benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

La Generela tol posizion sun les esternazions de Konrad Piazza
scrit ai 27 July 2009 da les 15:44:00 da noeles

Scola

Les paroles de Konrad Piazza: fauzes y tendenziouses

Per Piazza fova les unions di ladins "demé n fatour de desturb"pro les tratatives sun la scola a la fin di agn '40 - Touta de posizion dla Generela tres sie vize, Marco Pizzinini

Ai 23 de messel él vegnù fora sun la "Tageszeitung", foliet dal dì todesch te Sudtirol, n articul te chel che l vedl ombolt de Urtijei, Konrad Piazza, se tol a dì publicamenter che entratant les discuscions sun cie model de scola introduje tles valedes ladines ti agn do la vera fova les unions di ladins "demé n fatour de desturb". Sun chesta esternazion tol sen ofizialmenter posizion Marco Pizzinini te sia enciaria da vize-president dla Union Generela. Al definesc les paroles de Piazza  fauzes y tendenziouses. Sun l svilup dla scola ladina à l Ofize scola y cultura ladina dla provinzia de Bulsan dé fora n liber "Aspec storics dla scola ladina te Sudtirol". La fontana plu reguda é endere zenzauter l liber "Ein Leben und eine Schule/Una vita, una scuola" dl vedl intendent Franz Vittur che à vivù tres de persona dutes les entravegnudes entourn a la scola ladina. Marco Pizzinini, vize-president dla Generela.



Touta de posizion
L temp de encuei é caraterisé da la globalisazion olàche al sarà entres plu emportant da emparé deplù lingac. Al vegn rejoné truep de imerscion y trueps esperc y ence raprejentanc politics veid tl sistem paritetich dla scola ladina n ejempl che jissa ben per dut Südtirol. Tles valedes ladines él ultimamenter vegnù fora na gran polemica anter raprejentanc de pensiers politics desvalifs che strita chi che dess avei i meric per avei metù su la scola ladina atira do la Seconda Vera.
I ladins fova enlaouta (ma en pert dutaorela) despartis anter chi che se sentiva plu todesc o plu talians. Al fova vegnù fora na discuscion longia y sfadiousa sun cie model de scola, talian o todesch che fossa sté plu ideal per i scolés de nostes valedes. Chi che ova l cuer che batova todesch volova na scola todescia y chi che ti vola plu ben al “tricolore” l essa voluda plu taliana. Nost lingaz y nosta cultura fova conscidrés da trueps, ence da jent y personalités de nostes valedes, na cossa de puech valour.
La scola ladina é steda a la fin n compromis anter chestes does fazions arjont per la bria y l coraje de puec idealisc'. A chi che al ti và i meric per chesta soluzion é dessegur demé chi raprejentanc dl sistem scolastich che pò dé na resposta obietiva, chi che fova prejenc a chestes discuscions. Mo duc sà che a chest model, da trueps dassen descredité, ti ova abù souradut ence na pert la jent ladina die alalongia puecia creta. Trueps genitours metova si mutons foradecà a studíe souradut per emparé miec l todesch.
L model paritetich, che ti dà plu lerch ai autri lingac, deida amplié l orizont cultural ai scolés. Per dut cie che é vegnù arjont te duc chisc agn ti và n gran dilan y reconesciment nia demé ai raprejentanc politics, ma souradut a duc i maestri y diretours che à enfin a dal prum moment sostegnì y che se à de da fé per la scora ladina, gonot con de gran dificoltés.
Les critiches che la Union Generela essa ostacolé la istituzion dla scola ladina é daldut fauzes, tendenziouses y desmostra che al é la volonté clera da destorje la verité storica y da descredité les Unions di Ladins dla Val Badia y de Gherdeina da n temp, souradut, sce an pensa che la UGDL é vegnuda costituida tla forma da sen empermò do chestes entravegnudes.
Perchel fòssel dret che duc i nemisc da n temp y sen sostegnidours dla scola ladina fajessa n pice ejam de coscienza zenza se scarzé la musa sun meric o colpes che ne à deguna fondamenta. Chestes discuscions a bon priesc é demé demagogia de porsones de pert, adorbedes da meses verités politiches, che vuel tré ega pro sie mulin.

Marco Pizzinini
Vizepresident dla UGLD


 
Liams emparentés
· Deplú sun l tema Scola
· Chier te noeles


L articul plu liet te chest tema Scola:
Les graduatories per la scola ladina tla provinzia de Bulsan


Valutazion dl articul
Cumpeida mesana de oujes: 5
Oujes: 3


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.359 seconc