Daz sun i joufs: Mussner ne dà nia trieva
Dl 2010 vuelen mete man con Frera y Sela, l daz podessa ruvé a 13 euro - Degugn ne rejona che i joufs lieia ence la jent ladina
Dal isté 2010 inant déssel, aladò dl plan dl assessour Florian Mussner, definitivamenter vegnì metù su les stanges sun i joufs de Frera y dl Sela. Demé chi che paia n daz podarà passé. Al vegn rejoné de enfin a 13 euro sciche sun la streda dl "Timmelsjoch", scodus sun la pert austriaca, ma na pert regor spo inant tles casses dla provinzia de Bulsan. Nia cler ne él ciamò sce al vegn fat na ezezion per la jent dl post y coche chesta ciala fora. I pendolars messessa te vigni caje podei passé debant. Contra chest "plan Mussner" se para dassen bele da n valgugn agn l comité per l stravardament di joufs dolomitics con a cef Osvaldo Finazzer, ostier sun l jouf Pordoi, ma ence da pert dla politica de Belun y de Trent végnel segnai de contraposizion contra chesta mesura unilaterala da pert dla provinzia de Bulsan, enceben che la situazion podessa se ouje snel, sce al vegn arjont valch acordanza sun co se partì les entredes.
Osvaldo Finazzer, ostier sun Pordoi, a cef dl comité contra la scluta a daz di joufs dolomitics.
L comité, te chel che al se à sclut adum entourn a 80 operadours turistics sun i joufs dolomitans, criticheia che l trafich ne se empifa nia sun i joufs, ma tles valedes y dailò déssel vegnì cialé de ciafé soluzions. I operadours sun les stredes entourn al Sela, che ti dà da laour a encer 600 persones, viv dantaldut dl trafich che roda sun les stredes, dl turism a motor, dles corieres che ruva da d'autres pertes per fé na roda dl dì tles Dolomites. Finazzer rata enfinamai che joufs a daz podessa avei conseguenzes negatives per duta l'economia turistica tles valedes enstesses.
Na autra ousc critica vegn dai Verc che miena che n daz sun i joufs podessa ciamò tré adalerch deplù turisc' y rata che al fossa plu enjignoul scluje per n valgunes ores al dì les stredes sun i joufs y mioré depierpul l trasport publich che conduj sun i joufs.
La scluta de Frera y dl jouf dl Sela podessa demé ester l scomenciament per mete a daz damprovia ence les stredes de Ciaulonch y de Fauzares. Dut depen sen da les acordanzes con les provinzies vejines de Trent y de Belun. Durnwalder à bele encondé chisc dis che an peia via con les tratatives.
Demarevueia él che te chest contest ne él tomé deguna parola da pert dl assessour ladin a Bulsan, Florian Mussner, che tres chesta mesura zéren ence endalauter ciamò deplù la mendranza ladina. Ruvonse a la situazion che l president y membri dl consei dla Generela mess paié tl davegnì n daz per jì tla Ciasa di Ladins a Urtijei? A desvalivanza dl Timmelsjoch - che demé na streda de blot enteres turistich - conduj les stredes de coliament anter les valedes ladines dutes soura i joufs. Al é ence stredes economiches y de laour. Al ne é nia na alternativa.
