benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Edema dla Cultura 2009
scrit ai 13 April 2009 da les 10:21:28 da noeles

Fascia

Edema dla Cultura 2009: La cultura é de duc

.... Tol pert ence Tu - Edema metuda a jì dal museo ladin de Fascia - Mostra sun la jent atempeda  

Image Hosting by PictureTrail.com Ence l Museo Ladin de Fascia tol pert a la XI Edema Nazionala dla Cultura metuda a jì dal Minister per i Bens y les Ativités Culturales dai 20 ai 25 de auril 2009. L slogan de chest ann “La cultura é de duc: tol pert ence tu!” vuel sotrissé la volonté de tò ite a na vida ativa i sentadins y les istituzions locales tles ativités dl Museo.

L Museo Ladin de Fascia donca vegnirà daurì debant dal lunesc 20 enfin a en sabeda 25 de auril da les 3 a les 7 domesdì, per ti dé l muet, a duc chi che vuel, de se arvejiné a la cultura y a les tradizions ladines dla Val de Fascia. Te chesta ocajion vegniràl metù a jì la mostra “Generazions visavì / Generazioni a confronto”, retrac realisés dai studenc dla Scola d’èrt “G. Soraperra” de Poza. Extrapede via per la setemana metarà a jì i Servisc Educatifs vijites videdes te Museo davertes a duc y atira do saràl trei scontredes che trata de tematiches desferentes ma cis enteressantes: l’astrofotografia, la cultura musicala ladina y en antepruma l filmat documentar sun Tita Piaz.
Program lunesc ai 20
da les 16.30 Inaugurazion de la Mostra “Generazions visavì / Generazioni a confronto” endrezeda da la Scola d’èrt de Poza, (daverta enfin ai 30 de auril 2009) con la partezipazion musicala dla Scola de mujiga “Il Pentagramma” de Flem y de Fascia
mertesc ai 21
da les 16.30 Vijita videda debant te Museo da les 17.30 “Mizàcoles de lum” – Scontreda sun l’astrofotografia en ocajion dl ann dl’astronomia con Claudio Balella
mercui ai 22
da les 16.30 Vijita videda debant te Museo
da les 17.30 “Dal Gartner a Encresciadum” – Tradizion e inovazion te la cultura musicala ladina con Renato Morelli
juebia ai 23
da les 16.30 Vijita videda debant te Museo da les 17.30 “Chel Diàol de Pavarin” – Prejentazion dl filmat documentar sun Tita Piaz Montibeller Film de Trent
Extrapede, via per l'edema, tl bookshop dl Museo, vegniràl sport les publicazions dl Istitut Cultural Ladin con n arbas dl 15% sun l priesc de souracuerta.

Mostra: GENERAZIONS VISAVÌ - GENERAZIONI A CONFRONTO - Spligazion dl projet da pert di autours
De gra al projet RSArt doi monds y does generazions desvalives à podù se scontré, la Scola d’Ert G. Soraperra de Poza y la Ciasa de Paussa per Jent de Eté de Vich. L percurs é sté maravueious y nes à dé l muet de conesce na realté desvaliva y scialdi n mudl dalonc da chela che de zenza nes vegn metuda dant vigni dì. Valch fiza, valch ann depllù, uedli segnés dal temp ma che à truep da conté, chest é cie che é laite tles operes che é vegnudes fates. L projet é vegnù metù dant tl an de scola 2007/2008, y al é vegnù envié via te does pertes: la pruma pert prevedova l “trasferiment” per valch ora a la edema, con papieres y lapisc, te Ciasa de Paussa per tò ju la jent atempeda. Do avei fat i aboc a na vida plutost spedienta (ence ajache i vedli ne ova nia na gran pazienza!) sonse vegnus de retourn te scola y tres l deidament de valch foto che ti fova vegnuda fata, onse comedé fora, se emprevalan de tecniches grafiches desvalives: lapisc, biro, lapisc cueecen, ciarbon, tusc, colours a ega y auter. Cò che i on finì de fé i retrac sonse piés via con la seconda pert che prevedova de laoré fora i studes grafics per i aodoré dedò da mete en ester les operes pitoriches con n tai n mudl personal y artistich. Nes emprevalan di dessegns onse realisé les operes adoran tecniches classiches desche tempera, acrilich, uele adum a materiai nuefs, desche spech, papier de sfueis, alumine y c.i. sun suporc desvalifs (tulins de legn, teila, sach, carton, plexiglas y ghips). La mostra met dant i retrac, touc ju dal vif, dla jent de eté, valch particolar dl mus traté o tout fora dai retrac, les sperimentazions pitoriches desche operes y na lingia de fotografìes di momenc de laour. De gra a la colaborazion dl’Union di Ladins, de dezember dl 2008, con les operes dl projet él vegnù fat l Calender Artistich a numer limité, che é vegnù prejenté ofizialmenter tla senta dla Ciasa de Paussa per Jent de Eté a Vich.
Classa IV A de l’Istitut d’Ert “G. Soraperra” de Poza:
Baiocco Davide, Brugnone Francesca, Cigolla Veronica, Comelli Tommaso, Degasper Michele, Deluca Monica, Donati Luca, Grasser Braian, Lazzeri Alice, Morandini Ilaria, Murer Mattia, Sottsass Maria, Zanon Jenny, Zorzi Alessia, Zorzi Cristina, Zorzi Katrin.
Ensegnanc: professora Lara Steffe, professor Claus Soraperra.


 
Liams emparentés
· Deplú sun l tema Fascia
· Chier te noeles


L articul plu liet te chest tema Fascia:
Publicazions nueves: biografia sun Tita Piaz


Valutazion dl articul
Cumpeida mesana de oujes: 0
Oujes: 0

Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.403 seconc