benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Les aspirazions de Zent Ladina Dolomites: unité di ladins pro Sudtirol
scrit ai 30 August 2008 da les 19:11:41 da noeles

Politica

Zent Ladina Dolomites: y Jent Ladina Dolomites encuei

Al é da se aodé che l destin dl terz tentatif, „Jent Ladina Dolomites / Ladins Dolomites“, vegne demé influenzé da la volonté di Ladins enstesc 

de Paul Videsott


L'université de Bulsan
Repartizion Ladina 
chier
1 COLABORADOUR/ESSA SCIENTIFICH/A
per n projet de corpus y de vocabolar ladin. L post é da atira per un n ann y pò vegnì arlongé. Al vegn damané na bona conescenza dl ladin y souraldut la pazienza y la volonté da laoré con material bibliografich y de archif. Al vegn pité n laour interessant te n ambient academich. Les domandes con n curriculum vitae é da dé ju per i 19 de setember 2008 a:
Prof. Paul Videsott - Repartizion Ladina - Facolté de Scienzes dla Formazion / Fakultät für
Bildungswissenschaften
Bahnhofsstraße 16
 39042 BRIXEN/Persenon
Informazions plu avisa él da ciafé pro l prof. Paul Videsott, mail:
paul.videsott@unibz.it; tel.: 0472 014801

Doi documenc d’archif nes dà informazions nueves y emportantes sun la fondazion dl moviment politich ladin „Zent Ladina Dolomites“ de jugn dl 1946 sun Jouf de Frera y sun sie raport con la SVP. Dilan al dr. Toni Sotriffer (Urtijei/Bulsan), fi de Tone Sotriffer sen. („Tone da Pedetliva“, un di fondadours de „Zent Ladina Dolomites“ dl 1946), onse ciafé tles mans doi documenc d’archif dl 1946, che descriv tl menù coche l moviment politich ladin „Zent Ladina Dolomites“ é nasciù y cal che fova sie raport con l partit de maioranza SVP. L prum document é l protocol dla senteda costitutiva de „Zent Ladina Dolomites“ ai 15 de jugn 1946 sun Jouf de Frera, l secont é na cherta dla direzion raionala dla SVP de Puster ai membri ladins dla SVP, olache al vegn descrit y valuté dal pont de veduda „sudtiroleis“ la nasciuda y l laour de „Zent Ladina Dolomites“.









LA STORIA DL REFERENDUM TE 4 PERTES    dr.prof.univ. Paul Videsott

Al dess y mess vegní fat giustizia  - Ciodì che i trei comuns ladins de Anpezo, Col Santa Lùzia y Fodom toca pro Südtirol y ciodì che al ti é ti agn 1945-48 vegnù refusé l dert de vegnì endò pro la provinzia de Bulsan. L referendum di 28 y 29 d’otober 2008 sciche ultim vare de trueps tentatifs da ruvé endò adum pro i autri Ladins. 

 

Zent Ladina Dolomites sun l jouf dl Sela - N meis do sia fondazion à “Zent Ladina Dolomites” metù a jì ai 14 de messel dl 1946 la manifestazion storica sun l Jouf de Sela, a chela che passa 3.000 Ladins à tout pert se ghiran sie reconesciment y sia reunificazion tla provinzia de Bulsan.

 

Sisto Ghedina: na plata de storia ladina - Sisto Ghedina é nasciù ai 25 de messel 1899 tla vila d’Alverà via en Anpezo y é vegnù batié l di do tla gliejia de San Iaco dal caplan Jan Mersa (da Calfosch). Al fova l terz mut de Antonio Ghedina (1863-1935) y de Rosa Manaigo de Ago (1867-1948)

 

