Noeles.net - Informazion ladina - I set comuns dla val de Fascia y si toponims

Na val, sie lingaz y si toponims

Prejentazion dl X volum dl Dizionar toponomastich trentin en vender ai 30 de jené tl museo ladin de Fascia

Al é vegnù fora l X volum dl "Dizionario toponomastico trentino: I nomi locali della Val di Fassa", componù da trei libri, olàche al é abiné passa 8.000 inoms de luech di set comuns dla val: vol. I Moena y Soraga, vol. II Vich y Poza, vol. III Mazin, Ciampedel y Cianacei. L volum é vegnù metù adum do n laour lonch de enrescida, porté dant dal Istitut Cultural Ladin y da si colaboradours locai per cont dla Provinzia Autonoma de Trent, con l obietif de registré i toponims ladins y de stabilì sia grafìa ofiziala: nia demé i inoms di paisc y i macrotoponims, ma ence i microtoponims che se referesc a prés, ciamps, bosc, rufs, stredes y trois de bosch y e.i. .

N laour che dà l muet de tegnì adiment l’arpejon di inoms tradizionai, che scenó te n mudl de caji podessa vegnì destrabonis a cajon dl arbandon dl laour ti ciamps y ti bosc.
L stude à permetù ence de mete ju l “Repertore di toponims ladins”, strument ofizial prevedù da la lege provinziala, che met dant la dreta denominazion ladina dl raion fascian, con chela che i Comuns dla val à podù mete a jì a la dreta odonomastica, schecondì la denominazion dles stredes y di plac di paisc.
L volum porta dant na introduzion geografica, storica y linguistica n mudl menuda, che dà l muet de entene ti detais l cheder de referiment dla toponomastica ladina fasciana con sies particolarités y sies conotazions spezifiches.
Apede chesta rica documentazion tròen ence dodesc chertes topografiches realisedes aldò, olàche al é amarscé duc i toponims.
Per fenì, l’opera met dant n bel aparat fotografich con retrac de aldidancuei y da zacan che ti sporj ai letours na selezion di luesc de maiour emportanza.
La Provinzia autonoma de Trent y l’Istitut Cultural Ladin prejentarà ofizialmenter la publicazion en vender ai 30 de jené tl Museo Ladin de Fascia a Vich da les 5 da seira. al rolarà pert Franco Panizza (Assessour a la Cultura, ai Raporc europeans y a la Cooperazion dla Provinzia autonoma de Trent), l dr. Fabio Chiocchetti (diretour dl Istitut Cultural Ladin “majon di fascegn” y curadour dl’opera) y l prof. Guntram A. Plangg (Institut für Romanistik – Universität Innsbruck). (eb)


Vos ne seis nia loghé ite. [ Loghé ite ]