benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

N juech doprò ti Grijons: sen spéren de podei tò pert a la Europeada
scrit ai 22 July 2009 da les 19:10:26 da noeles

Sport

N juech doprò: na selezion ladina jia tl Grijon

En l ann passé ne ova la FUEV nia envié i ladins a la Europeada dles mendranzes europeiches - Protestes da pert dla lia per i popui manacés

Image Hosting by PictureTrail.comTardiva, ma ala é empò vegnuda a se l dé, na partida anter na selezion ladin-dolomitana y ladin-grijoneisa, tl medem luech olàche al é vegnù jié la Europeada dles mendranzes etniches en l ann passé, zenza na formazion ladina. Al fova vegnù dassen protesté da pert dla lia per i popui manacés a Bulsan che la FUEV y i rumanc grijons, sciche organisadours dla Europeada 2008, l campionat dl palé dles mendranzes europeiches, ne ova nia envié na formazion ladina. Ai ova crié "ad hoc" na "mendranza sudtiroleisa" (praticamenter na selezion de jiadours de clubs dl palé dl raion todesch de Sudtirol y 1 n jiadour ladin che é pro l Stegen/San Scimon) y an volova ence fé creie che al fossa sté i ladins laprò. Les protestes ova dantaldut arjont i media ti Grijons. La chestion à abù dant da puech n "juech doprò". Al é bele suzedù, ai 20 y 21 de jugn, ma la novela é che na delegazion ladina de Sudtirol ruveda via tla Svizra a ciafé i vejins dl Grijon y por tó pert anter l auter a na partida de palé contra la "Selecziun Sursilvana", en gaujion dl giubilé de 75 agn dl’assoziazion dl palé FC Trun/Rabius. L'iniziativa fova pieda via da Giorgio Costabiei, president dl US San Martin de Tor, che ova abù la ocajion da enconté Andrea Rassel, vizepresident dla FUEV (Federazion europeica di grups etnics) y anter i organisadours dla Europeada, l campionat de palé dles mendranzes d’Europa. Sen spera Costabiei che i ladins posse tò pert autonomamenter sciche "mendranza ladina" a la proscima Europeada dla FUEV.
L logo dla Europeada de setember 2008, a chela che i ladins dles Dolomites ne fova nia vegnus enviés, per rejons politiches.



La chestion é nasciuda enscì: al fova vegnù fat la proposta da organisé na enconteda anter i ladins de Sudtirol y chi dl Grijon, che dova avei carater sportif y tamben renforzé tres l sport i liams anter les does realtés ladines. Laprò podessa chesta enconteda ester l prum vare per mete en pe na scuadra ladina per la proscima edizion dla Europeada. La partida anter i ladins dles Dolomites y i ladins dl Grijon é steda na partida dret sentuda che é juda fora sun l resultat pèr de 2 a 2. Chesta enconteda é stada l’ocajion per i jiadours da se conesce miec y da sozialisé. Con l resultat pèr de 2 a 2 à i ladins de Badia y Gherdeina fat na bela figura, y à desmostré che na scuadra di ladins dles Dolomites, tl davegnì poester con jiadours de Fascia y da souramont, podessa dessegur ester competitiva. Do la partida à i jiadours tout pert a na festa popolara, tolan la ocajion per "fé vila" con i grijoneis. Endò en iade veiden che l sport é na istituzion soziala dret emportanta che pò ence dé n contribut concret per na mendranza y sia cultura.

La FUEV logheneia l'esistenza di ladins

Pro les mendranzes enviedes al turnoi de juech al palé ti Grijons figureiel endere na "mendranza sudtiroleisa" che ne esisteia nience
La Lia per popui manacés tol su con marevueia che la organisazion de mendranzes FUEV (Federazion mendranzes europeanes) ignoreia y logheneia la esistenza di ladins. Tres chest desmòstrela de se comporté te na mainiera da se daudé per na organisazion che se tol dant de raprejenté enteresc de mendranzes. La FUEV endrezeia via - tres l aiut dla Lia Rumancia - n tournoi de juech al palon "Europeada" (www.europeada2008.net). Chest é bon y dret, ajache i stac nazionai y sies formazions sportives ignoreia de regola la varieté culturala. Ma sun chest troi varieia ence la FUEV. Pro les mendranzes enviedes al tournoi y sun la cherta figureielel na "mendranza sudtiroleisa".
Chesta terminologia é fauza y nazionalistica, ajache ala logheneia l'esistenza de na mendranza ladina. Chesta terminologia ne ascon via nia demé l'esistenza di ladins te Sudtirol, ma ence i ladins fora dla provinzia de Bulsan. Tres chest comportament se taca ite la FUEV te na ideologia anti-minoratira che an conesc dret ben tla provinzia de Bulsan, che ne reconesc nia i ladins sciche grup, ma che veid i ladins desche na sort de sot-grup di todesc aladò dl famous slogan: "Minderheit in der Minderheit". Enscì se compòrten tla medema maniera desche i stac nazionai. Con cie autorité criticheien pa da pert sudtiroleisa l nazionalism talian, sce an maza envers i ladins tla medema sanisc?
Chest comportament dla FUEV ne pòn nia azeté y nia perdoné, ajache la FUEV se definesc sciche organisazion dles mendranzes y la Union Generela é ence member dla FUEV che à a cef tla persona de Martha Stocker, na sudtiroleisa todescia, tla enciaria de vize-presidenta. Che la FUEV adora na terminologia fauza y logheneia l'esistenza di ladins deforavia y a livel european, é perchel volù y fat aposta.

Bulsan, 25.02.2008

 

 


 
Liams emparentés
· Deplú sun l tema Sport
· Chier te noeles


L articul plu liet te chest tema Sport:
Carolina Kostner porta a ciasa da Mosca la medaia de bron


Valutazion dl articul
Cumpeida mesana de oujes: 5
Oujes: 5


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.387 seconc