L proporz mess vegnì comedé per arjonje la parité anter i grups linguistics - I ladins tira a la curta

Entratant la discuscion soura l proporz da encuei tl consei provinzial (02.04.03) él vegnù a lum pueces novités. Ma dantaldut àn abù mancia na analisa prezisa di aspec politics dl proporz y de sies conseguenzes sun i grups linguistics singui y sun la convivenza anter ei, chesta la minonga dla LL. Carlo Willeit à laudé la funzion dl proporz desche garanzia per duc trei i grups linguistics, ma al à sotrissé che i ladins à dagnora trat a la curta tla gestion dl proporz da un n vers per gauja di numeri y dal auter per l tratament politich y giuridich a sie desvantaje. Sun la foto: Carlo Willeit se damana n proporz plu flessibl per i ladins che é dutaorela scluc fora pro certes enciaries.

Aldò dl proporz ne vegn i ladins dutaorela nia lascés permez pro trueps posc’ publics, enscì al tribunal aministratif, a les comiscions per l’aministrazion dl personal, a cotant de posc’ tles aziendes sanitares y a feter degun comun fora dles valedes ladines. Perchel adora i ladins na gestion dl proporz plu flessibla y ence garanzies giuridiches plu stersces. Enultima à Willeit critiché dassen che les declarazions de pertignenza al grup linguistich ne vegn nia publichedes, dijan che ti tegnì chisc dac secrec ai zitadins, a les persones diretamenter interessedes, é antidemocratich.