benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Luigi Chiocchetti: develpai litadoures y litadours
scrit ai 28 November 2008 da les 18:17:08 da noeles

Politica

Luigi Chiocchetti: ston adum per avei plu peis!

La deventa dla UAL pro les lites provinziales de Trent y la proscima legislatura 

Image Hosting by PictureTrail.comI svilups politics te Fascia, la deventa dla UAL (Union Autonomista Ladina) pro les lites provinziales 2008, la creazion dl Comun General de Fascia, l certl lital rejona cler: te Fascia ésen politicamenter n vare plu inant che tla provinzia de Bulsan. I ladins de Fascia pò se raprejenté autonomamenter tres n sie partì y i fascians podova enfinamai lité sie raprejentant dret democraticamenter anter does listes con passa 70 candidac. L conseier provinzial Luigi Chiocchetti tol posizion do l suzes lital dla UAL y met dant sies vijions per i agn che vegn.

 



Luigi Chiocchetti: "I pense che al sie plu che giust ti sporje n develpai de cuer a dutes les litadoures y a duc i litadours che en ocajion dles lites provinziales di 9 de november à confermé sia fiduzia a la Union Autonomista Ladina dàn desmostrazion de creie tl projet che é vegnù svilupé ti agn passés y che ie entene porté inant tla legislatura che é do a se daurì.
Les litazions à dé conferma dla validité dl projet porté dant da la Ual che vuel seghité a ester, tres deplù, n Moviment dl teritore che posse raprejenté dassen i valours y i enteresc dla comunanza fasciana per regueie entourn a chisc valours na condivijion popolara auta y lergia.
A chest enjonti apede n develpai de cuer mie personal per l consens gaiert che la comunanza me à palesé: per me él rejon de gran sodesfazion ma, tl tò su l envit a mete en juech n empegn ciamò maiour y plu fon, te duc i setours, y a dé mie contribut tles istituzions provinziales y regionales per l ben de mia comunanza, deventa ence na gran responsabelté.
Al sarà n mudl de cosses da fé ti agn che vegn, desche i on bele dit plu outes endana la campagna litala, per mete a jì l davegnì dla val y per renforzé i gran resultac arjonc tl curs di agn tres la azion politica forta y segura dl’Union Autonomista Ladina.
Ma cie che me spenj mete en cler sen che al se deura la legislatura provinziala nueva é l debujegn de jì inant do n percurs che porte inant n projet per Fascia che dae l muet de envié via corespondenzes sibe tla val che foradecà, claman a una duta la comunanza. Tl zenter de chesta azion politica vàl metù la Comunanza, che va entenuda no bele desche n grup de jent ma desche n sistem de relazions positives anter persones che spartesc na storia, n sistem de valours, n teritore, na economia y che adum vuel mete su sie davegnì.
Les gran endesfides che speta Fascia ti agn che vegn, da la costituzion dl Comun General de Fascia a l’atuazion dla reforma scolastica, dai entervenc tl ciamp sozial a chi per l svilup economich, da les strategies per la gestion dl teritore a cheles per n turism nuef tres plu lié a la calité, va toutes en ejam metan a jì convergenzes, unité y comunité tla val: al vuel sté adum valorisan l contribut de dutes les capazités, les forzes y les inteligenzes dla comunanza. Apede chest, ne pòn nia fé condemanco de renforzé l valour positif de nosta identité; na identité che se reconesc ti prinzips y ti valours che troa sies raijes tla storia, tl lingaz, tla cultura y tla tradizion cristiana dla comunanza de Fascia.
Donca n empegn a fé, deberieda, per ruvé a dezijions ascortes y coerentes con dut chest, ma tl medem temp con la cognizion che l patrimone uman y sozial mess ester bon de respone a les spentes de renovament frut di temps moderns.
Chest é l significat de na azion politica entenuda desche “servisc” a la comunanza, na azion che ne é nia de “dreta” y nience de “ciancia” ma outa a respone ai debujegns de na comunanza per l ben de duc, per n svilup sozial y economich armonious y dret che ne lasce fora degugn.
Con i 9 de november podonse dì che al se à saré n zicle. Les litazions à fat vegnì fora energies y ressurses neves, jent joena che à vueia de laoré, gaissa che va regoiuda y pascenteda.
L confront proponù da les femenes y dai omegn dla Lista Fassa é da entene desche na oportunité per tò su i elemenc positifs vegnus fora da les discuscions fates fora per duta la longia campagna litala.
Duc à da se sentì pert de utl per mete su l davegnì dla val. L confront y l dialogh messarà ester les coordinedes che compagnarà l empegn di meisc y di agn che vegn.
“Dovete aprire porte e finestre al confronto (I messeis daurì les portes y les finestres al confront)” ti à dit a la Ual l president Lorenzo Dellai en ocajion dla festa steda a Poza do les litazions per saludé l bon ejit dles lites: n envit che i ne podon nia schivé y che, apontin per cie che vegnù dit dant, sonse avertis a onoré.
Donca sonse duc clamés a n gran empegn y a na responsabelté forta, l’Union Autonomista Ladina, l Conseier provinzial, les istituzions, dutes les componentes soziales y economiches dla val, i joegn, con n obietif soul: chel de mete a jì, deberieda, l davegnì de nosta tera, ti fajan onour a cie che ai nes à dit i litadours con sia ousc: sté adum per avei plu peis y plu forza."

 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 0
Oujes: 0

Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: Luigi Chiocchetti: develpai litadoures y litadours (ponc: 1)
da Claudio ai 28 November 2008 da les 19:32:55
(Infos sun l utilisadour | Ti mané n messaje privat)
Fascia à n certl lital per sie cont, cie che ti permet a d'avei na politica plu autonoma envers Trent. Sce do chestes lites se vegn i partis tla provinzia de Bulsan da mete su n lim lital (sbarramento), ence sce na sentenza costituzionala ti à dé rejon a Carlo Willeit dl 1998 y che à tegnù su enfin a encuei la lege de lita proporzionala, ti scòncel demé dret ai ladins che à lité a maioranza n candidat Svp metù dal aut ju.


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.388 seconc