Florian Mussner sciche candidat sun la lista Svp, ma deguna creta incondizioneda
Dantenier vender (28.03) él vegnù tout la dezijion ofiziala: Florian Mussner, atual assessour, sarà l candidat ladin sun la lista dla Svp. Enscí l'à encundé l vize-obmann Svp Pepi Dejaco en gaujion dla enduneda dl partí a Picolin. Scí a Florian Mussner con does declarazions limitatives enjontedes: sostegn a Mussner, ma chest dess valei demé 4 agn enfin a les lites dl 2008 olache al dess endò tré dant n candidat dla Val Badia y con la limitazion che n eventual assessour cherdé da foradecà do les lites da eniann dess ester un dla Svp dla Val Badia. Mussner enstes à dit a la televijion ladina de ester content dl sostegn y che al crei de avei fat n bon laour te chisc ultims 15 meisc da assessour.
La limitazion de Mussner ai proscims 4 agn, sce al vegn lité, a desmostrazion che les relazions danter Svp Val Badia y Svp de Gherdeina ne é nia les mioures: al é da recordé che i ultims doi candidac Svp de Gherdeina, Malsiner Wolfgang (dl 1993) y Stuflesser Werner (dl 1998) ne fova nia resultés lités, davia che ai ne ova nia arjont n numer assé de oujes de preferenza. A na pert dla Svp dla Val Badia ne ti ova nience plajù la lita de Mussner a assessour vegnuda fata da surajù da Bulsan enfora.
