Comiscion dla toponomastica zenza n ladin – deguna posizion dl assessour Mussner

Metù dantfora che l raion entier de Sudtirol à ence n origin storich-cultural ladin y che la populazion ladina à l dert statutar al respet de sia toponomastica, n’él nia giustifiché de envié via n stude y na regolamentazion giuridica dla nomenclatura geografica zenza la partezipazion direta dla componenta politica y culturala ladina.

L mandatar dla  LISTA LADINS y vizepresident dl consei provinzial Carlo Willeit à encuei contesté tl consei provinzial l fat che al é vegnù metù en pé da puech na comiscion per la toponomastica te chela che al mancia n ladin. Rodunt tla toponomastica veiden tant stersces che les raijes ladines fova a n temp tl raion dles Alpes. Scluje fora i ladins da chesta comiscion é – enscì les paroles de Willeit - na gran ofenuda per l grup ladin entier.

L aconsiadour Willeit  fej perchel da nuef la proposta de tò ite tla comiscion ence n rapresentant dla mendranza ladina, per garantì enscì che l laour dla comiscion vegne porté inant con competenza y tl respet de duc i trei grups interessés.(if)