benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Di dla cultura ladina ai 11 de auril a Bulsan
scrit ai 12 April 2003 da les 13:38:37 da noeles

Cultura

 

Chasper Pult: con l RG deventa dut plu scempl - Durnwalder y Hosp: mete ite l lingaz ladin deplù te scola, tegnan cont dla modernisazion y dla atualité

Dut l personal che laora pro la cultura ladina a mete man dal assessorat y si  impleés, da la Intendenza con si diretours y ramificazions, ence chi bele en pension, dai istituc: cultural, sezion badiota y gherdeina, y pedagogich, dal personal dl museum de Tor, dai diretours dles scoles ladines fora per les valedes, dal personal dla Rai ladina a Bulsan, dal personal che laora pro valch foliet: Usc di Ladins, Tras, y samben dai oms che fej pert dl aparat partitich, dutes chestes persones é vegnudes cherdedes ite dal assessour Florian Mussner a Bulsan per fé n pue l pont sun l svilup dl laour y per audì valch proposta per mioré.



Al à metù man l president dla Jonta provinziala, Luis Durnwalder, dijan atira che vigni grup linguistich chilò te Sudtirol à la poscibelté y la liberté de se svilupé. I ladins, la comunité plu vedla y plu picera de Sudtirol, é juda plulere endò pro la ultima cumpeida dla jent. L proporz i dà na man. L sistem paritetich tla scola é dessegur ideal, ma i ladins mess  ence "einbauen" (mete ite) sie lingaz tla scola a vigni livel y tegnì cont de sia modernisazion y atualité. La parola "Ladin dolomitan" ne àn nia audì, ma sie conzet podòven zenzauter odei ite anter les righes. Durnwalder à spo recordé valgugn pilastri fac da la Provinzia per daidé la comunité ladina: L Istitut cultural, l Istitut pedagogich, l museum ladin y la "enjonta per pendolars", l aiut finanziar ai ladins che laora fora dles valedes, ma che abiteia tles valedes. Al á ence recordé l aiut a l'informazion: La Usc di ladins, la TV. Al s'à  y se proa pro vigni gremium a na moda che tla Conzescion nueva dl Govern da Roma i ladins giate plu lerch. Dessegur giata duc i trei grups chilò de Sudtirol l sostegn da la Provinzia, souradut l grup plu debl, ma i ladins mess tò pert n pue deplù a la vita politica y vegnì souradut con propostes concretes de miorament. 
L assessour a la cultura todescia, Bruno Hosp, à recordé n pue dantfora l tema zentral dl Di en chestion: L raport anter Cultura, Natura y Turism. N tema -àl dit- che é bele da 10 agn encà argoment de discuscion. Ala se trata de n "Spannungsfeld", vuel dì de n ciamp de tension. La jent chier n "spiritueller Genuß", n godiment spiritual. Te chest vers pò daidé do l lingaz, che mess cresce zenza ruvé a fondamentalisms. Ence Hosp ne rejona nia de Ladin dolomitan, ma de alesiré l lingaz.
     L assessour a la cultura taliana, Luigi Cigolla, à recordé en curt da olà che al vegn, dai creps de Fascia y ch'al é spo resté a Bulsan. L soul  reladour che à recordé che ladins é ence chi da Souramont y i Fascians. Ence chisc -àl dit - dess ruvé sot Bulsan per formé la comunité de duc i ladins.
