Na lege nueva slesiriarà l passaje da na region a l'autra, al basta la volenté dla jent dl comun - La Ciamena à dit scì, sen pàssela al Senat
S
ce n comun vuel passé da na provinzia o region a l'autra bàstel n referendum te comun, se basan sun na scempla delibera comunala. Les regions y les provinzies tochedes ne pò fé net nia decontra che lascé jì o tò su i comuns che à chesta intenzion. Dant puec dis à la Ciamena di deputac a Roma dit de scì a chesta lege che slesiriarà, an podessa dì a na maniera revoluzionara, l passaje de n comun o de na provinzia da na region a l'autra. La lege é passeda con n referiment particolar a Sudtirol, olache al va debujegn ence de n bensté dl'Austria, sciche Karl Zeller dla Svp, deputat a Roma, à dit. La lege passa sen al Senat. Con chesta se deurel ence scenars nuefs per i comuns ladins da Souramont, Ampez y Fodom dantfora, che à bele da n pez segnalé chesta volenté. Sun l retrat: i comuns ladins tripartis (BZ-TN-BL).
Con la lege vedla fova l iter cotant compliché, tant che al ne é mai vegnù tout en consciderazion: al jiva debujegn de n referendum comunal y de n referendum regional te trames les regions tochedes y de na lege costituzionala, vuel dì n passaje prest imposcibel. Tla Talia él deplù comuns con chesta intenzion y al é ence vegnù formé na union che à porté inant la chestion a livel politich. Con la lege nueva tomaràl demez duc i impedimenc legislatifs y al bastarà la scempla volenté dla populazion dl comun interessé y de na lege ordinara che la convalideia. Ampez y Fodom podessa enscì endò giaté vueia de se mueve de chest vers, sciche al é suzedù ti prums agn '90. Na speranza nueva per la unificazion dles valedes ladines.