Viva ra Zent Ladina Dolomites!Canche “Zent Ladina Dolomites” é vegnuda lasceda jì endalauter al scomenciament dl 1948, àla lascé sciche testament l’aodanza che zacai se cruze dl’unité ladina te n temp che essa abù da vegnì, plu democratich y plu davert defront ai debujegns dles mendranzes.
Chesta enciaria é vegnuda touta su y porteda inant dai promotours dl referendum di 28 y 29 d’otober 2007.
L resultat tant cler dl 78,87 % per la reunificazion con Bulsan ti é vegnù dediché ai “peresc dl referendum”, l dr. Sisto Ghedina y l rajonier Sisto de Bigontina.
„La SVP saluda de cuer l’esistenza y l laour de Zent Ladina Dolomites“
I reporton chilò la traduzion per ladin de tramidoi i documenc per si valour storich y documentar. I originai che nos on vedù (na copia de chisc documenc é ence conserveda tl archif Iori a Vich/Fascia) é scric per todesch. Chest desmostra che ciamò dl 1946 ova ence i Ladins fora de Südtirol (sceben che al fova dal 1921 inant endlonch demé plu la scola taliana) tant na bona conescenza dl todesch, che ai podova l tò sciche lingaz de comunicazion scrita anter ei. Dal moment che „Zent Ladina Dolomites“ à dé fora dut si material per ladin (cherta de partit, 11 edizions de n foliet edemanal dal medem inom y i.i.), él cler che l protocol de fondazion essa ence podù vegnì scrit per ladin. Zenz’auter l àn scrit per todesch per podei l mané inant ence ai partic y a les autorités sudtiroleises y di aliés a Bulsan.

Protocol
Ai 15 de jugn 1946 s’à abiné a les 12.00 tl refuge „Grödnerjoch“ chisc raprejentanc dla popolazion ladina de dutes les pertes dl Südtirol ladin, y plu avisa i signours (i lascion i inoms de persona sciche ai é tl document original): dr. Sixtus Ghedina, Cortina d’Anpezo; rag. Sixtus v. Bigontina, Cortina d’Anpezo; Quintino Ghedina, boteghier a Cortina d’Anpezo; Gino Majoni, Cortina d’Anpezo, Aristides Padovan, Cortina d’Anpezo (chest ultim inom mancia tl document de fondazion conservé tl archif Iori) sciche raprejentanc per dut l raion d’Anpezo con Fodom y Col Santa Lùzia, laprò i signours dr. Franz Gasser, Picolin, signour plovan Johann Comploj, Calfosch sciche raprejentanc dla popolazion de Mareo y dla Val Badia. Sciche raprejentanc dla popolazion ladina de Fascia él vegnù adalerch i signours Ghetta Mario, da Vich; Weiss Cölestin, Vich; Unterholzner Fritz, Poza; Pescol Alfred, Pera; Valentini Friedrich, Mazzin; Depaul Jakob, Ciampedel; Dantone Alfons, Cianacei (tl document de fondazion conservé tl archif Iori vègnel emplù ciamò nominé Morello Gabrielli, Pera).
I Ladins dla pert auta dla Val de Flem fova raprejentés da chisc signours: Jellici Domenico, Moena; Sommavilla Alois, Moena; Sommariva Wolfgang, Moena; Sommavilla Johann, Moena; Delfauro Peter, Pardac; Delladio Josef, Tieser; Degiampiero Redento, Ciavaleis; Paluselli Alfred, Juian.
Sciche delegazion dla popolazion de Gherdeina él vegnù nominé i signours Anton Sotriffer de Urtijei, dr. Engelbert Senoner de S. Cristina y Hans Costa de Selva. Chisc trei é ruvés adalerch n ora plu tert per mancianza de n meso de trasport che jiva plu debota.

Discuscion
President dla enduneda végnel nominé l signour dr. Sisto Ghedina, che deura la senteda a les 13.15. L president saluda de cuer duc i prejenc y ti dij dilan de ester vegnus. L dr. Ghedina spliga n curt l fin de chesta enconteda, che fossa la fondazion de na union politica de duc i Ladins. Al ti damana avisa y tl menù a duc i raprejentanc, tan’de percent dla popolazion ladina che ai rata che fossa a una con l’idea y i traverc dla union che dess vegnì metuda su, y dales respostes di prejenc vègnel fora, che te Fascia y Flem él l 80%, y te Anpezo, Fodom y Col Santa Lùzia ca. l 90-95% di Ladins che sostegn la minonga di raprejentanc chilò abinés. Te Gherdeina, tla Val Badia y te Mareo é la proporzion plu o manco sciche te Anpezo.
L dr. Ghedina referesc spo avisa sun n auter moviment de chesta sort, che é pié via da Cianacei, y spliga si traverc [al se trata dla Lega Indipendente Ladini delle Dolomiti LILD dl fascian Guido Iori Rocia]. An é dla minonga che chest moviment se à tout dant n program dret ampl, con l fin prinzipal da unifiché i Ladins a livel cultural y economich, da arjonje n valgunes aspirazions culturales y autonomes, che sarà endere irealisables tla pratica, da se damané la anescion de duc i raions ladins a la provinzia de Bulsan, da mete su n raprejentant politich pro l govern talian y dut chest tl cheder de na autonomia tridentina-taliana. Sun chesta él l signour Sisto de Bigontina che tol la parola. Al rejona sun la batalia per la liberté di ampezans („Freiheitskampf der Ampezzaner“), che vegn dal meis de mei 1945 encà comanés con metodes che é avisa cheles fascistes da na picera clique che é demé formeda da pueces persones y che laora te dutes les chestions politiches contra la volonté dla popolazion. L signour de Bigontina conta spo dles tratatives longes y fin a sen stedes debant di ampezans per la reanescion de Anpezo, Fodom y Col a la provinzia de Bulsan. Al recorda les discuscions desvalives abudes con i prefec de Bulsan y Belun, da cheles che an capesc, che i raprejentanc dl govern, sceben che la volonté dla gran maioranza dla popolazion é clera, prova con duc i mesi da la tegnì ju y da evité che la popolazion la arjonje.

