benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Liber de Franz Vittur: Padre Ilarione
scrit ai 08 April 2003 da les 20:56:41 da noeles

Cultura

 

La storia de vita de Padre Ilarione, nasciù a Badia tl 1853 - de Franz Vittur

A la fin dl XIXejim secul y tl meteman dl XXejim secul él sté deplù miscionars ladins che se à fat conesce tl mond. L plu famous é samben sté Siour Ojöp da Oies che à vit tla Cina. Pater Pasquale Crazzolara (1884-19769) da San Ciascian é ju tles miscions tl’Africa. Al é deventé conesciù ence foradecà sciche gran etnologh y linguist. N auter miscionar fova Pater Ilarione Valentin (nasciù Gianbattista Valentin) che é sté per passa vint agn tl’India y per 2 agn tl’Arabia Saudita. Y propi de chest miscionar ladin él vegnù fora sen la storia  de sia vita, plu avisa l liber "P. Ilarione Valentin missionario" a cura de Dr.  Franz Vittur, dè fora dal Istitut Ladin "Micurà de Rü".



Dr. Franz Vittur à fat la trascrizion dl manoscrit autobiografich dl miscionar. Sciche el scriv tla nota àl lascé fora les pertes plu privates y personales, d’autres é vegnudes adatedes per che ales sie plu saurides da lieje per l letour aldidancuei, ma al à empò cialé da se tegnì tant che ala jova al test original. Al é la storia de vita de Padre Ilarione, nasciù a Badia tl 1853. L miscionar l’à scrita puech denant che morì per ti lascè na testemonianza de sia vita singulara a si parenc y compagns.

Al conta anter l'auter de sciche al à sintì bele da pice la vocazion de deventè preve, de si agn de stude a Persenon, dla mort crudia de n valgugn de si familiars, de sies ativités enchina al 1886. Chest fova un di agn de plu emportanza de sia vita davia che en chest ann él pié via tles miscions tl’India, con destinazion Allahabad. Chilò àl laoré con gran lezitenza, al ti stova dlongia ai pueresc, ti ensignova la Parola de Die. Al à traslatè tl indostan y te d’autri lingac dla zona la Santa Scritura, tesc’ per l’ensegnament dla religion y libri de devozion popolara. Dal 1911 él sté per doi agn miscionar a Aden, tl’Arabia. Tl 1913 él vegnù zeruch definitivamenter te Sudtirol olache al é ju ti convenc a Eppan, Egna y Persenon. Al é mort a Persenon tl 1936. L contè de Padre Ilarione é plen de osservazions sotes. Al conta gen de se enstes y ilò adòrel gonot la terza persona. Al descriv te na maniera plajoula momenc fora dla vita de sie paisc nadel y de sia vita, de sies aventures. L liber nes mostra su la vita interessanta de n miscionar y é n document storich de emportanza de chi agn. L liber giàten da comprè tl Istitut Ladin a San Martin y tles biblioteches dla valeda.(if)

 
Liams emparentés
· Deplú sun l tema Cultura
· Chier te noeles


L articul plu liet te chest tema Cultura:
Sotescrivede l Manifest LADINIA 2005!


Valutazion dl articul
Cumpeida mesana de oujes: 5
Oujes: 1


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.393 seconc