benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Joufs dolomitans: n tunel sot Frera, la soluzion
scrit ai 25 July 2009 da les 15:19:43 da noeles

Politica

N tunel sot Frera: n projet daldut realistich, sce an vuel

N tunel sot Frera fossa apresciapuech 5 km lonch y costassa 70 milions de euro, nia na soma fora de mesura

Co che al é oramai da ca. 35 / 40 agn, é i comuns de Gherdeina for ciamò te na comunité o comprensore de val coche an vuel dì, olà che ai ne auda perdret nia. Cie à pa da en fé Gherdeina con Sarnthein, Mölten ,Jenesien, Tiersc o Karneid, Deutschnofen o Fié?
Ti agn 1965/70 él vegnù metù su les „Talgemeinschaften“ (comprensores de valeda) te Südtirol. Do mia minonga fòssel sté plu che logich da mete adum Gherdeina y Badia (sciche Fascia con Moena), ma chest ne à la politica dla SVP a Bulsan y te Gherdeina, nia volù. Samben che deberieda fòsseles stedes chestes does valedes economicamenter y politicamenter true massa stersces, perchel ne à la SVP a Bulsan nience tout en consciderazion chest. Georg Moroder, conseier de comun a Urtijei. Da l'autra pert: entratant i laours pro i tuniei tla Val Badia, endut 3,5 km lonc.
 

Image Hosting by PictureTrail.com

Plu sovenz él vegnù rejoné tl comun de Urtijei de mete adum i Ladins tla medema comunité de val, ma for él sté i ombolc dla SVP de Gherdeina che ne à nia batù na brocia per fé n tel vare.
Ei stà plu gen con i todesc di luesc che é defin folestiers a nos de Gherdeina che jì deberieda con i badioc. Aldidancuei végnel ben tant rejoné di ladins y de sia rejoneda, di problems per l souravive de nosta mendranza , ma l vare plu emportant che fossa sté da dé per arjonje chest, ne vegn nia dé.

Ciun fossa pa chest vare:
L vare da dé per avei n majer contat anter les does valedes ladines é ben chel de avei na bona comunicazion con la jent y anter la jent. Demé sce i stajon plu adum saronse bogn de salvé nostes particolarités che nes desfrenzieia dai autri , va ben ben che i son tiroleisc, ma dantaldut é la populazion entourn al Sela (Meisules) de etnia retoromana-ladina; popolazions che fova te nosta valedes die dant i tiroleisc o i Habsburgh, perchel toconse dantaldut adum con i badioc y nia con i todesc.

Ma ruvon al problem de encuei:
I son oramai tant inant che per gauja dl gran trafich de auti mess i luesc de Gherdeina se fé zirconvalazions per passé via i luesc, a scomencé da Urtijei per finì te Selva, ala ne pò nia jì inant ciamò per 20 o deplù agn con for plu y plu trafich sun i stradons:
Santa Cristina é do a ruvé con i laours, Selva messarà vegnì do, y a Urtijei pénsen ence do co deslié chest problem.a valch maniera. Bon spo, co fòssel pa, can che i son passés via chisc trei luesc, te Plan, furné te n tunel y vegnì fora a Colfosch? La idea de fé n tunel ova bele abù Oskar Prinoth dant plu de 20 agn ma degugn ne ti ova dé arta.
Al fossa n tunel de ca. 5 km de lungheza. An sà che n tunel costa ca.14 milions de euro al km, perchel vegnìssel a costé zirca 70 milions de euro. Chesta soma ne é nia picera, ma sce i penson che per Bula con si 140 abitanc, él vegnù fat n tunel che costa ades 10 milions de euro, ne messéssel nia ester n problem de abiné ca 70 milions de euro per mete adum na popolazion de 17-18000 persones con ca 3,5 milions o passa de prejenzes de turisc' al ann.
Degunes autres valedes de nosta provinzia ne porta tant de richeza a les casses de nosta Provinzia, al basta medré pensé che l 90% de dutes les coutes diretes y indiretes paiedes ite da la jent de Gherdeina y Badia al stat ruva derevers a la provinzia de Bulsan.
Dantaldut se tràtel de avei la bona volonté da pert dla provinzia per fé n tel laour. Al ne é nia die ca che la provinzia de Bulsan ova fat na streda nueva con trei tuniei bendebot lonc per i doi luesc de Laurein y Proveis olàche al viv jent de rejoneda todescia, ma che fova demé da arjonje tres l Trentin, chilò él desegur vegnù spenù y vegn ciamò spenus n grumon de scioldi per gauja dl terac tender (un n tunel é 1900 m lonch).
Chesta soluzion é ence demé steda politica, vigni autra soluzion essa costé na strambaria demanco. Laurein y Proveis éssen podù arjonje saurì fajan na streda nueva dal jouf de Mendola permez (dut da pert da soredl y puecia neif d'invern) y ciamò de n zaron plu curta per ruvé a Bulsan.
Savan che n tel laour ne pò nia vegnì realisé da encuei a endoman, bastéssel che la Provinzia metessa su na pert 10 milions de euro al ann, do 7 agn éssen i scioldi che và debujegn. Enfin a che duc i projec y les lizenzes é a post per scomencé n tel laour passàssel desegur via 5/6 agn.
I son segur che n tel laour fossa la mioura cossa che an podessa fé per garantì la souravivenza dla mendranza ladina. Al basta pensé tant puech contat che al fova anter Gherdeina y Badia ciamò dant y do la seconda vera mondiala. Permò con na mioura comunicazion, dantaldut tres l mesun auto, ma dessegur ence aldida encuei con i schi, él vegnù porté pro a se conesce miec y a nes capì deplù. Sen vàla bele miec, ma con n tunel jìssela ciamò scialdi miec y tl medem moment desliàssen l problem dl gran trafich di auti sun l jouf de Frera. Chi che volessa spo furné sun l jouf per se gode l bel panorama, podéssen pona ence fé paié zeche.
Con chisc pensiers volessi daurì danuef na discuscion tla popolazion sun la problematica. Ie rate che al paia la fadia de se fé n pensier lessù. Duc chi che pensa che chesta idea fossa da porté inant, priassi bel de dì sia minonga tla Usc di Ladins o sun Noeles.net.
Moroder Georg


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 5
Oujes: 3


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: Joufs dolomitans: n tunel sot Frera, la soluzion (ponc: 1)
da marco ai 25 July 2009 da les 17:54:36
(Infos sun l utilisadour | Ti mané n messaje privat)
Iu sun a öna con la proposta de Georg, mo iu ponsass ince ennant; tal dagni podess dötes les valades ladines gni coliades da en tunel.
Danter Al Plan y Cortina vegnel ince belo baié de en tunel; d´altonn gnaral prejenté le preproiet.


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.394 seconc