La UAL bat "Fassa"

Luigi Chiocchetti raprejentarà ence ti proscims agn i ladins de Fascia tl consei provinzial a Trent 

Les lites tla provinzia de Trent de enier (09.11.2008) é stedes n suzes per la UAL (Union Autonomista Ladina) che à abiné adum l 54,03% dles oujes te Fascia. Tamben n suzes per la lianza de zenter-manciancia de Dellai che per Dellai personalmenter, davagnan con l 59,99% dl consens per sté inant tla enciaria da president a livel provinzial. Pro les preferenzes sun la lista dla UAL ti l'à sticheda l assessour Luigi Chiocchetti con 1.519 oujes, de pueces oujes, dant da Bepe Detomas con 1.456 oujes. Na bela desmostrazion de democrazia interna a la lista dla UAL. Al 26,63% dles oujes se à depierpul archité l consens dla lista de zenter mandreta "Fassa" tl certl fascian, perdan enscì la endesfida contra la UAL. Perdù à l zenter mandreta, abiné entourn al candidat da president Sergio Divina, ence a livel provinzial, ruvan sun encer l 36% dl consens. La deventa dla UAL y la lita de Luigi Chiocchetti é na garanzia che la chestion de na majera unité ladina y l lingaz scrit unifiché romagnarà ence ti proscims agn, almanco tla provinzia de Trent y a livel regional, sun la ajenda politica.

N "njet" depierpul dal assessour Mussner tla provinzia de Bulsan a chestes does chestions vitales per i ladins (referendum da souramont y lingay scrit unifiché) da cheles che al se para desche l malan da l'ega santa.

I ladins fascians podova lité chest iade anter 70 candidac partis su sun does listes. Chest é l resultat dla istituzion dl certl lital de Fascia che ti garantesc al candidat fascian lité con la majera cumpeida de oujes de preferenza, de ruvé tl consei provinzial. N tel certl lital, che ti garantissa na majera democrazia a la mendranza ladina empede messei jì a "patron",  fova ence una dles propostes  mai realisedes dl MP Ladins tla provinzia de Bulsan.