Enconteda con l vescul nuef Karl Golser
Karl Golser: ala ne jirà nia da reconesce vigni idiom de valeda, n lingaz scrit unifiché fossa dret d'utl - Sia cherta de ordinazion é per ladin standard
Ai 27.04.09 se à na delegazion dla Union Generela enconté con nost vescul Karl Golser a Bulsan. De chesta delegazion à fat pert la presidenta Elsa Zardini, Giovanni Mischí dl Istitut Micurá de Rü y Marco Pizzinini, vize-president dla Generela. Enratant la enconteda él vegnù rejoné de deplù argomenc che reverda i ladins, dantaldut dla doura de nost lingaz te gliejia. L vescul enstes à n gran respet per nosta mendranza y el à dit che al é sia intenzion, te sie puech temp lede, da mioré sies conenscenzes de nost lingaz.
Da man ciancia: Marco Pizzinini, l vescul Karl Golser, Elsa Zardini y Giovanni Mischì.
La situazion autala é chela che l lingaz ladin pò vegnì adoré "ad experimentum" tla Val Badia y te Gherdeina. Te chest contest méssen dì che tla Val Badia végnel adoré truep y te Gherdeina fòssel dutes les condizions da l adoré deplù. Te Fascia ne é l lingaz ciamò nia en doura ofizialmonte, ma al vegn adoré tres plu gonot ciodì che conzedù dal vescul de Trent. Tles gliejies da Souramont é la cossa dut autramenter, l ladin vegn demé adoré te na minima pert y can che la jent volessa l adoré spo végnel fat de gran dificoltés da pert dla gliejia locala o ence da la diozeja de Belun.
Le vescul se à desmostré dret informé sun la situazion dla popolazion dles valedes ladines y él à dit che el darà sie sostegn, per cie che é te sies poscibeltés, da porté inant la adoranza de nost lingaz te gliejia, tolan ence su contat con i vescui de Tront y de Belun. I tesc' che vegn bele adorés tla Val Badia y te Gherdeina podessa a poura nia vegnì touc ca desche fondamenta per les autres valedes ence per che al vegne garantì na certa unité. Atlò él dessegur l ofize linguistich dla Generela che se met a desposizion y ence i istituc Micurá de Rü, Majon di Fascegn y Cesa de Jan ne messessa avei nia decontra.
Elsa Zardini ti à ence conté al vescul la situazion particolara che se é gnuda a crié do la despartida de Ampez, Col y Fodom dal ann 1964 da la diozeja da Persenon. Chesta despartida ne á la jent mai azeté y sen che la gliejia locala prova da tò ju plan, plan vigni usanza o tradizion che podessa recordé al liam dla jent de Ampez y de Fodom con Persenon é la situazion ciamò plu pesocia.
L vescul à dit che al é daspavent emportant da respeté la volonté dla jent, souradut tles chestions de gliejia y che la esprescion de fede mess ester ledia da vigni empediment.
Ence l vescul à dit che la gliejia ne podarà nia reconesce ofizialmenter vigni idiom de valeda ma demé n lingaz scrit unifiché y chilò à el bele dé n segn te chesta direzion (sia cherta de ordinazion a vescul é per ladin standard), ence sce la parola definitiva ti speta te chesta chestion ai linguisc' y a la politica.
A la fin ti él vegnù sourandé deplù scincondes al vescul, anter chestes ence n liber che ilustreia la storia dla ploania de San Iaco te Ampez.
Chesta enconteda é dessegur steda emportanta per mete na basa a n dialogh costrutif anter diozeja y Union Generela.
