“Medejina genetica - vijion y prospetiva”
L’archirida genetica tol ite na posizion fodamentala tla assistenza sanitara y tla prevezion de truepes malaties. Ala é ence n investiment per l davegnì de dutes les scienzes che é te n raport tres plu strent con la medejina genetica. Chest sarà l tema dla enconteda organiseda da l’Academia europeica de Bulsan (EURAC) per i studenc dles scoles autes de Bulsan dal titul: "Medejina genetica - vijion y prospetiva”. L convegn vegnirà metù a jì ai 2 de auril tl auditorium dl lizeo “Salesians- Rainerum” con reladours renomés tl ciamp dl’archirida genetica internazionala sciche: Victor McKusick, professour de medejina genetica al "John Hopkins Hospital" de Baltimore, conscidré l “pere” dla medejina genetica moderna, Giovanni Romeo, dozent a la université de Bologna y Peter Pramstaller, neurologh y responsabel dl projet GenNova metù man dl 2002 pro l’EURAC.
Chisc esperc se baratarà ju te na debata daverta con i studenc. L travert dl’iniziativa porteda inant da Peter Pramstaller é chel de fé conesce miec al publich dles scoles na materia dret complicheda, ma tl medem temp ence dret demarevueia. La medejina genetica vegn te trueps caji ciamò touta su con na certa desfidenza da la jent. Enultima vuelen fé conesce valgunes novités dal mond dla genetica. (if)
