L ladin standard ne é nia n lingaz nuef, al ne é nia artifizial, al é saurí y obietivamenter na bona soluzion per scrive vigni idiom ladin te na forma unitara. Sen che i on metù man da l scrive nes onse entenù che al é plutost n adatament tla maniera de scrive y te valgunes formes, pian via dal idiom de valeda. N valgunes regoles basilares y al deventa enchinamai la maniera plu saurida per mete ju per scrit l ladin, con truep demanco azenc y segns particolars. Y an pò empò lieje sciche an é usés. Al é tamben n  arichiment, ajache i confins anter i idioms toma. An empara paroles nueves y an pò tò ite tl scrit chela o chel'autra parola dal idiom vejin te na maniera daldut naturala. Assolutamenter degun aplatiment di idioms donca. Ti proscims meisc pieta noeles.net na poscibelté en plu "Emparon deberieda a scrive ladin standard!" con n sistem on-line. I interessés pò bele sen se anunzié dantfora a la miscion e-mail: redazion@noeles.net enchina ai 15 de auril y ai giatarà na password per jì sun l sit http://www.noeles.net/e-learn. Ciutiede ite!

Les desferenzies anter idiom rejoné y scrit te LS é cotant mendres, an podessa ence dì nience da confronté p.ej. con l lingaz scrit tl franzeis o ingleis y l rejoné y daldut nia con i dialec todesc de Sudtirol y l "Schriftdeutsch". Dantaldut tla Val Badia, ma ence te Fascia, ésen usés a deplù idioms ladins (mareo-ladin-badiot, cazet-brach-moenat y e.i.i.) al intern dla medema valeda a desvalivanza de Gherdeina. Perchel ne se féjen nia n problem. L ladin standard ruva dret davejin a duc i idioms ladins y chesta é la gran forza dl standard. Desche dit ratonse chest vare important: sun vigni ciamp con interesc deberieda ciàlen de lauré adum y arjonje na union. Al é cler che i ladins davagna ence deforavia stima y consciderazion se prejentan con n lingaz scrit unitar.

Per se anunzié: redazion@noeles.net