per se enstes sun paion, ma per la natura umana. Si "picés mortai" é tres ambientés tla familia, na familia che deventa a gauja di vizesc n infern. La odleda dl poet sun la persona é pessimistica. Contra cie che un é, ne ti él nia da vive, nience con la plu bona volenté. Al é sciche n condané che se enjigna enstes l  troi a la rovina. Enscí conduj dutes les stories che Kranewitter nes conta te "Die sieben Todsünden" a na fin tragica.

Dles set stories n' à l' Union dl Teater de Selva chirì fora does che vegnirà portedes dant (per gherdeina) sot a la regia d' Emanuel Demetz. Al é l toch soura la gola che rejona de "Ujep", n el che se beiv via i scioldi, che ti fova vegnus emprestés per lascé vegnì l dotour a varì l mut puere da morì. – "Eva" se lascia porté da sia gran pascion per i ei y sia sor che à messù sciampé da la cité, olache ala se prostituiva, proa de sfruté la libido dl patron de ciasa per se fé avalei l capital. – L' Union dl Teater da La Val porta dant sot a la regia de Gottfried Rubatscher la storia dl "Giggl", che raprejenteia la superbia. L pere dl Giggl à perdù l cervel, davia ch' al ne fova nia vegnù lité sourastant, y miena d' ester Napolion. Y ence l mut dl Giggl ne se lascia pité nia. – L' ultim toch rejona dla varizia che é impersonada da "Nazio". Chest vedl ne se vaiga no da mangé, no na ciamena sciaudeda y ascon si scioldi te sie liber da les prieres. Sies parentes vegn a spicolé te armé y se strita da partì la arpejon.

 

Do "Pasciun" de Simon Kostner, raprejentè sot iniziativa dl Servisc ai Joegn d' auril, "Danterite" sot a la regia de Bernardetta Nagler, che é vegnù jobelné de jené, y " Art Ert"sot a la regia de Erika Castlunger, che é sté da vedei  ai 11 de setember dl 2002, vegniràl raprejentè tl temp de nience n ann n cuart teater a La Val, che deventa enscí, almanco per cie che reverda les raprejentazions, la "capitala dl teater" tla Val Badia. L bel pro la cossa é che i toc é tant desvalifs un dal auter che ala ne vegn mai da stufé da jì a teater. – "I picés" é da vedei tres da les 20:30 en sabeda, ai 17.05, en domenia, ai 18.05, en domenia ai 25.05 y en juebia ai 29.05.2003 a La Val tl salf Domene Moling (prenotazions:al nr. 0471 843049 o 339-1261926) y a Selva  en mercui, ai 14.05., en juebia, ai 22.05, en sabeda, ai 24.05.y en vender, ai 30.05.2003 tl salf de calonia (chertes dantfora: Bar Costabella 0471 795170).

 

 M.R. 

La Val, 05.05.2003

 


 
Liams emparentés
· Deplú sun l tema Cultura
· Chier te noeles


L articul plu liet te chest tema Cultura:
Sotescrivede l Manifest LADINIA 2005!


Valutazion dl articul
Cumpeida mesana de oujes: 3.5
Oujes: 2


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.363 seconc