benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

LADINS DOLOMITES damana do l consens
scrit ai 29 September 2008 da les 17:25:40 da noeles

Politica

LADINS DOLOMITES, met man fora de "ciasa"

Les reunions politiches publiches à metù man a Vahrn/Persenon en juebia passeda - Te vigni paisc tles valedes una na reunion tl meis de otober

En juebia passeda à LADINS DOLOMITES metù man a Vahrn dlongia Persenon con na lignola de encontedes publiches che à metù man fora dla Ladinia y che jirà inant endoman a Bulsan, da les 20.30 tl salf Kolping, a Cluses y a Maran ti proscims dis y spo de en gre via te vigni paisc dla Val Badia y de Gherdeina con does de gran manifestazions conclusives a Badia y a Urtijei puec dis dant les lites. La cumpeida de oujes de consens che LADINS DOLOMITES pò cueie adum fora dles valedes ne é nia da sotsciazé per n suzes lital. Per arjonje n mandat de rest vàl debujegn de abiné adum almanco cheles 5.000 oujes. Vigni centené de oujes abinedes tles zités de Sudtirol, Bulsan, Persenon, Bornech y Maran, olàche al viv tradizionalmenter valch cenc de ladins, é perchel dassen emportant. Tles valedes ladines de Badia y Gherdeina él aladò dles ultimes lites entourn a 12.000 litadours.

 



Chest é l messaje de LADINS DOLOMITES ai litadours fora dles valedes ladines:
"LADINS DOLOMITES ti dà n gran peis ai Ladins “dlâfora”. Al é n grum de rejons, che n Ladin mess jì a vive fora dla Ladinia: familia, laour, poscibeltés de cariera... Ma te chel moment che al và a sté fora di comuns ladins, ne à n Ladin prest plu deguna poscibelté da vive da ladin, da adoré sie lingaz y da l dé inant. Sovenz àn l’imprescion che al vegn cialé plu di extracomunitars y de si derc che de chi di Ladins “dlâfora”. Chest volonse mudé!
Perchel se batarà LADINS DOLOMITES per arjonje chisc derc ence per i Ladins “dlâfora”:
· Al dess vegnì tegnì cont di debujegns linguistics di Ladins che frecuenteia les scoles talianes y todesces. A vigni Ladin che l vuel déssel ti vegnì dé la poscibelté da emparé l ladin a scola ence fora dla Ladinia. A tanc de mutons de Ladins “dlâfora” ti sàl pa sciode che ai ne sà nia plu ladin! A n grumon! · A Bornech, Persenon y Bulsan messéssel ence ester i numeri per mete su na sezion dla scolina y dla scola dl obligh ladina (= paritetica).
· I Talians y i Todesc dess vegnì informés miec soura i Ladins: ence chilò àn l’imprescion che al vegn fat n grum de projec per conesce la cultura y i lingac di imigrés, ma apeina n iade valch per conesce la cultura y l lingaz di Ladins. I Todesc y i Talians che se l dejidreia dess avei la poscibelté da emparé l ladin y souraldut valch soura i Ladins.
· I Ladins fora dla Ladinia ne dess nia vegnì descriminés dal proporz. I Ladins rejona sovenz todesch y talian sciche n todesch o n talian y essa perchel dutes les competenzes linguistiches per vegnì tratés a la per di Todesc y di Talians pro i concursc de posć plu auc, olache l proporz descrimineia zenza dagnora i Ladins. Al ne é nia da capì che vigni forest declaré todesch o talian pò fé pert a duc i concursc per chisc grups linguistics, ma n Ladin declaré ladin vegn taié fora. N Ladin é plu o manco sforzé da se declaré autramenter fora dla Ladinia. LADINS DOLOMITES vuel arjonje che n Ladin posse resté te dut Südtirol ladin, zenza vegnì perchel descriminé dal proporz. A Persenon p.ej. él 8,10% dla popolazion che à n cognom ladin. Ma declarés ladins é demé l 1,23 %. Nos volon che ence i autri 6,87 % posse se declaré ladins ZENZA desvantajes tl mond dla scola y dl laour. Duc veid ite che la situazion di Ladins a Persenon fossa n’autra sce l proporz ti dess 8,10 % di posć y no demé l 1,23 %.
· I Ladins che laoura fora dla Ladinia dess duc ciafé l’indenité de trilinguism.
· LADINS DOLOMITES se batarà che al vegne tles zités olache al viv trueps ladins ence adoré publicamenter l ladin, sun les iscrizions y sun les tofles publiches y te d’autri contesć olache les scrites resta plu die. Sce ala và da scrive su endlonch ence per ingleis, spo arà ben ence l ladin lerch – al vuel ester demé n puech de bona volonté. Südtirol dij y se brava de ester n paisc con trei lingac – l ladin ne dess perchel fora dla Ladinia nia vegnì asconù. Samben che an adora te chest contest na forma unificheda de ladin: LADINS DOLOMITES é perchel per i idioms de valeda a livel local, ma per l lingaz unifiché (te chel che ence chesta cherta é scrita) a livel souralocal (i ne podon nia ghiré che al vegne scrit te deplù formes de ladin, ma na scrita te un n ladin é dessegur miec che degun ladin).
· LADINS DOLOMITES se batarà acioche duc i Ladins te Südtirol vegne conscidrés al medem livel. I ne vedon nia ite ciodì che n fascian, n fodom o n ampezan che viv te Südtirol ne pò nia se declaré ladin. Con les normes atuales sun l trilinguism, che preveid y autoriseia demé l ladin de Gherdeina y de Mesaval y proibesc vigni auter idiom, é chest endere imposcibel. Chest él da mudé. Plu declarés ladins che al é, plu vantajes che i Ladins à en general. · I volessan che i Ladins che viv fora per l mond ae inant n contat con la Ladinia. Desche pice segn cialaronse che ei giate la “Usc di ladins” gratis. I cialaron ence che l’assoziazion di “Heimatferne” orsaniseie valch manifestazion aposta per i Ladins.
Ladins “dlâfora” Pensede a vostes raijes ladines. Dédeles ence inant! Nos volon ves daidé da fé chest. Perchel adoronse vost sostegn.
Litede perchel : LADINS DOLOMITES!"

 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 5
Oujes: 3


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.394 seconc