benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Na odleda inant: n comentar a les lites provinziales
scrit ai 02 November 2008 da les 17:00:43 da noeles

Politica

La ultima legislatura da assessour de Mussner?

Chestes lites provinziales é stedes ence na desfata per la Svp, 2.000 oujes ti à salvé la maioranza tl consei - Les previjions dij che ala podessa perde inant 

An ratova che l referendum da souramont essa podù ti dé na sburla nueva al moviment politich ladin autonom, evocan ence l prum moviment Zent Ladina Dolomites. Encandenò à l resultat lital di 26 de otober tla provinzia de Bulsan desmostré l contrar. Al ne fova nia na chestion che à muet les coscienzes. Chest enceben che la costelazion politica atuala ti essa permetù a Ladins Dolomites na poscibelté de deventé na odla dla stadiera con n sie raprejentant a Bulsan. La maioranza dla Svp se à dassen restrent do avei perdù l 7,5% dles oujes, toman al 48,1% dl consens.

 



La Svp à apeina, apeina podù mantegnì la maioranza tl consei de Bulsan con 18 conseiers de gra a n mandat de rest. Te chest à ence chel pugn de oujes da les valedes ladines daidé pro. Les previjions per les proscimes lites provinziales é che la Svp posse perde inant consens. Karl Zeller rata enfinamai che ala podessa calé a 35-40% dai 48,1% da sen. Cie fej pa i ladins spo? Vegniràl mo cherdé da foradecà n assessour ladin desche enlaouta. Bonamenter nia, sce la costelazion politica se muda y sce an rejona bele sen de restrenje la cumpeida de assessorac. Podessa pa ester chesta la ultima legislatura de Florian Mussner?
Dl 1993 (Wolfgang Malsiner) y dl 1998 (Werner Stuflesser) fova i candidac ladins dla Svp tomés tres. Al ti manciova l assessorat con i scioldi de uega laite. Dl 2001 se à endere la Svp lascé tomé ite la idea de tò ite n assessour ladin da foradecà tres na clausola metuda ite ad hoc tles normes de mudazion dl statut de autonomia per ti fé la gambarela a la lista Ladins. N vare fatal per l moviment politich Ladins l'avei deda pro. La Svp à enscì podù ti garantì gran visibelté a sie candidat, Florian Mussner, l enciarian con i laours publics. Ma al podessa ester sia ultima legislatura, almanco te chest ciamp. Tl consei atual é la oposizion todescia raprejenteda tres 8 conseiers. I Freiheitlichen noda inant tl suzes y pro les proscimes lites podéssela jì inant con la erojion dla Svp che é bele sen atira do les lites n scenar de stritaries reventes entourn al obmann Pichler Rolle y nia demé. La ala soziala é tamben vegnuda penaliseda dassen. Aladò dles analises ti à souradut laoranc dé la ousc ai Freiheitlichen. Dl 2013 darà Durnwalder ju sia enciaria, na autra situazion critica per l partì, n vuet politich.
Te n scenar nuef, olàche la Svp à perdù la maioranza tl consei, él bonamenter plu rie che an cherde da foradecà n assessour ladin che é demé na poscibelté opzionala, tant deplù che an mess fé i conc con d'autri partis dla coalizion. I laours publics ti fajarà dessegur gola a deplù pertes politiches. Ciodì ti lascé n tel trampolin a Mussner? Mussner à ciafé la maiour pert dles oujes da litadours todesc, cie che la dij longia sun les poscibeltés politiches de chesta enciaria.
I ladins à lité chest iade endò a maioranza Svp. A Pepi Dejaco (n iade vize-obman ladin dla Svp) ne ti él nia garaté de tré demez oujes da la Svp. Faleda fova la minonga che almanco na pert dla Svp dla Val Badia se essa metù sun sia pert o che ala se essa recordé de sies raijes te "Zent Ladina Dolomites". De chest nience na pedia. An à depierpul scraié fora Dejaco, ti metan ti ciauzés "rejons personales" empede ti sté permez. La "venta politica" de lité chest iade Svp y de sbaufé l moviment politich autonom podessa se revelé de curta veduda, sce al entravegn chestes mudazions politiches te Sudtirol.

Al mancia ti proscims 5 agn l peis de na raprejentanza dopla a Bulsan che essa podù mete sun meisa y tematisé n grum de chestions davertes: proporz elastich, na raprejentanza ladina tles comiscions plu emportantes (p.ej. toponomastica), la vize-presidenza tl consei, trasmiscions radio-tv ladines, na aplicazion plu ampla dl lingaz ladin a livel provinzial etc. dut cie che l raprejentant dla Svp ne fajarà nia, desche al à desmostré ti ultims 5 agn. Nience da rejoné spo dl referendum da souramont olàche al se à declaré do les lites ciamò plu decontra.  An veid che pro chestes lites à pesé  l contribut per les gares de Copa dl Mond o la realisazion dles  stredes cotant deplù che la aspirazion a na raprejentanza ladina plu sterscia.


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 3.75
Oujes: 4


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: Na odleda inant: n comentar a les lites provinziales (ponc: 1)
da Jan ai 02 November 2008 da les 20:26:09
(Infos sun l utilisadour | Ti mané n messaje privat)
De curta veduda al 100%. Les dependenzes de bona pert dla popolazion ladina da n sistem politich fret à ciafé dimensions critiches. Tratant che te dut Südtirol s'à outé l vent, tratant che la jent à metù man a se descedé da l endormia, pesimeia la Ladinia ciamò y se fej inant pascenté da n aparat politich zentralistich, elitar, puech democratich y fondé sul clientelism - mpe de se mete finalmenter sun sies giames. Te chest à i gherdeines desmostré plu maturité politica di badioc. O arbandonarapa chisc ladins "fedei" l bastiment puech dant che l vae sot?


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.375 seconc