benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

LADINS DOLOMITES: na pruma analisa dl resultat
scrit ai 07 November 2008 da les 18:40:27 da noeles

Politica

Na ousc critica vuelel ester inant

Dantenier se à LADINS DOLOMITES abiné per fé na analisa dles lites - Degun sostegn publich per la lista tla campagna litala 

Les ultimes lites à desmostré che al é demé plu ca. 20 % di Ladins che crei te ideai y no demé tla boursa di scioldi, sceben che la boursa di scioldi ne foss dessegur nia vegnuda penaliseda sce LADINS DOLOMITES essa arjont n mandat. Un n ejempl soul: I Ladins à ciafé ti ultims 10 agn demé l 2 % di scioldi per l frabiché che la provinzia à paié fora, sceben che ai fej fora l 4,37 %. Sun 690 milions de Euro paiés fora (cf. Dolomiten 4/5.10.08, pl. 13) é chest n defizit de 14 milions a dann di Ladins – chestes é somes cotant plu granes di pici contribuc che é vegnus empermetus al ultim moment per tré les oujes… .

 



20 % de oujes per na lista ne é nia puech. Ma 20 % de oujes ladines ne basta mai per n mandat. Con en proporzion cotant manco oujes (ca. l 10 % ti comuns todesc) à endere Eva Klotz arjont 2 mandac. Chesta é la desfarenzia anter la “gran” y la “picera” mendranza te nosta provinzia.
Al é zenzauter sté dret da candidé – enscì él almanco vegnù mobilisé i litadours y la discuscion.
Ma sce al é da emparé valch per l davegnì, spo veiden cler che na candidatura ZENZA DEGUN SOSTEGN da pert dla opinion publica ne à deguna poscibelté.
Depierpul che l HGV (Union di Ostiers), Union di paurs, Union di artejans etc. etc. – sceben che al se trata dut de lies APARTITICHES aladò de sie statut – é sautés da ciasa a ciasa per si candidac todesc, ne à degugn, ma veramenter degugn (tout fora Hilda Pizzinini) tout posizion publicamenter per la lista LADINS DOLOMITES. Les idees y i candidac de nosta lista ne fova dessegur nia tant sclec che an ne essa nia podù tò posizion. O é les unions “ladines” (unfat de cie sort) demé chilò per scuté y fé cie che l gran partì comana? I ombolc todesc colegs de Noggler y de Schuler à sostegnì chisc 2 candidac, ne essa chi dla Val Badia (duc lités sun listes ziviches y no de partì) veramenter nia podù dì na parola per sie colegh Pepi Dejaco?
I on ence fat la esperienza che l gran partì à fat dles dutes per tegnì ju nosta lista. A Al Plan p.ej. él vegnù su l rejoné, che an ne essa nia plu ciafé l “Giro d’Italia”, sce an essa sostegnì nosta lista. Tl’Alta saràl sté l medem con la Copa dl Mond.
Contra de tel “argomenc”, unfat tant mentis che ai é, ne jova degun idealism. Chi che volova protesté, à spo lité diretamenter i “Freiheitlichen”.
Manifestazions, olache candidac dla lista LADINS DOLOMITES essa podù/messù rejoné, é vegnudes sburledes a do les lites. Da l’autra pert à (un n ejempl de trueps) na candidata dla Steila de Mont podù rodé fora per la Val Badia con referac sciche al fossa sté manifestazions ofiziales dla scola, depierpul che al fova demé sia propaganda privata.
L gran foliet “Dolomites” à na vijion particolara de “par condicio”: nience un n comunicat stampa dla lista LADINS DOLOMITES n’é vegnù publiché. Ma sen nes végnel trat dant bel da chela pert na campagna agressiva?
 
Cie fé sen?
Na ousc critica devers dla politica provinziala ladina vuelel ester inant. I Freiheitlichen à pu bele dit che ai ne desfarenzieia nia anter todesc y ladins sun truepes tematiches (USC 1.11.08, pl. 8), che al é problematiches cotant plu emportantes che cheles ladines (USC 18.10.08, pl. 7), y te duta la discuscion tla SVP do les lites ne é i Ladins mai vegnus nominés. Ai à pu lité “dret”!!!
Ma i vedaron sce duc chi partis che à empermetù da fé dut per i Ladins l mantegn ence. I conc de chest vers vegn fac te 5 agn.
Da nosta pert volessanse ti dì dilan a duc chi che à cherdù te nost proiet, dantadut a chi che nes à empò dé la ousc, a chi che à abù l coraje da candidé (y coraje da fé n tel vare vuelel ester, chel àn vedù), y n dilan fort ence a Pepi Dejaco, che à rischié l plu.
I candidać dla Val Badia de “Ladins Dolomites”

 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 5
Oujes: 6


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.421 seconc