benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Congres de Urtijei sun l language planning
scrit ai 15 November 2002 da les 07:43:33 da noeles

Ladin Standard

 

Planificazion, prestije, corpus linguistich: les trei paroles clef

L Congres vegnirà tegnù a Urtijei dai 12 ai 14 de dezember 2002

"L interes per i lingac y les cultures dles mendranzes é chersciù  y chest se respidleia ence tles ativités culturales y legislatives dl’Union Europeica y de trueps autri stac-comembri"(cfr. formular de envit al congres). Te chest contest végnel organisé dai 12 ai 14 de dezember a Urtijei na conferenza internazionala sun l tema "Corpus planning y soziolinguistica".

 



Con chesta manifestazion scientifica végnel sclut ju l projet "TermLes" (Standardisazion lessicala y terminologia per i lingac ladin y sard), na azion sostegnuda y co-finanzieda da l’UE y da les majeres organisazions culturales ladines, les medemes che sostegn SPELL: l’Union Generela di Ladins, l Istitut cultural ladin "Majon di fascegn", l Istitut cultural "Micurà de Rü" y l Istitut Pedagogich Ladin. L projet "TermLes" à doi obietifs paralei, un local, l auter europeich: (a) la promozion y l svilup dl ladin y dl sard tres la standardisazion linguistica y la creazion de terminologia moderna; (b) l barat de conescenzes y esperienzes (scientifiches, metodologiches y organisatives) anter i lingac de mendranza. L congres de Urtijei se tol dant avisa chest: baraté fora esperienzes tl ciamp dla planificazion linguistica, olà che i ladins à truep da emparé ma ence cotant da ti mostré a les autres mendranzes linguistiches tl’Europa.

De cie se tràtel pa plu avisa? Pian via da na analisa dles ultimes ativités dl corpus planning y dla enrescida soziolinguistica se conzentrarà l congres sun chisc trei temesc prinzipai: corpus planning, soziolinguistica dla planificazion linguistica y status planning. I referac de daurida rejonarà de soziolinguistica sciche pont anter corpus planning y status planning dl lingaz. Ti referac che vegn do vegniràl prejenté projec de standardisazion y de enrescida soziolinguistica y terminologica per i lingac de mendranza.

Tla pruma pert dl congres, dedicheda al corpus planning, ti vegniràl dé lerch a la terminologia y a la lessicografia sciche strumenc de revitalisazion di lingac minoritars tla sozieté moderna. Pro l corpus planning audel anter l’auter l’elaborazion de ressurses linguistiches (gramatiches, dizionars, recoiudes de tesc’, y e.i.) y la creazion de massaries (informatiches) per podei laoré fora y adoré chestes ressources tla pratica. Tla seconda pert vegniràl rejoné dla enrescida sozionlinguistica sciche fondamenta per la planificazion di lingac, y en particolar dla relazion anter standardisazion y variazion soziolinguistica y dl contat anter lingac. La terza pert preveid n valgugn referac y na meisa torona sun l status planning de trueps lingac de mendranza tl’Europa. Con status planning mìnen l renforzament sozial y giuridich de na rejoneda minoritara tres azions politiches y mesures pratiches che deide pro l’adoranza dl lingaz a vigni livel dla comunicazion privata y publica.

Dlongia i referac vegniràl tegnì n per de workshops olà che al vegnirà (des)mostré i resultac de n valgugn project de standardisazion y dantaldut de SPELL. Te chest cheder ti vegniràl ence prejenté al publich l Dizionar dl ladin stardard y l codejel informatif Ladin standard. N lingaz scrit unitar per i ladins dles Dolomites, tramidoi dés fora da les organisazions che sostegn SPELL.

L congres abina adum n gran numer de studiés y esperc de livel internazional y la paleta de rejonedes y de tematiches tratedes é valgamia lergia. I lingac de mendranza raprejentés sarà en pruma de dut l ladin, l rumantsch y l furlan, dapò l sard, l cors, l catalan, l walser tl Piemont y tla Val d’Aosta, l croat dl Molise, l finlandeis tla Svezia, i lingac minoritars y la situazion linguistica tla Moldavia, tl Scotland y tla Ruscia. Donca, na ocajion nia da arjumé per duc chi che se cruzia de lingac de mendranza y dantaldut per i ladins. Informazions plu menudes sun l congres pòn giaté pro la senta de SPELL a Urtijei: tel. 0471/796020, e-mail : spell-secr@ladinia.net.



 

Erwin Valentini


 
Liams emparentés
· Deplú sun l tema Ladin Standard
· Chier te noeles


L articul plu liet te chest tema Ladin Standard:
Dal latin al ladin: storia dla evoluzion dl lingaz ladin


Valutazion dl articul
Cumpeida mesana de oujes: 4.57
Oujes: 7


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Les mius aodanzes (ponc: 1)
da Janpire ai 23 November 2002 da les 17:21:23
(Infos sun l utilisadour | Ti mané n messaje privat)
Les mius aodanzes por en garatè dl proiet SPELL y che al pëies raisc y florësces sciöche al è sozedü ti Grijuns.


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.375 seconc