benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Lites 2008: volonté de unité di ladins
scrit ai 03 September 2008 da les 19:11:29 da noeles

Politica

Pro les lites, dijon cler: nos volon la unificazion per ester n popul

Nos son dant a n gran aveniment - Les lites: na ocajion che i ne podon nia nes enjomé via!

Al é massa chiet. Al mancia puech plu de n meis a les lites regionales dl 26 de otober. An ne conesc nia ciamò la lista de duc i candidac, ence sce al é bele vegnù comuniché da pert de LADINS Dolomites n program de diesc ponc. N vare bendebot gran él empò suzedù: la Lista Ladins é steda bona de se mete a una con autri ladins per renforzé sia posizion y garatan na lista nueva: Ladins Dolomites. L inom nuef dij cler che an va tl vers de na Ladinia unida, cis do l bel resultat dl referendum de i Souramont. La speranza é chela che al tome demez la distinzion anter ladins todesc y ladins talians y che an feje n bon iade tré dant la unité di ladins. Pro chestes lites de otober ne conta nia tant l program economich, ma dantaldut la volonté, l messaje politich.

 



Nos son dant a n grant aveniment: chel dla revendicazion dla autonomia y unité di ladins. Les condizions é dant man, l troi é enjigné, demé tl aier él ciamò puecia coscienza, puecia ambizion y puech sentiment de onour. La “outa” pò mete man, sce tres l resultat dles lites végnel dé n segnal cler, desche chel dl referendum, che i Ladins vuel ester unis aministrativamenter anter ei. Da pert di Ladins de Trent y Bulsan ne él ciamò vegnù dé degun sostegn publich ai Ladins da Souramont: deguna manifestazion interladina, degun “Di ladin” é vegnù anunzié. L sostegn é vegnù demé da pert de privac. Dai oms de politica demé jems y festidesc y enfinamai oposizion. La Generela à fat l joblere y sie vedl president, do l show, à fat enfinamai l gran “tradiment” dijan clermenter che el ne se reconesc nia tla etnia ladina ("Non parlatemi più di etnie!"). Sen él deventé n vert che dij de se bate per l ambient, ma en pratica per defene la pesc de si sciors ric che stà sun solé a se cialé ju les montes y i creps y che é desturbés da la vera di motors che passa. Al se bat per les comodités di ric contra les aoreles curtes dla jent da manco. (Recordon che pro les ultimes lites politiches nazionales fova i verc pro i “comunisti di rifondazione”, i plu ressoluc) Chestes nostes lites regionales se damana responsabelté y no matades. Ala ne se trata nia demé dl chiet di joufs, ma dla vitalité di ladins, de sie davegní, de sie teritore, de sie lingaz y souraldut de sia unité politich-amministrativa. Chi da Souramont che à desmostré de volei vegnì con nos, se aspeta n segnal sterch, dantaldut unitar che mostre su cler che nos i volon y i aspeton. L program economich, sozial y cultural pro chestes lites dess ester un soul: damanon la unité di ladins, volon ester adum. Canche i saron adum, saronse ence plu stersc y con n ghirau plu crdedibel, i podaron ghiré deplù. Anter de nos saràl plu forzes, plu idees, plu iniziatives, plu identité ladina, plu svilup y cultura ladina. Ne ston nia endò a perde na autra ocajion de esprescion de nosta volonté de reunificazion, de nes sentì a la pèr di autri grups etnics, volon ester nos enstesc. Economicamenter ne mùdel nia, ma al se muda nost podei. (ui)

 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 5
Oujes: 2


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.456 seconc