„Pasciun" - n toch de teater che à dret plajù - en chest vender, 9 de mei  da les 20.00 a Bulsan tl Zenter Joenil tla Str. Vintl

Les ultimes edemes dant Pasca à n grup de joegn dla Val Badia portè dant a La Val na produzion de teater scrita da Simon Kostner da Corvara che à giatè danter l publicum n gran apriesc. A livel de contegnù passeneia l toch dret ben tla Carsema. Nia la pascion biblica ne vegn raprejenteda, ma chela de na familia che é tocheda da na ria crousc. L pere é te ospedal y al n’é nia plu speranzes che al varesce. Per Maria, la femena y i doi mutons Agnes y Albert à chest mudé la vita dret dassen. Agnes va ciamò a scola y Albert laora te na tistlaria. Tramidoi vegn trac via y ca danter si soms da teen-agers y i doveis da vigni dí. Te familia sautel fora tenjions y stric, les relazions danter oma y mutons vegn dassen a patì… Amisc y conescenc proa da dè confort y coraje. Sun la foto: les does jobleres da La Val.

Tl toch é les singoles situazions de dialogh struturades a na maniera che al vegn tres endò trat su argomenc d’atualité che dess fé pensè do: l valour dla familia y dla vita, l respet per la natura, l fistide di genitours per i mituns, l valour dl’amizizia, la solidarieté, la perduda di valours soziai y morai, la malodaranza dl alcol.

PASCIUN gnarà raprejenté en chest vender, ai 9 de mei, da les 20.00 tl salf "Centro Giovanile, str. Vintl, a Balsan. L’entreda é gratis. Duc é dret bel enviés.