La comiscion per la toponomastica zenza raprejentant ladin
Chisc dis à l govern a Roma nominé i raprejentanc talians tla Comiscion paritetica per la toponomastica metuda en pé per ti sté permez sciche organ aconsient a la Comiscion di Sis. Ai 5 de mei dess la medema comiscion nominé i membri ofizialmenter. Per cie che reverda i raprejentanc talians él vegnú fat i inoms de Carlo Alberto Mastrelli, diretour dl "Archivio per l'Alto Adige" con senta a Firenze y dl avocat da Bulsan Francesco Coran. I componenc todesc nominés da la Svp: mag. Christian Kollmann, colaboradour dl archif provinzial a Bulsan y l prof.universitar Guntram Plangg. La protesta dla Lista Ladins pro l minister La Loggia per avei ence en raprejentant ladin ne é do l mote nia vegnuda touta en consciderazion.
Les rejons per chesta esclujion ne é nia ciamò vegnudes dedes: sce al se trata de n intervent dl partì Svp a Roma o sce l minister La Loggia enstes ne à nia odù ite na rejon di ladins. Dant valgugn meisc fòvel vegnù tout su contat con valgugn esperc ladins de toponomastica, ma chisc ne à plu audì nia dedò. La comiscion resta enscì paritetica todescia-taliana. Gran marevueia ajache la toponomastica é un di puec ciamps olache l statut de autonomia ti garantesc ence ai ladins n respet. Ajache ai 5 de mei máncel, sciche encondé, deplú membri dla Comiscion di Sis podéssel ester che ence la nomina vegne sburleda, bonamenter con intenzion, davia che la tematica é dret zitia y adateda a fé cueje i anims etnics danter todesc y talians, sciche l referendum per la denominazion dla plaza dla Vitoria a Bulsan á desmostré.
