benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Endoman peia via la prozescion de Jevun
scrit ai 03 June 2009 da les 08:54:47 da noeles

Cultura

"Fora per cheles viles dlonch la lum adora se empeia ...."

Endoman peia via da les 12 ploanies dla Val Badia l pelegrinaje tradizional de Jevun che vegn metù a jì vigni trei agn 

Image Hosting by PictureTrail.comN valgugn dis plu adora che i autri agn peia via en juebia, ai 4 de jugn, da les 12 ploanies dla Val Badia les prozescions de Jevun, cheles dla Bassa Val Badia se abina tradizionalmenter da mesdì a d'Antermeia per jí deberieda soura Börz via, depierpul che cheles dl'auta valeda y Lungiarü và per Munt d'Adagn. Aluesc podéssel ester ciamò alauta n pue de neif do les neveres de chest ann. Les prozescions se enconta dutes cantes domesdí via a Santa Madalena te Funes per jí deberieda y sté souranuet a San Piere de Funes. L dì do, vender ai 5 de jugn, jiràn bonorifs devers Cluses y sun Jevun olàche al gnirà tegnù la messa conzelebreda tradizionalmenter dal vescul, chest iade dal vescul nuef Karl Golser. Arciasan stàn ciamò n iade souranuet a San Piere per dé outa devers ciasa l di do adora. Tradizionalmenter él demé ei che và pera, enceben che al é ence sté valch outes eles che à tout pert. An se aspeta endò entourn a 1.000 pelegrins. I agn de Jevun dess ester enzaul de bogn agn.


La prozescion de Badia, enseira dantfora con l valon devers la gliejia de San Piere de Funes.

Valch sun la storia de Jevun
Dal 3. secul do Crist inant é la storia de Jevun dassen lieda a la storia dla gliejia y pò vegnì trata adum en curt enscì: - tl 3. secul do C. vegn San Ciascian, martir dles persecuzions di cristians tres l imperadour Dioclezian, tegnù te perjon te na tor a seboí sun Jevun a chela che an ti à dé plu tert sie inom;
- bonamenter fova Jevun na stazion per miscionarisé la jent dl luech enfin al 381, ann te chel che Jevun ti é vegnú sourandé al Patriarcat de Acuileia; - Jevun é dedò na senta vescovila enfin al trasferiment dla diozeja de Jevun a Persenon (entourn al ann 967 do Crist);
- dal 1028 al 1535 él na senta aministrativa dl vescul de Persenon, en chel ann endere dàl ju l ton y l meldefuech desdruj dut l aciasament. Sun chesta arbandoneien l comples entier per soura 100 agn;
- dl 1668 végnel costruí na glieja nueva dedicheda a la Vergina da pert dl prinz-vescul Sigismond Alfons dei Conti von Thun;
- L ann 1685 deventa Jevun senta dla claustra (badia) dles monies beneditines. La vita claustrala vegn rota via da pert dles trupes napoleoniches per za. 80 agn y se remet regolarmenter empermò dl 1882 y dura dutaorela.

Image Hosting by PictureTrail.comLes fortificazions y les bastions
N document che nes dà na idea plu clera desche les fortificazions podova cialé fora n iade é n dessegn dl pater Cristoph Jager, daté con l medieje 1686. Al raprejenteia la acropola ai temps dl mons. canonich Matie von Jenner che à lascé fondé la claustra dles monies beneditines gnudes adalerch da Salzburg. Te chest temp à la aministrazion fat deplù laours de ampliament y de derturament che à endere desdrut feter dutes les pertes plu vedles: al é gnù tout demez les tores de defendura y i murs perimetrai y enluegia de chisc él gnù fat su n mur de cendla a entaiadura guelfa. Cie che al resta encuei di vedli murs de defendura é demé la bastion judapé che tol ite la "Tor di Signours" (13eisem secul) y l vedl mur basvia con entaiadura ghibelina che lieia la gliejia dla Vergina con la capela dles Grazies y l'azienda agricola dlongia. La Tor di Signours ova a si temps na funzion de verdia y de liament con i variadours per podei rodé sun i murs entournvia. Canche al é gnù fat su la claustra él gnù fat fora tla tor ciamenes y salamenc per i prevesc y la servidour dla badia. Nia da giut é la faceda a nord dla tor vegnuda tafleda con treves de legn che se enchedra dret ben tla architetura locala.
L mur de cendla a vest se destira per apresciapuech 200 metri al our dla rodena che ciala devers l ruf Tinne. Defora su, dlongia l mur de cendla, conduj la streda per i pelegrins y i vijitadours enfin al comples claustral sunsom. Chest mur, fat su enluegia dl vedl mur de cendla al scomenciament dl 18eisem secul, ne à plu degugn variadours de verdia a desvalivanza dla bastion dessot.
La Tor de San Ciascian se erj sunsom la crepa a nord-est dlongia la Gliejia dla Santa Crousc; ala á na planta chedra y an domineia da chilò a straplom la zité de Cluses logheda za. 200 m dessot. Al pèr che al sie na costruzion che vae zeruch al temp roman, ma la prejenza de n valgugn elemenc architetonics tl stil gotich fej pensé che la tor sie vegnuda fata su ti secui anter l 13eisem y l 14eisem secul.

 

 
 Prozescion de Jevun: storia y mit
 La prozescion de Jevun, les raijes se perd tl scur dla storia
 Museum Ladin Ciastel de Tor: publicazion nueva dl dr. Lois Craffonara sun la prozescion de Jevun
Liams a d'autri articui:
 La Muta da Spinges: 150 agn da sia mort, fac die asconus via - n referat de dr. Lois Craffonara
 

 


 
Liams emparentés
· Deplú sun l tema Cultura
· Chier te noeles


L articul plu liet te chest tema Cultura:
Sotescrivede l Manifest LADINIA 2005!


Valutazion dl articul
Cumpeida mesana de oujes: 5
Oujes: 1


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.370 seconc