La fondazion
L president passa sen a chel che é l dret program dla senteda, y valutan la situazion de duc i Ladins, sciche an à podù la audì tles relazions dret stedes, ti fej l dr. Ghedina a la enduneda sciche pruma proposta chela de mete su n moviment politich ladin unitar, per ti ester a chi movimenc y a cheles minonghes, che, da defora o da daite tres persones puech responsables, influenzeia negativamenter, contra la volonté de duta la popolazion, la vita di Ladins. L dr. Ghedina se damana la litazion. L resultat é la dezijion unanima da fondé n moviment politich che tol ite duc i Ladins.
La seconda proposta dl president é chesta: ti dé n inom a la union sen metuda su de duc i Ladins de Südtirol. Al vegn fat propostes da pert de deplù persones y dedò na longia descuscion. A la fin vègnel lité per na proposta, che vegn azeteda da duc con ezezion de una na ousc soula. La union nueva dess se clamé: Zent Ladina „Dolomites“, o per todesch: Ladinische Volksgruppe „Dolomiten“.

Lita dles enciaries
An passa spo a la lita dles enciaries dla sourastanza, che dà chest resultat:
President de duc i Ladins vegn con dutes les ousc a una lité l signour dr. Sisto Ghedina. Secreter general dla union nueva vegn l rag. Sisto de Bigontina. Sciche raprejentanc y sourastanc de Anpezo: Quintino Ghedina, si secreter: Majoni Gino.
Raprejentant dla popolazion dla Val Badia vegn lité l dr. Franz Gasser.
Sourastant per Fodom y Col Santa Lùzia vegn Costa Benedetto da Fodom, sia secretera é Palla Paula.
Per Gherdeina toma la lita sun Anton Sotriffer sciche sourastant, si vize é l dr. Engelbert Senoner, secreter: Hans Costa.
I Ladins de Fascia lita sciche si sourastant l signour Valentini Federico.
Per la Val de Flem vègnel lité sourastant l signour Jellici Domenico da Moena.
Atira do la elezion de dutes les enciaries ti végnel fat na ovazion de cuer ai signours dr. Ghedina y de Bigontina, y al ti vegn dit dilan per l laour plen de sacrifizes che ei à fat enfin a sen.

Program
Per rejons pratiches vegn la senta dla union nueva metuda a Cortina. Sciche post per fé les sentedes chìron fora Persenon.
La enduneda fej spo fora l program dl partit, che vegn metù ju te doi ponc:
1) Comunité de destin de duc i Ladins con la popolazion de duta la provinzia de Bulsan, pro chela che ai toca dal pont de veduda etnich, economich y cultural.
2) Unificazion de duc i comuns ladins y reunificazion de Anpezo, Fodom y Col Santa Lùzia a la provinzia de Bulsan, y anescion a chesta di comuns de Fascia y Flem.
Chisc ponc vegn ciamò n iade rejonés fora avisa y splighes tl menù y spo aprovés con dutes les ousc a una.
L president di Ladins apeina lité rengrazieia ciamò n iade duc per l gran interès y per avei azeté con entusiasm l program fat fora. L sourastant (dla Val Badia) dr. Franz Gasser recorda, che laouta él vegnù fat fora i colours de na bandiera aposta per la popolazion ladina, y plu avisa l brum dl ciel ladin, l blanch dla neif sun les pizes dl Sela y l vert di biei prés da mont dla Ladinia. A les 16.00 scluj l president dr. Ghedina la senteda y recorda che avisa te chel moment met man les sentedes dla Conferenza de Pesc a Paris. Gherdeina, 15 jugn 1946.

