benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

L pest Lichtensteinpreis
scrit ai 09 March 2003 da les 14:12:21 da noeles

Persones

 

La Retoromania todeschiseda y les pedies tla toponomastica

Paul Videsott, romanist y assistent a l'Université de Desproch, à podù pié do en juebia passeda (06.03.2003) l terz gran reconesciment per si studes tl ciamp dl'archirida scientifica, l "Liechtenstein-Preis", metù a disposizion a l'Université da Desproch dal prinzipat omonim. Les publicazions scientifiches tl ciamp dla romanistica contegn oramai na raia de articui fora de sia pena, da recordé dantfora les does publicazions importantes: l vocabular dl "ladin marou-todesch" (1998) y l liber "I cognoms ladins" (2000), plu inant adum con la dozenta Heidi Siller Runggaldier la "Bibliografia retoromana". Paul Videsott fova ence n anteriour colaboradour dl projet Spell y al à fat la tesa de laurea sun l tema  "Wortbildung im Ladin Dolomitan". Sia pascion: chela de iluminé ciantons dutaorela scurs dl nasce dl lingaz y dl'etnia retoromana-ladina. Te chest contest pòn tamben encadré chesta ultima archirida per chela che al é vegnù onoré con l "Liechtenstein-Preis". Argoment dl stude scientifich: classificazion dla toponomastica romana-latina dal Montafon/Vorarlberg (A), soura la Svizra (Trun/Surselva) a les Dolomites y sourafora enchina tla val de Kals tl Tirol dl Ost, na isola latina/ladina enfin al 16eisem secul y valutazion dl gré de emparentazion con metodes scientifiches. Sun l retrat: Paul Videsott tol adencontra l pest dal raprejentant dl Prinzipat dl Liechtenstein.



Desche l lingaz ne é naine i inoms de luesc o toponims sternus fora zenza orden sun l teritore, moben con orden y con strutura. Chestes strutures de toponims é da vedei ence spontanamenter y ales é bele vegnudes analisedes plu sovenz, ma plu complicheda devéntela, sce an vuel descurì ence les strutures viadedò y plu fones: les relazions linguistiches y l rai de deslargiament de certes formes. Per vedei clermenter chisc aspec val debujegn de prozedures y de metodes matematiches speziales per classifiché i toponims o miec tl stude de Videsott aldò di etims, vuel dì les paroles raisc: p.ej. latin "campus" vs. "ager" (tl Grijon per ciamp), do les desvalives derivazions p.ej. de "pratus / pré" (pradac, pradel, praduc, pradat) y e.i. Una de chestes poscibeltés de classificazion é la tassonomia numerica, ence nomineda tassometria. Videsott à analisé i etims romans-latins de n centené de comuns, 102 per ester avisa, situés da entrames les perts dla ciadeina prinzipala dles Alpes, la majera pert aldidancuei germanofons. La toponomastica é desche "na glacera" dl lingaz che conserveia sies pedies, lascian rondenì ciamò n son debl dles paroles retoromanes che s'à destodé tl rejoné da vigni dì da secui te chisc luesc. 

Sun la foto da manciancia: dr. Martin Kocher, premié per n projet finanziar, l Retour dla Université prof.dr. Hans Moser, dr. Paul Videsott, premié per l stude sun la toponomastica y dr. Paul Scheier, premié per n stude sun la fisica ionica y l raprejentant dl govern dl Liechtenstein.

Con sia metoda àl enrescì i profii de somianza danter i raions touc en consciderazion. An sa che l Montafon/Vorarlberg y tla Auta Val Venuest é l ladin retoroman, de tip grijoneis, empermò scomparì do la rata tert, tla Auta Val Venuest te temps moderns, vuel dì tl 18eisem secul. Pro la toponomastica se enténen tamben che pertes orografiches a manciancia dl Isarch, sciche l raion de Ciastel fova romagnus plu giut ladins de d'autres pertes de Sudtirol, y an rejonova ladin de tip oriental o dolomitan. A nord depierpul raions bele germanisés adora sciche la Val de Puster (todeschiseda dal 600 do C. inant, con ezezion de valgunes pertes che fej encuei pert dl comun de San Laurenz y Valdaura), chest vel ence per Sarntal y les montes soura Bulsan, olache i etims/toponims romans-latins é semenés rers. I todesc s'à encogné dal nord adora enchina Bulsan y Maran con Passeier, taian un da l'auter i raions de lingaz ladin/retoroman. Na forteza retoromana é resteda inant giut la Val Venuest y la Ladinia. Aldò dl stude de Videsott veiden, comprové con mesurazions scientifiches, che la toponomastica dla Val Venuest tol ite na posizion de transizion anter la Ladinia dles Dolomites y l Grijon. An veid ence che la toponomastica de Fodom é scialdi valiva a chela dla Val Badia, chest a desmostrazion che la colonisazion à messù pié via dal nord. Y samben d'auter plu. (is)

Na parola fosc nia tant conesciuda:

raia = schira


 
Liams emparentés
· Deplú sun l tema Persones
· Chier te noeles


L articul plu liet te chest tema Persones:
Laudatio per dr. Paul Videsott


Valutazion dl articul
Cumpeida mesana de oujes: 4
Oujes: 2


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: L pest (ponc: 1)
da Jandaniel ai 09 March 2003 da les 21:15:48
(Infos sun l utilisadour | Ti mané n messaje privat)
Complimenc y dilan a Paul Videsott che se à dé jö cun tan de temesc ladins, de te' persones adora la Ladinia por jì inant ince tl dagnì ... complimenc!


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 2.311 seconc