benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Durnwalder enconta Ampez
scrit ai 20 April 2003 da les 21:31:00 da noeles

Politica

 

I Ladins de Souramont à chestions davertes y problems ciauc

de Lois Trebo

Al é n segn che la cossa vegn touta su con interes, sce l sourastant dla provinzia Durnwalder va en juebia via Ampez a rejoné con l ombolt de Ampez y con la Consulta Ladina. Chesta é metuda adum da rapresentanc di trei comuns y da rapresentanc dles Unions di Ladins da Souramont che é sezions dla Union Generela di Ladins dles Dolomites. I savon che Durnwalder brancia ite vigni fer ciaut o lurent, ajache demé con l jì permez a les chestions pòn giaté soluzions. Y i Ladins de Souramont à chestions davertes y problems ciauc.



Con l ombolt ampezan vegniràl rejoné plutost de economia y turism : Ampez volessa pue mete a funzioné la ferata da la Ciadura echin a fora Toblach per lié adum Ampez con Sudtirol y con l'Austria ; chest problem dla ferata i sta ence a cuer a Bulsan ; al fossa plu sauri tegnì dalonc l stredon Alemagna che bura dut aorela fora per i ofizes de Roma y d'Aunejia.
Ampez essa na pista da bob da restruturé, a chela che Sudtirol con si atlec é ence interessé. L trafich con bus anter Ampez y Sudtirol fossa da reativé y operadours turistics arà ence da dì la sia. Con la Consulta Ladina vegniràl rejoné dles dificoltés di Ladins da Souramont per giaté l " Sender Bozen" y les trasmiscions ladines; an miena che jent ju per Belun ae fat aposta a desdruje plu iadesc les gran antenes su per mont. An rejonarà dl Istitut Ladin che é vegnù conzedù con la senta a Col de Santa Lizia y che sciche nost Istitut podarà l daidé pié l jol. L pont che ne manciarà nia sarà: i Ladins da Souramont volessa sferié fora l tort che i fascisc’ ti à fat con i despartì dant rodunt 80 agn da la provinzia de Bulsan; ai volessa endò ruvé pro Sudtirol, daviache ai é Ladins de Tirol y nia de Belun. An sà che Bulsan ne fossa nia decontra, ma che i Ladins da Souramont mess se fé inant y zerché de sensibilisé sia jent. Na lege nueva fej chesta sposteda de terms provinziai plu saurida - sce i comuns da Souramont é a una y Sudtirol n' essa nia decontra, dapò podessa i terms vegnì spostés da Valparola - Ciaulonch ju Digonera y sot Ampez ju desche ala fova al temp dl regn di imperadours dl'Austria. I savon duc che l troi ne sarà nia zenza spines, ma demé sun trogneres da spinac créscel rueses. Per i Ladins é la vijita de Durnwalder via Ampez n segn che al stima i Ladins de Souramunt, che al vuel i daidé y ti dé valch bon consei che ai ruve inant.  Daviache l assessour ladin Florin Mussner acompagneia Durnwalder speronse che les chestions davertes vegne afrontedes con la mioura intenzion per i dé na man ai Ladins da Souramont che é stés massa giut tralascés no demé da la SVP de Bulsan, ma ence dai Ladins enstesc che pensa massa demé al turism, al afarism. "Jent che ne pensa nia a sia identité y la perd se arbassa a persones de consum" à dit l rumanc Chasper Pult da puech a Bulsan. Na bona politica é chela che à per finamira  la salvanza dla popolazion con sia identité culturala.  Bulsan essa demé da davagné: Ampez é n comun scialdi rich, con n turism de cualité, con na natura da envidié, con n grum de montes y de creps conescius soura dut l mond. Cortina vegn arateda " La perla dles Dolomites". (if)


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 4.66
Oujes: 3


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: Durnwalder enconta Ampez (ponc: 1)
da giatfosch ai 20 April 2003 da les 22:50:13
(Infos sun l utilisadour | Ti mané n messaje privat)
ci oste t'aspeté da Mussner, che stlüj fora da trilinguism, concursc leterars y döt i idioms dles aters provinzies! Un che raforzeia la tripartiziun fascista ... che pena



Re: Durnwalder enconta Ampez (ponc: 1)
da travers ai 21 April 2003 da les 12:18:45
(Infos sun l utilisadour | Ti mané n messaje privat)
Sce, mo sce ala ess da gnì a se le dé che Ampez y Fodom rüva pro Südtirol spo cairess fora ince la chestion ladina atramanter. I ne crëie nia che te n te' contest l gherdëna y le valbadiot podess gnì mantignì sciöche "lingac" ladins ofiziai. Le bujëgn de n lingaz ladin unitar/standard foss evidënt y nia da podëi schivé, anfat ci y tan che i fans dl "lingaz dla oma" scraia. Che pò pa se imaginé che te n "gran"Südtirol éssen 4 lingac ladins aministratifs ofiziai (valbadiot, ghertdëna, fodom, ampezan) y implö le fascian tla provinzia vijina?
Nia cis da dî gnê ciamò aratada l'idea dla unificazion di ladins desche na utopia. Mët man chesta utopia de deventé n pü manco utopia y na opzion politica concreta? Magari fòssel da porté chësc argomënt amez la jënt, fora dles stües di partis.



Re: Durnwalder enconta Ampez (ponc: 1)
da giatfosch ai 21 April 2003 da les 13:38:52
(Infos sun l utilisadour | Ti mané n messaje privat)
sambegn, Mussner mess fà vijites; Willeit indere conesc bele bun la Ladinia intiera, él pö sté president ince dla Union Generela!
Plü dadî i gnôl dé inoms ai resc ... l ladin nia lité mo incoroné da Durni (roba da medioevo dunque) podess avei l'inom Florian der Ahnungslose




Re: Durnwalder enconta Ampez (ponc: 1)
da tomescbornert ai 22 April 2003 da les 09:59:35
(Infos sun l utilisadour | Ti mané n messaje privat)
A Mussner él da ti audé n pü plü coraje y manco condizionament da pert dla svp da Urtijei. Iö ne capesci nia daldöt süa politica: un n dé stlüjel fora chi da Suramunt da n concurs leterar ladin, l'ater dé val cun Durni a ti fà na vijita - naivité o fariseism? Un di dui él dessigü!!



Re: Durnwalder enconta Ampez (ponc: 1)
da Dolasila ai 22 April 2003 da les 16:59:23
(Infos sun l utilisadour | Ti mané n messaje privat)
fariseism, mo ince cativeria, y tröpa!
sc'an sa sciöche al prô da desfà i media che criticheia söes dezijiuns antiladines, sciöche al cherda sö por porvé da censöré damperfora, él tler: tröa intoleranza y cativeria!

Mussner go home



News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.493 seconc