Degun ladin desche vize-president dl consei
Ajache al ne é nia 2 raprejentanc ladins - Les conseguenzes dassen negatives dl resultat lital tles valedes ladines de Badia y Gherdeina
Encuei onse abù la pruma desmostrazion dles conseguenzes dassen negatives dles litazions tles valedes ladines. Florian Mussner à renunzié a la enciaria de vize-presidenza dl consei che ti speta a n ladin. N secont raprejentant ladin tl consei ne él nia, sceben che n ladin essa l dert de corì chesta enciaria. A Mussner ti vegniràl plu dessegur endò sourandé l assessorat ai laours publics y scola y cultura ladina. Sciche president él vegnù lité, con apeina 20 oujes sun 35, Dieter Steger (Svp) y provisoriamenter Barbara Repetto (PD) con la maioranza minima de 18 oujes desche vize-presidenta taliana. Bele al scomenciament dla legislatura, pro la pruma senteda dl consei, veiden enscì che la vela de n secont raprejentant (de Ladins Dolomites) essa podù jié na funzion zentrala de aodla pro la stadiera politica, ti dan gran visibelté a la mendranza ladina, eventualmenter ence stan da la pert dla Svp che essa abù demé 17 scagns tl consei, empede 18 da sen che ti assegureia na maioranza dret angosta de 1 n scagn.
I desvantajes de na sotraprejentanza ladina tl consei ne se ruva nia chilò. Te n grum de autres comiscions manciaràl enscì tamben n raprejentant ladin (p.ej. comiscions legislatives). L pont "na maiour raprejentanza" tles enciaries autes y tles comiscions fova un di ponc programatics plu emportanc de Ladins Dolomites, ajache sun na popolazion declareda ladina de entourn a 20.000 persones ti spetàssel zenzauter n secont raprejentant tl consei. I litadours ladins de Badia y de Gherdeina ne à endere nia vedù ite la emportanza y ti à out l spinel a chesta prospetiva. Da enjonté él ence che 2 raprejentanc ladins lités tl consei essa volù dì na raprejentanza de dert tla jonta y nia de plajei desche al é con la enciaria a Mussner.