Chest é l protocol dla senteda de fondazion de „Zent Ladina Dolomites“ ai 15 de jugn 1946. An veid cler che a chel temp ne él nia ciamò Ladins de „serie A“ y „serie B“: duc fova sentés pro la medema meisa y duc fova a una con la reunificazion di Ladins. A duc i Ladins, ence a chi de Fascia, Fodom y Anpezo, ti vègnel dit „Ladins de Südtirol“. L record di avenimenc do la pruma vera dl mond (declarazion de volei l medem destin dla popolazion todescia da pert di comuns ladins a la fin d’otober dl 1918, manifestazion di Ladins ai 5 de mei 1920 sun Jouf de Frera con la creazion dla bandiera ladina y i.i.) fova ciamò dret sterch. Y la SVP fova a una con les aspirazions ladines de reunificazion y de autoraprejentanza: chest veiden avisa dai documenc SVP de chel temp.

Seconda pert: na cherta dla direzion raionala SVP de Puster sun ZLD y si membri fondadours de Gherdeina
Ai 15 de jugn 1946 él vegnù fondé sun l Jouf de Frera l moviment politich ladin „Zent Ladina Dolomites“. Chesta fondazion é vegnuda fata con l plen sostegn dla SVP, che fova enlaouta l soul partit dla mendranza sudtiroleisa reconesciù dai aliés. Deplù documenc d’archif, che i on ciafé dal dr. Toni Sotriffer (Urtijei/Bulsan), nes l desmostra.

L diare de Josef Raffeiner
L dr. Josef Raffeiner é sté l prum secreter general dla SVP. Él à scrit so diare, che é vegnù publiché dl 1998 (Josef Raffeiner, Tagebücher 1945-1948, Bulsan). Per cie che reverda „Zent Ladina Dolomites“, ciafonse ilò chestes informazions:
11 de jugn 1946, mertesc: ie (= Josef Raffeiner) son sté domesdì pro na senteda di Ladins, a chela che al à tout pert raprejentanc de Anpezo, Fodom, dla Val Badia y de Gherdeina. Al é vegnù fat fora da mete su na „Union“ dla „Zente Ladina“.
12 de jugn 1946, mercui: dantmesdì senteda di fascians te ciasa dl partit (= dla SVP). Ence ei à fat fora de fé pert dla „Union“ dla „Zente Ladina“.
17 de jugn 1946, lunesc: Al é ruvé adalerch ampezans y me à conté che ai 15 de jugn él vegnù metù su sun Frera na assoziazion politica di Ladins (Zent Ladina Dolomites). Ai me à ence dé na copia dl protocol de chesta fondazion (l document publiché tla ultima USC).
Fin politich (de chesta assoziazion politica): anescion de duc i Ladins dles „Dolomites“ (Gherdeina, Val Badia, Anpezo, Fodom y Fascia) a la provinzia de Bulsan. President é l dr. Sisto Ghedina y secreter general Sisto de Bigontina, entrami de Anpezo. Chest ultim, che i à bele emparé da conesce ai 12 de jugn, me fej na boniscima imprescion. I ti à dé ai ampezans n valgugn conseis. Ai é spo jus dal prefet Innocenti y ti à comuniché la fondazion de sia union. Domesdì éi ciamò n iade enconté i ampezans. Ai me à dit che l prefet Innocenti à fat bendebot de gragn uedli canche al à audì dla fondazion de Zent Ladina Dolomites. 12 de november 1946, mertesc: tla ciasa dl partit éi enconté Sisto de Bigontina, l secreter general de Zent Ladina, y n valgugn d’autri ampezans, a chi che i ti é fat les congratulazions per l suzès pro les lites (miné él les lites de comun te Ampez y a Col, stedes ai 10 de november 1946).
L’ultima domenia él sté lites de comun te Anpezo. Ales é judes fora con n gran suzes dla „Zent Ladina“ y ti à porté plu de doi terc dles oujes. Y chest nes à a duc fat na gran legreza. Les lites nes confermeia ence che les relazions che i on ciafé fin a sen dai comuns de Souramont soura la mentalité y les minonghes de chela popolazion é veires. Innocenti (= l prefet de Bulsan) endere, che nes à dagnora conté dant che la maioranza di abitanc de Anpezo vuel sté pro la provinzia de Belun, é vegnù informé mel da si informanc talians. L prum pont dl program de „Zent Ladina“ é pu: reunificazion de duc i Ladins tla provinzia de Bulsan, tanche: Anpezo dess vegnì endò pro Bulsan.
6 de jené 1947, lunesc: dal president de „Zent Ladina Dolomites“ a Cortina d’Anpezo, l dr. Sisto Ghedina, éi ciafé na cherta, te chela che al me dà la creta a inom de Zent Ladina y me preia de ne sté nia a dé les demiscions sciche secreter general (dla SVP). Chesta letra me à fat plajei.
Da chestes notizies veiden che a chel temp ne ova nia demé i ampezans, ma ence i fascians dret de bogn raporc con la SVP. Ei se encontova cinamai tla ciasa dl partit dla SVP per sies sentedes. La SVP fova bele vegnuda informeda dantfora dla fondazion de ZLD (desche ence dla refondazion de JLD ai 28 de auril 2008 a Corvara, PV). I raporc di fascians con la SVP é empermò vegnus plu freic do che la SVP à lascé tomé sies aspirazions de reunificazion con Südtirol dl 1970-72. L secreter dla SVP te chi agn, Josef Atz, ova dit che i fascians é talians che à dagnora lité talian. I fac desmostra endere l contrar. Anpezo y Fodom spera endere dutaorela sun l sostegn dla SVP per la mudazion di confins, desche al ti é vegnù empermetù plu iadi da Durnwalder y Zeller. Y no demé chel: bele tla pruma reunion generala dla SVP ai 9 y 10 de fauré 1947 él vegnù rejoné y empermetù da se dé da fé per la reunificazion de Anpezo y Fodom con Südtirol (cf. Friedl Volgger: SVP-40 Jahre, Bulsan 1985, pl. 22). Chesta deliberazion dla SVP messessa ciamò avei sia valuta, almanco ne éla fin a ciamò nia vegnuda trata zeruch.

