"Valgugn mess fé l prum vare", l standard Rumantsch vegn ensegné d'engré via tles scoles
Do l distret scolastich dla Sutselva a Andeer, à sen ence la direzion dles scoles dla Val Müstair, la valeda rumancia outa devers la Val Venuest (Südtirol) tout la dezijion de introduje l Rumantsch Grischun (RG), confrontabel con l ladin standard (LS), sciche materia de ensegnament tles scoles. Mario Gross, l president dla CRVM (Corporazion Regionala Val Müstair): "Duc i maestri y i capicomuns fova dla minonga che sce nos volon mantegní l rumanc, spo vala demé con l RG, aja che demé con n lingaz scrit unitar pòn comuniché saurí da la Val Müstair enfin tla Surselva; 5 idioms scric endeblesc a la fin duc".
N argoment contra l'introduzion dl RG te scola fova la tema che l idiom dla Val Müstair jissa a perde. De chesta minonga ne é degugn aldò de Grossi: "l jauer (enscí végnel clamé l idiom dla Val Müstair) vegnirà empò rejoné inant". La comunité de valeda dla Val Müstair à enscí dé lum verda al projet proponù da la Lia Rumantscha "Rumantsch Grischun en scola".
