"Di dl’ela", paroles dla raprejentanta Dolores Dariz

En ocajion dl “Di internazional dl’ela” recorda les eles de dut l mond i trueps sforc che ales à messù fé per ruvé pro si derc tla vita privata, soziala, politica y economica. La parité de chances y la valivanza de derc anter el y ela ne é enfin encuei (2003) te trueps setours dla vita soziala nia ciamò arjonta. Les eles adora perchel inant l “Di dl’ela“. Al dess ester n segnal per l impegn per eliminé les formes desvalives de descriminazion y de sotmiscion che se manifesteia tres endò.

En chest ann végnel recordé dantaldut les eles con n handicap. Al sarà perchel
nost impegn de daidé cherié tla sozieté cheles condizions che ti empermet ence a eles con handicap fisich da podei se mueve y conduje na vita con dignité. En ocajion dl di 8 de merz de chest ann vuelen ence pensé a la situazion dles eles tl Afganistan, a cheles che al ti é vegnù tout oramai duc i derc  y che à messù se sotmete a de gran violenzes y meltratamec. Sot chest aspet merita l “Di dl’ela” na conscidrazion, ma ence na reflescion particolara. Chest “Di internazional dl’ela” auda perchel da resté, y da vegnì tout su sciche na ocajion de reflescion per i trueps caji olache l’”ester ela” comporta te nosta sozieté moderna dutaorela desvantajes y impedimenc soziai.

Dolores Dariz
Presidenta dla Consulta per i Problems Ladins y aconsiadoura dla Lista LADINS tl Comun da Bulsan)