Na cherta dla direzion raionala dla SVP de Puster ai grups de paisc dla SVP dla Val Badia y de Gherdeina
Dl 1946 fova la SVP a una con n model CDU-CSU per la raprejentanza ladina: la SVP essa fat da tet per la mendranza todescia y ladina defront al stat talian, ma la Ladinia essa podù avei si moviment politich independent: Zent Ladina Dolomites. La cherta che i publicon dessot l desmostra:
Ai grups de paisc dla SVP
dla Val Badia y de Gherdeina
Letra Zircolara. 19/46
Al reverda: Amiscion a „Zent Ladina Dolomites“
Nro.: 292
Ai 15 de jugn de chest ann él vegnù fondé „Zent Ladina Dolomites“, con l fin de unì duc i sudtiroleisc che se declareia de grup etnich ladin te n grup etnich (miné él: politich) aposta. Les persones a cef de chesta union raprejenteia i interesc culturai, economics y politics di Ladins de Anpezo, Fodom, dla Val Badia, Gherdeina, Fascia y dla auta Val de Flem. „Zent Ladina Dolomites“ laora per la anescion di raions ladins dles provinzies de Belun y de Trent a la provinzia de Bulsan. Emplù àla tl program la volonté de avei na comunité de destin dret strenta anter duc i Ladins y i autri sudtiroleisc. „Zent Ladina Dolomites“ é nasciuda fora dl popul ladin y ne pò perchel te degun cajo vegnì confonduda con chi movimenc che é vegnus metus su y vegn manejés da jent da defora y nia-ladina, desche per ejempl la „Union Ladins“ da Maran. „Zent Ladina Dolomites“ é dassen sudtiroleisa y sia esistenza y si laour vegn ence saludé de cuer dala SVP. Te puec dis ciafarà duc i membri dla SVP dla Val Badia y de Gherdeina la cherta de „Zent Ladina Dolomites“. La azetanza de chesta cherta vegn rateda sciche declarazion de ester member de „Zent Ladina Dolomites“. Sce an tol la cherta de „Zent Ladina Dolomites“, ne preiudicheia chest te deguna maniera l dert da ester pro la SVP y perchel resta samben duc i membri de „Zent Ladina Dolomites“ inant ence membri dla SVP. Chi che ne é nia ciamò membri dla SVP pò ence vegnì membri de „Zent Ladina Dolomites“, sce ai se lascia porté ite tles listes de „Zent Ladina Dolomites“ y dà ju ilò sia firma. La adejion a „Zent Ladina Dolomites“ vegn touta su dai esponenc locai dla SVP. Les listes de adejion pò vegnì retiredes dai sourastanc de paisc pro la direzion raionala dla SVP da Bornech.
I sotlinion ciamò n iade: vigni Ladin, che se sent ladin, dess jì per amour de sia patria y per sentiment de solidarité per si compatrioc ladins pro la union „Zent Ladina Dolomites“.
Con saluc sudtiroleisc
la direzion raionala dla SVP de Puster
Josef Graber m.p.

