benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

N comentar entourn al temp prelital
scrit ai 21 October 2008 da les 18:30:00 da noeles

Politica

Certes temes ne à deguna fondamenta

Avei n secont raprejentant tl Consei Provinzial de Bulsan é propi l minim che i podon pretene, liton perchel "LADINS DOLOMITES"

Con dutes les oujes dedes a la SVP ne aronse mai 2 raprejentanc tl Consei provinzial. El meso che i ladins ne veide nia ite chest?
En gaujion de chestes lites él ence nasciù n partì de recoiuda ladin, no  todesch no talian, ma ladin: LADINS DOLOMITES, na sort de SVP, la "Sammelpartei". Sce la "Lista ladins" da denant recordova a zachei n pue la vedla   "DC", pòn sen dí che l moviment nuef "Ladins Dolomites" con la partezipazion ence de n setour dla Svp, raprejenté dal candidat Pepi Dejaco,  sie veramenter garaté n partì autonom y davert a duc, n partì de recoiuda. N partì che vuel ester la esprescion nueva dla coscienza politica ladina,  souraldut miran a la gran reunificazion dla Ladinia.

 



Te n rejim democratich  mess ester na tel reunificazion poscibla sce la popolazion se la damana. Con chest ne volonse nia dí che i ladins che liteia SVP ne sie nia ladins, ma ei ne é nia ladins de coscienza ajache ei liteia SVP demé per enteresc personai, ai liteia todesch demé per ne perde nia valch contribut  Chest veiden cler da cerc inserac tl sfuei "Dolomiten"  (Wir brauchen einen starken Durnwalder) da pert de persones che ne à nience na raisc ladina y che pensa demé a si "afars". Sce per avei contribuc, che ti speta a duc chi che ne à debujegn, messonse lité SVP, spo él ben cler che chest partì abuseia, adora mel sie podei, a vantaje de si amisc. Degugn ne nieia che la SVP ae meric particolars per cie che reverda la defenuda dl'autonomia, ma chesta autonomia fossa dessegur plu sterscia y segura sce i ladins essa daidé pro con n sie partì autonom, con si raprejentanc, empede de scuté y se lascé raprejenté dai todesc.

Sce an é ruvés al pont che la SVP pò se cherdé ite n raprejentant ladin y fé cie che ela vuel empera (souraldut ne podaràla mai fé na critica desche al é suzedù), spo él ben cler che al mancia na coscienza politica ladina. Ence l progres economich fossa sté maiour con na bona raprejentanza ladina autonoma. Dessegur ne fòssel nia suzedù che la Val Badia essa messù aspeté enfin al 2007 y 2008 per avei na streda valgamia endretura (L toch che và da Longega a Picolin ne é dessegur nia ciamò endretura). Sce sen messonse scraié y scrive a defene Durnwalder, spo él propi segn che i ladins ne conta dutaorela nia. Avei altamo n secont raprejentant ladin tl Consei provinzial y che sie veramenter esprescion dla volonté ladina y no demé de n'acordanza con la SVP, chest é propi l minim che an pò pretene. Ma ence chest é demé poscibel sce i ladins tegn adum y ti dà la ousc a "Ladins Dolomites". Con dutes les oujes dedes a la SVP ne aronse mai doi raprejentanc tl Consei provinzial. Poscibel che i ladins ne veide nia ite chest?
Ma cie che é ciamò piec é la tema che an veid y che an aud entourn, la tema de rejoné dl nuef partì, de "Ladins Dolomites", n titul che fej clermenter referiment a la Ladinia unida, la tema de l sostegnì publicamenter  con discuscions davertes y con entusiasm. Publicamenter pò i ladins fé demé does cosses: propaganda per la SVP y folclor y festes. L cervel ladin mess scuté.


Na cossa nience da creie tant albas che i son ruvés.  La Gliejia, la scola, les unions culturales, soziales y n grumon d'autres dla popolazion todescia  fej reclam per la SVP, chela y cheles ladines net nia per n partì ladin. Al pèr diretamenter proibì. An é dant a na mentalité y coscienza ladina completamenter desdruta. Chesta la conseguenza de 60 agn de raprejentanza dla SVP. I todesc dess tegnì adum y ti dé inant la ousc a la SVP y no a chi de man dreta, ajache demé enscila arà i todesc forza dant al Govern de Roma
per defene l'autonomia. "Ladins Dolomites" é la nueva SVP ladina a una de colaboré con chela todescia, ma con na raprejentanza plu sterscia y plu autonoma. Ladins, i messon conté deplù, souraldut avei l coraje de nes prejenté publicamenter. Perchel duc adum: "LADINS DOLOMITES" (ui).


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 4.5
Oujes: 6


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.361 seconc