Adalbert Tolpeit y sies creazions uniches

La mostra resta daverta enfin ai 14 de jugn dal mertesc a la domenia 

L Museum Ladin Ciastel de Tor à endò metù man sia ativité sajonala da d'isté. Con l meis de auril él da vedei na mostra personala de Adalbert Tolpeit dal titul “Design en liberté”. Adalbert Tolpeit laora desche fever artistich te sia fujina a Pederoa/La Val. Per descrive chesta ert particolara, podéssen tò ca n zitat dl conesciù artist norvegeis, Edvard Munch, che dijova bele dant da otana agn: “Tres mia ert ài prové da me sclarì la vita y sie significat...i à dagnora pensé y sentù che mia ert podova daidé d’autri …”.


I laours de Adalbert Tolpeit é concrec, da brancé ite, ma dandaldut da anuzé. Ti jan permez te na forma filosofica, cherieiel artefac originai, adoran con maestria deplù tecniches y materiai desvalifs, dal legn, al fer enfin al ram. Enscì ciafa forma meises, scagns, lums y fontanes, y microscultures sciche rocins, bracialec, fibles y e.i.; da fé chisc laours tòlel toc de legn che é damprò al vegnì desgorc o sciurés demez y i combineia con d'auter legn, con l ram o con l fer batù, sce al se trata de mobiliar.
Enscì ti dà Adalbert Tolpeit flé y vita nueva a cie che fova perdret ruvé a la fin de sia esistenza. Ma la cerna ne suzed nia per caje: l artist chier tl legn na storia, n’esperienza che side bona da ti ispiré l oget da inventé danuef y scona enscì ence n pue l ambient dal consumism caotich y dal sotissoura de refodam. La storica dl ert Danila Serafini scriv che: “Per Adalbert Tolpeit ne é l ornament dessegur nia na spaterleda de forza, daldutnenia, sia estetica decorativa é l motif prinzipal y le miol de cie ch’al costruesc. Al se tol a dì che al ne n’é nia na forma plu bela y perfeta de chela di ciofs, y perchel sourantòlel les formes da la natura canche al proieteia chaises longues dret modernes o lums dret demarevueia, olache la scemplité dla forma a ciampana ti fej da contrapeis ai conc statics elaborés per les posizions desvalives dl oget.”
I esponac de Adalbert Tolpeit é unics, toc fac demé un n iade, dalonc dai modiei per la produziun industriala de seria, ma con la combinazion anter l bel y l utl se embasta l am l artist de trasmete ence na vijion nueva dles cosses, che ciafa n auter valour, y chest tl contest abitatif y te chel dla paruda personala o belijia.


La daurida ofiziala dla mostra é steda ai 24 de auril y ala romagnarà daverta enfin ai 14 de jugn, dal mertesc a la sabeda, da les 10.00 a les 18.00 y la domenia, da les 14.00 a les 18.00. Lunesc sclut.