L model CDU-CSU tla Ladinia?
Chesta cherta dl 1946 à aldidancuei ciamò duta sia atualité. Nience chesta ne é enfin a ciamò vegnuda trata zeruch ofizialmenter da la SVP. L model de raprejentazion politica descrit chilò (l model CDU-CSU, tanco na coalizion SVP-Jent Ladina a livel nazional, ma chest ultim sciche partit autonom che candideia tla Ladinia sciche la CDU te Bayern per les lites locales) essa do nosta minonga ence aldidancuei trueps vantajes per la raprejentanza politica ladina, te y aldefora de Südtirol. Te chest spirit à i “Amisc dla Ladinia unida” refondé “Jent Ladina Dolomites” ai 28 d’auril 2008 y à damané l ombolt Pepi Dejaco sce al candidova pro les lites provinziales. Sce ala jìva dl 1946, ciodì pa nia dl 2008?
I gherdeines fondadours de „Zent Ladina Dolomites“
Anter i 25 fondadours de „Zent Ladina Dolomites“ fòvel ence trei persones de Gherdeina: Anton Sotriffer sen. de Urtijei („Tone da Pedetliva“), dr. Engelbert Senoner da S. Cristina („Engl dala Posta“) y Hans Costa de Selva („Hans dal Pech“). Chest desmostra che i gherdeines ne fova nience enlaouta, atira do la vera, „per prinzip“ contra i Ladins de Souramont, souraldut nia contra i ampezans. Duc trei i fondadours gherdeines ova enciaries de responsabelté tla SVP. De duc i 25 fondadours de „Zent Ladina Dolomites“ él demé plu l dr. Engelbert Senoner n vita. Al à aldidancuei 92 agn y viv a Urtijei (Garni Dr. Senoner). Al fova vegnù lité vize-sourastant dla sezion gherdeina de „Zent Ladina Dolomites“, y fova member dla SVP dal 1 de dezember 1945 encà.
Anton Sotriffer, l sourastant de Gherdeina de ZLD, fova dl 1946 ence sourastant dl grup de paisc dla SVP de Urtijei. Ai 28 de fauré 1948 él vegnù nominé candidat ladin per les lites dl parlament talian. Al é mort dl 1961.
L secreter de Gherdeina de ZLD, Hans Costa, fova dl 1946 sourastant dla SVP de Selva. El fova un de cheles persones de Gherdeina che é vegnudes piedes dai partisans ai 15 de mei 1945 y al é vegnù torturé dai partisans per trei dis a Corvara. Dal 1947 inant él ence sté tl consei de comun de Selva. Al é mort te na desgrazia con l auto ai 15 de jené 1969. Propi la prejenza de Hans Costa te „Zent Ladina Dolomites“ desmostra cler che i gherdeines enlaouta savova ben da desferenzié anter „partisans“ y „ampezans“.
A la fin dl 1947 à l prum moviment politich unitar de duc i Ladins messù la dé su per les prescions y la contrarité dla politica taliana. L secont moviment unitar ladin, l partit „Ladins“ che é vegnù metù su n previjion dles lites provinziales dl 1972, à messù la dé su per la contrarité di talians (DC) y di todesc (SVP). Al é da se aodé che l destin dl terz tentatif, „Jent Ladina Dolomites / Ladins Dolomites“, vegne demé influenzé da la volonté di Ladins enstesc.


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 4.2
Oujes: 5


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.409 seconc