Albert Pizzinini, president nuef de LADINS DOLOMITES
Vize-president é Lukas Plancker - Statut nuef, sen peia endò via l laour politich organisé
Enseira, ai 8 de mei, él tomé a Colfosch la dezijion per n renovament dl Moviment politich LADINS DOLOMITES. An à tout la dezijion de varié inant y de ne se destudé nia via, enceben che con entourn n 20% dles oujes "ladines" da les ultimes lites provinziales dl 2008 fòven romagnus dassen do les aspetatives litales. La situazion politica encuei se ghira endere che al side n contrapeis y n partì politich che tole posizion sun les chestions de enteres di ladins che se prejenteia damprovia. Y te 4 agn, sce la Svp perd la maioranza politica ence tl consei, podéssel se daurì scenars nuefs.
A man ciancia: Dr. Albert Pizzinini, La Ila, nasciù ai 05.06.1976 a San Ciana, da La Ila, atualmenter a Persenon. De profescion dotour comerzialist y revisour di conc. Al ensegna economia aziendala al ITC de Urtijei.
A man dreta: Dr. Lukas Plancker de Selva/Gherdeina, de profescion avocat.
Do che l presidant dimiscionar Adi Demetz à saludé la gran cumpeida de jent vegnuda adalerch, él vegnù prejenté n valgunes relazions scialdi enteressantes. Atira do ésen passés a la discuscion y ala vela dl statut nuef dl Moviment Politich Ladins Dolomites che veid dant na reorganisazion y de mioures soluzions per l bensté dla jent ladina.
Dedò él vegnù lité a gran maioranza l president nuef tla persona de Albert Pizzinini, vizepresident é Lukas Plancker. Tl consei diretif él vegnù lité Egon Pescollderungg, Hans Trebo, Adi Demetz, Franco Doné, Livio Senoner, Walter Ploner, Milva Mussner, Ica Goller, Walter Kasslatter, Roland Thaler, Ivan Lezuo, Albert Pizzinini, Flavio Soratroi, Richard Ploner y Franz Fiung.