     L assessour Florian Mussner à rejoné dla "Valorisazion de nosta cultura y de nosc ncësa" recordan che an dess naouta tegní cont dles ressurses economiches de nost teritore y no demé de cheles ideologiches. Les raijes de nostes liendes é tla natura, tles montes, tla ontologia de nost teritore. L turism enfin a sen ne n'à nia mudé nostes carateristiches. I on abù persones che à sapù  da vedei dantfora l svilup dl turism tres na promozion graduala. Ala se trata de mantegní l ecuiliber anter natura y cultura. La mont se damana respet. La concurenza é grana y l svilup se damana profescionalité. I messon valorisé dut cie ch'é original: l mangé, l'artejanat, l patrimone dles liendes, nia manipolisé les tradizions, svilupé les archirides archeologiches (l ciastel de Gherdeina, i mulins da Lungiarü), mete en lum i luesc che dess vegnì daidés inant da la Provinzia, anuzé l parch natural de Al Plan, l museum ladin. Duc i fatours poscibli dess vegnì valorisés y poscibelmenter da nos enstesc y con l'aiut dles aministrazions di comuns.
     L diretour general dl Touring Club talian, dot. Guido Venturini, á tratè l tema: "Valorizzazione del patrimonio locale per lo sviluppo integrato del territorio", en curt "Turismo culturale ed economico". Do avei recordè l'emportanza dl turism a livel nazional desche fontana de scioldi, àl porté dant n valgugn ejempli de coche al dess vegnì fat per promueve l turism. La jent roda per n fin: per curiosité, per arichiment cultural, per fé sport, per conesce les carateristiches di posc', per paussé, per conesce de autra jent, sies tradizions, sia organisazion y e.i. Al à recordé l caje de Ferrara, zité dles gran manifestazions d'ert, l caje d'Este con sie artejant, la Toscana che à svilupé n turism particolar. Pretene massa pò garaté n pericul, al pò ruviné valgugn raporc tla ciadeina dl turism: mudé i priesc, desdruje l'artejanat. "Il vero primato sarebbe un museo diffuso" svilupan dlonch l'ert per crié curiosité.
     L romanist grijon, dot. Chasper Pult, á svilupé l tema: Die schönsten Berge der Welt - Gedanken zur kutlturellen Identität".  Al à mostré su la identité ladina tres cater imajes: L om vedl, l om joen, la mort y l lingaz. Les montes carateriseia nost teritore: "Die Menschen vergehen, di Berge bleiben". L'identité dles montes nes porta te nos enstesc. L liber de Karl Wolf persoura nostes liendes, é l simbol de nosta identité tles montes. Al à mostré l liber "Ladinia" de Roland Verra liejan fora n toch olache al vegn rejoné de contradizions anter les beles montes entourn Ampez via y la scicaria taliana de feries te Ampez. "Der alte Mann Ladiniens" é les montes. l'identité ladina di joegn la veiden tla leteratura (Rut Bernardi), tles operes nueves ("Cognoms ladins" de Paul Videsott), di scritours joegn de Gherdeina, tl guant di joegn (la cravata plena de vedles ciases lassoura), duc ejempli de identité. I vedli ladins moriva scialdi te sia ciasa, sen muer la jent scialdi demé plu te ospedal, tles ciases de paussa. Tla Lumnezia, na val ti Grijons, àn crié na stua per i morc, olache an pò rejoné y fumé, sciche al vegniva fat dandavia te stua dant l mort. Ence chest n segn che an vuel mantegnì la vedla identité. Da ultim l lingaz, nosta identité primara. Do 20 agn s'à l "rumantsch grischun", RG, consolidé. Dut deventa plu scempl: la publizité, la comunicazion y l'emportanza dla comunanza grijona. L plurilinguism nes tol nia la identité, ma al é enrichiment che ne dess mai jí a dann de nost lingaz. Con André Peer ves envieii a clamé pan l pan, sanch l sanch "um uns besser einander zu verstehen", per nes entene miec.
     Hugo Valentin: Sce an pensa do sciche ala jiva pro dant da 40 agn, spo messonse reconesce che al é vegnù fat truep. Al bastassa conscidré les biblioteches. Al é miec ti cialé a les pertes positives che demé coiené y souradut laoré deberieda. (uc)


