Svp: demé de beles paroles y de gran empermetudes

Pizzinini: "Tles valedes ladines végnel mout deplù coutes de chel che ruva endour tles casses comunales" 

"Aladò dles coutes paiedes ite él oramai da trueps agn che les valedes ladines ciafa endour demé na picera pert de cie che vegn paié ite. La domanda da nes fé é: él la Ladinia che à debujegn de Bulsan o él Bulsan che à debujegn dla Ladinia?", dij Albert Pizzinini, president de LADINS DOLOMITES, jian inant dijan che "l sforz fat da la SVP per agabé da les ultimes lites provinziales oujes tles valedes ladines confermeia plenamenter chest. Da pert dl raprejentant ladin a Bulsan végnel fat na politica dl juech dopl. De beles paroles tla Ladinia y de gran empermetudes, ma fac degugn. Tla enconteda con l minister Maroni ne à Florian Mussner nience abù una na parola per i ladins, ence sce al fossa sté la dreta ocajion. Degun sostegn nience per cie che reverda la senta dla fondazion Unesco tla Ladinia, per Mussner vàla ben, sce ala vegn metuda su a Bulsan, sciche ala ti jiva ence ben che l inom Dolomites vegnissa venù tla Cina."