La Svp ne dess nia avei n monopol de raprejentanza di ladins
N raprejentant de LADINS DOLOMITES tolarà pert a la meisa torona per Sudtirol dl minister Roberto Maroni
Ladins Dolomites, tres sie president nuef, Albert Pizzinini, contesteia che la Svp ae la funzion de raprejenté da soula o ae raprejenté politicamenter i enteresc di ladins te na mesura valiva ai todesc. Pizzinini: "Ti ultims temps ti ésen ence jus permez a la chestion dla funzion dla Svp sciche partì de abineda dles mendranzes todesces y ladines. La Svp se prejenteia gen dagnora desche partì etnich davert a does mendranzes, chela todescia y chela ladina, lascian fora i talians. Tl contest politich provinzial él autri partis todesc che se afermeia tres deplù sciche ence l moviment de recoiuda di ladins Ladins Dolomites che à desche fin chel dla sconanza y dla afermazion di derc di ladins a vigni livel." Y chest te na mesura plu ampla che chela voluda da la Svp.
Albert Pizzinini, president de LADINS DOLOMITES
"Te chest contest é la ghiranza dla SVP de raprejenté i ladins utopica y engianousa", dij Pizzinini. "N partì etnich sciche la SVP à l fin de sconé y de promueve la mendranza linguistica che ala raprejenteia. Volan endere raprejenté does mendranzes linguistiches ne podaràla mai ti jì permez adum a les problematiches che reverda trami i grups linguistisc' olàche al ne é nia conflic de enteresc. Canche chisc se prejenteia végnel dagnora automaticamenter trat dant l grup linguistich plu raprejentatif, te chest caje i todesc", spliga Pizzinini. Chest suzed p.ej. pro les candidatures a les lites y te trueps d'autri ciamps. "I ladins à dagnora demé da perde", sotrisseia Pizzzini, sce ai ne se fej nia audì plu dadaut tres n sie moviment politich autonom.
"Demé sce l partì te sie intern se embasta l am de mete dantfora la defenuda dla mendranza a dann dla maioranza plu raprejenteda y che é maioranza al intern dl partì, é la preteisa de volei raprejenté la mendranza ladina da fondamenta. Chest ne é endere mai suzedù y ne podarà mai suzede, dantaldut nia plu te na fasa de redimensionament dla SVP", é convenciù l president de Ladins Dolomites, Albert Pizzinini.
L moviment Ladins Dolomites vuel fé audì sia ousc tla politica provinziala, n prum sostegn vegn da la Lega Nord. Do na enconteda abuda con raprejentanc dla Lega ai 3 de jugn 2009 é l partì politich LADINS DOLOMITES vegnù envié a partezipé a la meisa torona en raprejentanza di ladins con l minister ai Interns Roberto Maroni.
Entratant la enconteda él ence vegnù afronté i temesc dla raprejentanza istituzionala di Ladins a Roma y a Bruxelles y l federalism fiscal. Les posizions de Ladins Dolomites vegn sostegnudes da la Lega Nord.
