LADINS a Moroder: 1000 euro al meis ai plu pueresc
Aladò dla frazion di Ladins tl comun de Urtijei davagna l ombolt demassa, al dess dé ju 1.000 euro al meis al plu pueresc
Tla ultima senteda dl comun de Urtijei él anter l auter vegnù trat ca l paiament dl ombolt Ewald
Moroder. L paiament dl ombolt é n dat publich ajache l zitadin à l dert de savei tant che l ombolt
ciafa per podei giudiché sie operat. L giudize sarà desfarent sce al ciafa 500 Euro al meis plutost
che 4.400 netto. Ewald Moroder, ombolt de Urtijei
"Cie che é sté bendebot enteressant é stedes les vertoles y l tentatif da pert de ombolt y dla maioranza (Svp) de ascone via la soma", dij la frazion Ladins tl comun, ratan che chest pò demé vegnì splighé con la tema che l paiament side massa aut per l laour che al fej. Zenza jì ite te
polemiches de bas livel vuel la frazion Ladins lascé giudiché l zitadin ti fajan la proposta al ombolt de Urtiei de dé ju 1.000 euro dl paiament mensil con efet retroatif, da mete man dla legislatura, sun n cont a inom dl comun che vegnirà utilisé per daidé les persones y families en dificolté o che ruvarà te dificoltés. Per cie che reverda la proscima legislatura met Ladins Dolomites bele dantfora la reduzion dl paiament dl ombolt y dla jonta de almanco l 20%.
An é segurs che l ombolt fajarà publiché chisc dac te comun a na moda che vigni zitadin posse i vedei.
L paiament dl ombolt Ewald Moroder per l 2008 fova:
dal comun de Urtijei 58.761 euro
da la comunité raionala de Salten-Scilier 9.858 euro
dal zenter de sconanza dl ambient 9.622 euro
Endut 81.169 euro
- retegnudes IRPEF 28.320 euro
Netto 52.849 euro;
n paiament che fej fora entourn a 4.400 euro al meis.
