Tl meis de mei vegniràl endò metù a jì l’ativité dl Cineforum-Val Badia

Vigni vender, da les 20.30 saràl da vedei n film tl salf dla Ciasa Runcher de Badia.  I films sun l program é duc interessanc per les tematiches y per la mira sciche ai é vegnus fac. Al n’é de vigni sort. Prum film "Magdalene", al rejona dles crudeltés che é suzedudes dant da puec agn nia dalonc da nos.

En chest vender, ai 9 de mei végnel  mostré l film Magdalene de Peter Mullan che à davagné l "Leono d’Oro" tl ultim festival dl cinema de Aunejia. Al é un de chi films che fej vegnì la pel de gialina, al va sot per la tematica cruedia che vegn raprejenteda dret bon. La storia imprescioneia souradut davia che ala é na storia suzeduda realmenter. L film rejona dl’esperienza cruedia de cater mutans joenes dla Irlanda saredes via te n istitut de penitenza ti agn 60. Ti istituc de penitenza Magdalene vegnìvel condut mutans che dant dai uedli dla familia y dla comunité à fat picé, ma en realté fovéles inozentes, enstesses vitimes dla violenza. Ales messova laoré per paié ju si "picés" y vegniva sclutes fora dal mond. Les cater atoures protagonistes adum con sies compagnes mess patì per nia, ne ti pò nia dé esprescion a sia beleza interioura. I autri films sun l program é: la comedia "Sognando Beckham", l film documentar "Bowling a Columbine", "La felicità non costa niente " y l film a dessegns animés "Spirit". (if)

Magdalene
UK 2002, regia: Peter Mullan, cast: Nora-Jane Noone, Anne-Marie Duff, Dorothy Duffy,  Phyllis McMahon, Daniel Costell, doreda: 119’
Vender, ai 9 de mei, da les 20,30 a San Linert, tl salf dla Ciasa Runcher.