Lites europeiches: per na reunificazion di ladins pro Sudtirol
Karl Zeller y Herbert Dorfmann se dij clermenter a una de arjonje na reunificazion de Ampez, Col y Fodom pro la provinzia de Bulsan
Enseira él sté a La Plie de Fodom y via en Ampez na enconteda per les lites europeiches anter l candidat dla SVP dr. Herbert Dorfmann y l raprejentant dla SVP tla ciamena di deputés a Roma Dr. Karl Zeller con la popolazion y member dla comiscion per afars costituzionai. Per les lites europeiches é ence i comuns da Souramont tl certl lital "nord-est" che ti dà la poscibelté da lité i medems partis che nos.
Da man ciancia: Siro Bigontina, l parlamentar Karl Zeller y l candidat Svp per les lites europeiches Herbert Dorfmann
Dorfmann se à bele plu gonot declaré a una da sostegnì i derc dla mendranza ladina y plu iadesc àl ence dit che el é a una con la ghiranza dl referendum dal 2007.
Zeller à splighé che el à prejenté 3 propostes de lege al Parlament a Roma per chesta chestion y chestes propostes vegnirà ence tratedes proscimamenter. Ence Zeller é n gran sostegnidour dles ghiranzes dla jent da Souramont che el conesc bele da agn. El à dit che al moment ne é la situazion nia massa bona, ma el à envié les raprejentanzes ladines da jì a Roma a splighé dant la comiscion dl Parlament, de chela che ence el fej pert, l gran tort che ti é vegnù fat a nosta mendranza dai fascisc' dl 1923. I comuns da Souramont, a desferenzia de trueps d'autri, à rejons storiches da vegnì de revers pro Südtirol y chest pò avei n gran peis per la dezijion finala dl Parlament, ence sce l Venet con sie president Galan se pararà con piesc y con mans da nia lascé jì Cortina, la perla dles Dolomites!
Ultimamenter él sté l Parlament che à traté y ti à de rejon al mudament de region de comuns anter les Marches y l'Emilia Romagna y chest podessa ester n bon segn ence sce per i comuns da Souramont jiràl debujegn de na lege costituzionala.
Dorfmann à splighé i ponc de sie program desche deputé al Parlament Europeich che và da la sconanza dles mendranzes a duc i problems atuai che reverda les popolazions che viv te n teritore desche l nost (trafich, agricoltura, economia etc.).
I raprejentanc dla SVP à ence dit che ei se aodassa plu unité da pert dles valedes ladines a dutes les iniziatives toutes per arjonje la reunificazion de nosta mendranza.
Ence la truepa jent ruveda adalerch à podù tò pert a la discuscion con truepes domandes y an pò di che la manifestazion à abù n gran suzes te n clima costrutif y de gran serenité.
