benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Lites provinziales 2008: na desfata che fej mel
scrit ai 27 October 2008 da les 16:29:04 da noeles

Politica

Na desfata che fej dassen mel

Mussner à amplié sies preferenzes pro i todesc, perdù pro i ladins - Paradossalmenter é ence sia enciaria da assessour na arpejon politica dl MP Ladins -  Ciunes é pa stedes les rejons che à spent litadours di Ladins a arbandoné l partì endò de cenc? - La informazion ne à nia mancé


An savova che ala deventova strenta y ria per LADINS DOLOMITES, ma ala é vegnuda true piec che an se aspetova. Les oujes ciafedes é judes ju n pue endlonch, aluesc ence soura l 10% (Badia y Corvara, n iade seves dl moviment). Na desfata litala che amarsceia bonamenter per n iade na ensciautrida dl moviment politich ladin autonom organisé da chela che al sarà rie endò levé su. Dl auter vers à la Svp arjont tles valedes ladines un de si miours resultac a livel local depierpul che a livel provinzial àla perdù dassen ai "Freiheitlichen". La Svp é per la pruma outa sot al 50% dles oujes, a 48,1%. Mussner à amplié sie rai de preferenzes pro i todesc - cie che la dij longia sun les poscibeltés finanziares de sie assessorat - y al pò se tò a dì de ti avei salvé la maioranza a la Svp tl consei, enceben che la Svp y el enstes (-542 preferenzes) ae abù de lesiers zedimenc tles valedes ladines toutes adum. La domanda che an se fej: ciodì à pa tanc lité Svp y tant puec Ladins Dolomites? Con 3.334 oujes o l 1,1% ésen restés cotant viadò les aspetatives y les poscibeltés de arjonje n mandat de rest. Al essa volù en ester entourn a 6.000. Les rejons y les gaujes pò ester n grum.

Cler él che puec à fat i conc: ti dé la ousc a Ladins Dolomites per arjonje n secont raprejentant a Bulsan con n mandat de rest. N peis dopl tla legislatura che vegn. Chest messaje ne é nia vegnù tout su o capì dai litadours. Valch oujes deplù endere avisa spidicedes su a d'autri partis: Freiheitlichen, demanco ai Verc. LADINS DOLOMITES à cialé de fé na bona campagna litala con si puec mesi a desposizion, pian via dal nia: chertes con les rejons lassoura, placac y reunions. Baudi ne se à nia trueps tout la bria de lieje avisa les rejons tl cogol de material de reclam che é ruvé te vigni ciasa dant les lites.

Do l fat ne él nia plu consei, ma spligazions végnel empò chirì: fosc l'àn touta massa saurida con chesta lista a "cef dopl": Dejaco y Goller, zenza che degun candidat se profilassa endretura desche "prum", fosc ne se àn nia destanzié assé da les posizions dl assessour Mussner dla Svp o che valch candidac é vegnus sburlés massa alalesiera sun lista per fé grum. Certes prejentazions de candidac tla televijion ne fova dessegur nia bones. Valch auter ne ti ova nia creta a Dejaco, ajache al vegn ca da la Svp o che i promotours de Amisc dla Ladinia unida ne se à nia profilé te posizions plu dantcà. Ma dut chest ne spliga nia dut. Cler él sté che tematiches porì ladines (referendum da souramont, na miour sconanza y raprejentanza dla mendranza ladina, lingaz scrit unifiché, unité di ladins etc.) ne à nia descedé y ne desceida nia plu chel gran enteres pro i litadours, rejons nobles ma de puech resson lital tl 2008. Dl 1992 fova l MP Ladins zapé ite tl vuet lascé endò da Hugo Valentin (Svp) con Carlo Willeit, candidat profilé y conesciù. A d'el l merit de avei tegnù su la poscibelté de lita tres l sistem proporzional y vedù doprò l fal de ne avei nia fat oposizion a la cherdeda opzionala de n assessour ladin da foradecà da pert dla Svp. Dl 2003 y sen dl 2008 messova na lista ladina tegnì cont dles gran ressurses finanziares de cheles che n assessour pò despone per tré les oujes sun sia pert: Mussner, assessour ai laours publics, na enciaria strategica  y prestijousa, l assessorat con l plu mesi finanziars. Mussner, cherdé enlaouta dant les lites dl 2003 da Durnwalder y senté sun chest scagn, ne à nia sparagné empera, stredes, zirconvalazions, finanziament dles gares de Copa dl Mond te Gherdeina y Badia, empermetudes de finanziament a mandreta y a manciancia con i scioldi dles coutes. Valch che Ladins Dolomites - con les gaiofes vuetes - ne podova ti empermete a degugn, ajache l moviment raprejenteia n moviment politich-ideal. Les valedes ladines à cialé a curta veduda, al profit atual y nia a longia veduda, al profit y ben general di ladins tl davegnì (na miour sconanza). Paradossalmenter auda propi ence l'enciaria da assessour de Mussner pro la arpejon dl Moviment LADINS, Valentin ne fova mai vegnù cherdé a fé pert dla jonta (a pert dl temp de Langer che se ova declaré ladin). Per entratant n iade - vedù la caleda de oujes - ne ciafia bonamenter n moviment politich ladin nia da sfioré su endò tant atira, poester empermò canche la Svp é do a perde la maioranza tl consei provinzial a Bulsan, enlò messarà ence i ladins mudé "patron" o se mete enstesc endò en pé. Sce al pò ester de consolazion: Ladins Dolomites é empò ciamò la seconda forza politica, ence do chesta sanlasceda, do da la Svp tles valedes ladines.  I resultac pòn cialé do tl detai sun http://www.provinz.bz.it


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 3.75
Oujes: 4


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.402 seconc