benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Ladins Dolomites: mai ne saronse a una con n daz sun i joufs
scrit ai 01 August 2009 da les 13:15:16 da noeles

Politica

Ladins Dolomites: n daz sun i joufs, MAI

Albert Pizzinini de Ladins Dolomites: "N daz sun i joufs? Ne fòssel nia denant da agaié les retribuzions de Luis Durnwalder che davagna deplù che Barack Obama, president di Stac Unis?"

La chestion dl daz sun i joufs se merita ciamò valch consciderazion plu sota. An mess conscidré che les stredes sun i joufs de Frera y Sela é stredes de coliament anter les valedes ladines y vegnì a vene l'idea che l daz, ence sce al ne uega nia per smendrì l trafich, side n strument per finanzié les infrastrutures che an adora é l colm. A la medema moda messéssen spo paié da se mueve sun vigni streda de Sudtirol. Ma per chest él pu les coutes sun l auto y sun l benzin, o ne ti basta chest nia a la provinzia? Albert Pizzinini, president de Ladins Dolomites
 



La provinzia de Bulsan à l muet da jì a compré ju casermes al stat y ti fé su cuartiers ai saudés, enscì ti vegniràl dé da laoré a valch impreisa lieda a la politica (ne nes ensegna pa nia l caje Lady Egartner a Bulsan?). En plu, sce la provinzia ne é nience bona da gestì les truepes coutes che ala scod per realisé les infrastrutes che và debujegn él ence da se fé valch pensier. La provinzia pò mantegnì les Termes da Maran y paié sia aministradura plu che 100.000 Euro per scluje ju vigni ann i conc a cuecen. Les Termes é na impreisa juda falindon con cosc' ciariés su sun les sciables di zitadins. I ne rejonon nia spo dl "Fahrsicherheitszentrum" (raion da furné segurs) a Pfatten olàche an mess prié la jent sun i jenedli per che ala vae y che vegn aministré da n bon compagn de n nost assessour. O ence dl aeroport a Bulsan che, sciche al vegn anuzé atualmenter, ti uega demé ai parlamentars per jolé ju a Roma!
La Provinzia de Bulsan ne dess nience se permete de rejoné de n daz sun i joufs, ma realisé les infrastrutures nezesciares y aloghé i scioldi. Y chilò végnel en ment l caje dla zirconvalazion de Selva che dess vegnì realiseda te 15 –20 agn! Ma sonse pa mac? Sce al vegn rejoné enscì sà vigni mut che ala ne vegnirà mai realiseda. Te n erch mascim de 6-7 agn mess Selva avei sia zirconvalazion. Sce an ne é nia datant da garantì chest a les valedes ladines con dutes les coutes che vegn paiedes ite spo vegn vigni dì plu atuala la domanda: é les valedes ladines che à debujegn de Sudtirol o él Sudtirol che à debujegn dles valedes ladines? N pensier da se fé. I ladins mess se fé avalei si derc. Ciamò n iade, al ne é nia azetabel che al nes vegne damané de autres coutes per realisé cie che i on debujegn. Tost vegniràl na couta per l'aria da mont che i tiron ite! En plu messonse ence n pue mete averda con i turisc', la mentalité de cerc bogn aministradours é chela resteda endour de 50 agn olàche tres la desvalutazion dla lira ne fòvel nia n problem auzé i priesc; al scior ne podonse nia tres ti fé paié deplù. Tlafineda se oujel de n auter vers! Y chilò da nos se muev pa dut entourn al turism.
N apel ai ladins! Ne se lascede mai rejoné su con l daz, na baujia per n comportament che an ne dess mai lascé pro. Chilò él da ti tré les oredles a nosc aministradours provinziai pian via da les retribuzions che é desproporzionedes! Luis Durnwalder, a d'ejempl, ciafa plu paiament de Barack Obama!!! Da pert de chesta aministrazion él da se aspeté ciamò de beles sorpreises. I conc dla provinzia fej bel plan ega da vigni pert. De chest se en anadarà les aministrazions comunales che ciafarà tres demanco y i zitadins enstesc che vegnirà tres deplù sforzés a daurì su sie tacuin. Ma sciche les lites se à desmostré, nes lascionse ciamò massa gen tò per l nes da berba Durnwalder y da sie team.

Albert Pizzinini


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 4.77
Oujes: 9


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.439 seconc