 
Liams emparentés
· Deplú sun l tema Cultura
· Chier te noeles


L articul plu liet te chest tema Cultura:
Sotescrivede l Manifest LADINIA 2005!


Valutazion dl articul
Cumpeida mesana de oujes: 0
Oujes: 0

Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: Di dla cultura ladina ai 11 de auril a Bulsan (ponc: 1)
da giatfosch ai 12 April 2003 da les 15:49:09
(Infos sun l utilisadour | Ti mané n messaje privat)
l'alianza dai farisei. Fa deberiedam, dij Valentin, mo so partì à fat 50 agn de politica de esclujiun de vigni idea nia conforma ales strentöres ideologiches y mentales de so partì. Valentin dess spo ince cunté ci che n'é nia gnü fat, ci che é gnü impedì da so partì. La lista é plü lungia de ci che é gnü fat.

I "referac" da inier mostra ch'al é sté na manifestaziun de propaganda litala. Valentin se damana che düc deides para a fà propaganda impede pensé cun so cé ... ma va!







Re: Di dla cultura ladina ai 11 de auril a Bulsan (ponc: 1)
da travers ai 12 April 2003 da les 19:22:45
(Infos sun l utilisadour | Ti mané n messaje privat)
Iö ne à nia podü tò pert al Dì de cultura mo lijan le ressumé pél che les maius banalitès sides gnüdes dites dal preisdënt dl Istitut de cultura MdR. Dì che te 40 agn él gnü fat tröp ne ò dì nia. Al se trata de ci che é gnü fat; al é ince gnü fat tröp de mal y les conseguenzes ne pòn nia ascogne ia.
I raprejentanc dl istitut MdR fej vigni tan le bilanz de sües ativités mostran sö na lista lungia de cosses fates, mo iö n'à ciamò mai odü na analisa che nes dij ci contribut che MdR à dé per garantì le suravire di ladins sciöche comunité unitara. Por ejëmpl na strategia politica-culturala por arjunje la unificaziun linguistica di ladins. Nia cis dadî à le istitut MdR dè jö n arat cuntra la ladin standard, che è odü de vigni soziolinguist sciöche la conditio sine qua non por le suravire de n mini grup desche chël ladin. Laoré deboriada te n contest olache an fej düt le poscibl por destaché i ladins da dlaite da chi de dlafora (ciara ince Dì dla cultura) é na tuta por l cü, signur presidënt dl istitut cultural.



Re: Di dla cultura ladina ai 11 de auril a Bulsan (ponc: 1)
da giatfosch ai 12 April 2003 da les 19:31:23
(Infos sun l utilisadour | Ti mané n messaje privat)
co dess ince n espert de ciavai savei da dì valch da schiché sön la cultura ladina ... ?



Re: Di dla cultura ladina ai 11 de auril a Bulsan (ponc: 1)
da Dolasila ai 12 April 2003 da les 23:01:39
(Infos sun l utilisadour | Ti mané n messaje privat)
la "politica culturala" de Mussner che emargineia düc chi che fej cultura ... al se limiteia a aziuns che po gnì sfrütades por les lites.



Re: Di dla cultura ladina ai 11 de auril a Bulsan (ponc: 1)
da Janpire ai 13 April 2003 da les 19:37:48
(Infos sun l utilisadour | Ti mané n messaje privat)
Al é gnü fat tröp te chisc ultims 40 agn .... sce, messon di, cundöt che al é Valentin a cé dl Istitut Ladin MdR, döes otes al bele orü bloché l LS



Re: Di dla cultura ladina ai 11 de auril a Bulsan (ponc: 1)
da Dolasila ai 13 April 2003 da les 20:03:06
(Infos sun l utilisadour | Ti mané n messaje privat)
propi insciö, cundöt y nia ajache ... deplü ciamó ci che n'é nia gnü fat. Moserun mo ci che é gnü fat pur i ladins cun ci che é gnü fat pur i todesc.



Re: Di dla cultura ladina ai 11 de auril a Bulsan (ponc: 1)
da Janpire ai 13 April 2003 da les 21:44:03
(Infos sun l utilisadour | Ti mané n messaje privat)
Che certa jent se infida ma ciamo de baie de laure deberieda canche ai a fat dles dötes por tignì fora le raprejentant lité .... na manifestaziun por propaganda a Mussner nia deplü, cun döta la nomenclatöra ....



Re: Di dla cultura ladina ai 11 de auril a Bulsan (ponc: 1)
da Dolasila ai 13 April 2003 da les 21:52:01
(Infos sun l utilisadour | Ti mané n messaje privat)
cosses che ne sozed nia plü tles democrazies. N esponent nia lité che emargineia n esponent lité.
n golpe morjel.






Re: Di dla cultura ladina ai 11 de auril a Bulsan (ponc: 1)
da giatfosch ai 13 April 2003 da les 23:22:34
(Infos sun l utilisadour | Ti mané n messaje privat)
Mussner y söa secretera particulara n'emargineia nia mâ Willeit, mo ince düc chi che à fat cultura ladina cina segn. Ci sort de "cutura ladina" ôi spo meter impè? Na gran meseria, y les ciacoles y banalitês che Mussner fej instes o aposteia pa colegs de partì sciöche Valentin, n'é nia bones da ascogne l gran öt. Ingnó vijiuns, ingnó competenza (degügn ne me dijarà che Mussner o Valentin ais competenzes culturales), ingnó sostegn ala derta cultura ladina, chera nia folcloristica.

Tan bi che i temps de Hosp fô.



News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.376 seconc