Joufs dolomitans a paiament: ram de rejia

Florian Mussner à dé dant na data: la sajon da d'isté 2010 - Pizzinini: la provinzia dess realisé n tunel anter Gherdeina y Val Badia 

I joufs dolomitans a paiament deventa ram de rejia. I operadours turistics sun i joufs se pararà con piesc y con mans decontra, ence legalmenter. Florian Mussner à bele dé dant na data per i joufs de Frera y dl Sela, a meteman con la sajon da d'isté 2010. Particolars ne conéscen nia ciamò avisa, ma la transiadura podessa ester ciaradousa, enfin a 13 euro. Tla chestion se à entratant fat audì Reinhold Messner che se dij a una con na scluta di joufs al trafich di auti, ma da l'autra pert se à belavisa el desmostré dassen ribicious che l comun de Bulsan vuel desmendrì les plazes da parché dlongia sie museum a Sigmundskron. Ilò dess la jent inant ruvé permez saurì con l auto. Tla chestion tol ence endò posizion LADINS DOLOMITES che se dij dassen contrar a na scluta. Albert Pizzinini propon de fé finalmenter l tunel, na proposta vedla desche l cuch, bele Hugo Valentin l ova prononù, ma dutaorela atuala aladò de Pizzinini.

Albert Pizzinini, president de LADINS DOLOMITES. "L’idea de Florian Mussner de mete n daz sun i joufs de Sela y Frera dal 2010 é faleda, ne portarà nia a n miorament dla situazion y é en plu n at de aroganza ti confronc di ladins y de si aministradours locai. Al é cler che chestes dezijions mess vegnì toutes sun l post da pert dla jent che é plu enteresseda. Tl stil SVP stà do la chestion dl daz sun i joufs fin dopl che é chel de ne messei nia plu realisé la dejouta de Selva, perauter de uega independentamenter da dut."
Pizzinini fej n valgunes propostes, ma tochés dess ester demé l setour turistich: "Per mioré la situazion él deplù poscibeltés. An peia eventualmenter via da la scluta di joufs per n valgunes ores al dì per l turism. Cler déssel ester dampertfora che chesta ne reverda nia la jent dl post che messarà podei passé tresfora. An pò ence pensé ti meisc da d’invern de laoré stadiran anter sabeda y domenia la muda di sciors. N’autra soluzion é chela de favorì l anuzament di mesi publics da pert dl turist. Al turist méssel ti convegnì da tò l autobus plutost che sie auto. Dutes chestes soluzions pò vegnì provedes fora ciafan la dreta mesceida zenza ti fé dann a degugn."
Sce an vuel bele saré les stredes sun i joufs propon Albert Pizzinini de pié ite l problem a les raijes: "La scluta temporara resta per sia natura demé na mesura de alistament che ne và perdret nia tla raisc dl problem che é chela de sconé i joufs che ne pò nia deventé autostredes, ma da l'autra pert à la politica l dovei de garantì la viabelté y l coliament te vigni sajon anter les valedes ladines." Per arjonje veid Pizzinini na soluzion soula, chela de n tuniei de coliament; per Gherdeina y Badia p.ej. n tunel sot Frera fora. Chest permetessa anter l auter la zircolazion anter les does valedes ence d’invern olà che massa gonot é l viade da Selva a Calfosch plu sfadious che ruvé da Selva enfin a Trent, sce an mess fé la outa soura Persenon. Cossa nia da creie tl 21. secul!" Demé La realisazion de n tel projet permetessa de lascé i joufs ledesc per jì a pé anuzan i implanc portamont o i despassé via jian con la roda, garantian a chesta moda, conscidran l enteres tres majer per les rodes, la poscibelté de arlongé la sajon da d’isté. Demé a chesta maniera pòn ence arjonje vantajes clers a livel ambiental."