Ciasa de Paussa a San Martin: n recurs de Paola Bioc Gasser fej sté su i laours
Albert Pizzinini (Ladins Dolomites): n comportament de puecia responsabelté
San Martin de Tor – L ann 1986 ti òvel podù vegnì sourandé la Ciasa de Paussa, n fabricat de gran enteres utl publich a la jent dla Val Badia. Agn alalongia fòvel da ciafé tla medema ciasa tamben na pert di servisc sozio–sanitars. Tl scomenciament dl ann 2002 é i servisc sanitars vegnus trasferis tla senta nueva a Picolin y an fova a una che la Ciasa de Paussa essa abù debujegn de n restruturament, ajache
les mesures de segurté ne corespon nia plu ai temps de encuei y les strutures internes nia plu ai debujegns dla jent atempeda che viv tla ciasa.
Paula Bioc Gasser dla dita Bioc Costruzions.
Entratant l ultim invern él vegnù envié via na mesura delicata en previjion dl restruturament: l trasferiment de jent atempeda da la Ciasa de Paussa atuala tla senta provisora tl hotel Diamant 400 m dancialà che à messù vegnì adateda, con nia pueces speises, per tò su la jent atempeda. Duc i comuns dla Val Badia à messù mete a desposizion na bela soma de finanziament y à spo ence aprové l projet de recostruzion dla ciasa. La provinzia de Bulsan sporj pro tamben sia pert per podei realisé la strutura nueva. Davia che la strutura é publica àl messù vegnì scrit fora l apalt di laours a livel europeich. Da chilò demez se à endere archité via dut, cie él pa suzedù?
Does é stedes les dites de costruzion: la dita Zimmerhofer da Turesc y la dita Bioc da San Martin, che à prejenté sies ofertes. La oferta plu albas fova chela dla dita Zimmerhofer da Turesc, davagnan l apalt. L preventif dla firma de costruzions Bioc da San Martin fova cotant plu aut de chel dla dita Zimmerhofer.
Atira dedò à endere la dita Bioc da San Martin de Tor prejenté n recurs. Doi recursc dla firma Bioc é ruvés enfin a la court plu auta a Roma. Y per chesta gauja él sen dut bloché.
Aladò dla lege pò la dita che ne à nia davagné l apalt fé recurs, che gaujeia samben cosc' y n enterdivament dl scomenciament di laours. Aladò dl president dla fondazion él atualmenter de gran problems davia che i cosć de afit tla senta provisoria é aumentés dassen y tl auter frabricat ne él dutaorela nia che và inant.
Aladò dles informazions atuales ne podarà bonamenter i laours de costruzion nia plu vegnì metus man chest ann. Chest é n gran dann, ajache an sà che la jent de temp adora sia lerch y dantaldut n ambient de na sturtura da se sté saurì y comedoula.
rt
Comunicat stampa Ladins Dolomites sun la chestion dla Ciasa de Paussa a San Martin de Tor
I laours pro la ciasa de Paussa a San Martin ne à nia ciamò metù man per gauja de n recurs prejenté da la ATI Bioc contra la ATI Zimmerhofer Hobag. Ladins Dolomites ti é jus do a la chestion de gran relevanza economica y politica y n zacotant de cosses ne é nia da capì.
Emprumadedut a cie moda ne é pa nience la pert de laours che an essa podù partì su te deplù pertes nia vegnuda scrita fora separatamenter per ti de la poscibelté a les dites dl post a tò pert?
Secont, la ATI Zimmerhofer Hobag à fat na oferta de aschesc 800.000 euro miourmarcé envers a la ATI Bioc Bau; al ne é nia da capì che la Bioc Bau de Paola Bioc Gasser, sourastanta dla SVP Ladina, feje recurs, davia che sciche al pèr él vegnù fat n fal formal da pert dla ATI Zimmerhofer. I maiours costimenc che vegnirà a se l dè jirà a peis de duc i comuns dla valada y dla provinzia y perchel se damana Ladins Dolomites che per l bon sens l recurs vegne trat zeruch, davia che fé sté plu die tla strutura dl Hotel Diamat nosta jent vedla é n at de puecia responsabelté.
Ladins Dolomites, l president Albert Pizzinini
