Volksliedersammlung Gartner: 4200 cianties popolares
scrit ai 28 August 2008 da les 19:14:25 da noeles |
|
N tesaur: les cianties popolares coiudes adum da Gartner
Prejentazion en mertesc y mercui dla "Regoeta Gartner" a Trent y a Vich de 3 volums - Antonella Ruggiero ciantarà ai 14 de setember a Cianacei y ai 15 a Trent "Cianta Vilotis"
 En mertesc, ai 9 de setember, végnel prejenté la "Regoeta Gartner": n tesaur retroé de cianties populares ladines, toutes da la abineda de cianties "Volksliedsammlung Gartner (1904-2008)" con la partezipazion dla ciantarina Antonella Ruggiero: da les 11, tla sala Rosa tl palaz dla Region a Trent y l di do, en mercui, ai 10 de setember, da les 17.30, tl museo ladin de Fascia a Vich. Al se trata de na abineda de entourn a 4200 cianties popolares (tesc' y incipit), con zirca 740 trascrizions musicales, partida su te trei volums, na arpejon de valuta y de gran enteres etnomusicologich. La "Volksliedsammlung" dova deventé na opera monumentala. Ala é vegnuda scomenceda dl 1904 da Theodor Gartner (glotologh y ladinist dla Université de Dispruch) tl cheder dla enrescida metuda a jì dal Minister per la Cultura austriach te dutes les regions dl Imper Asburgich da enlaouta. L jì cialà dla Gran Vera dl 1914 amarsceia endere sia fin.
Dut l material coiù adum y cataloghé per la publicazion é ju destrabonì y degugn ne savova plu olàche al fova ruvé, enfin a ti agn Nonanta, canche an l à troé n dì feter adenfal, sciche n tesaur sepolì. Do da n secul tla desmentianza él enscì vegnù descorì y netié dal "stuep" de gra a n laour de agn porté inant dal Istitut Cultural Ladin "majon di fascegn". Al se à traté de n laour lonch de stude, de trascrizion y de arconciament. A dé ca valch sostegns finanziars él sté la Provinzia Autonoma de Trent, la Region Trentin-Südtirol, l Istitut Ladin "Micurà de Rü", y - tl laour de stampa - ence la "Societât Filologjiche Furlane", l "Museo degli Usi e Costumi della Gente Trentina" y l comprensore dla Val de Non.
Al se trata de n "tesaur de cianties" partì su te trei volums dedichés a les Dolomities, a la Val de Non y al Friul oriental, con l'edizion integrala de dut l material de archif, publiché deberieda con Grafo (Brescia). Souraprò de ester bendebot enteressant y enredoul per conesce la mujiga popolara de chisc raions, sporj chesta oura na documentazion bendebot de valuta ence dal pont de veduda linguistich, storich y cultural, ajache al vegn a lum n moment de gran emportanza per la storia dles valedes ladines, dl Trentin y dl Friul oriental: l jì endalauter dl Imper Austroungarich y messei afronté les endesfides de n mond nuef.
Antonella Ruggiero: ai 14 de setember 2008, a Cianacei y ai 15 de setember, a Trent
Te chest cheder végnel tamben tegnù 2 conzerc dal titul "Cjantâ Vilotis" con la ciantarina Antonella Ruggiero che cianta per la pruma outa per ladin. Chesta raprejentanta de nonze (renom) dla mujiga pop taliana y internazionala à tout su con enteres la proponuda dl Istitut Cultural Ladin "majon di fascegn" de interpreté n valgunes cianties ladines y vilotes furlanes toutes fora da la "Volksliedsammlung Gartner".
L projet - ideé y porté inant dal Istitut Cultural Ladin - se à tout dant de ti dé su a Antonella Ruggiero y a sie staff artistich l'interpretazion de desvalives cianties ladines ispiredes liberamenter al corpus publiché ti trei volums dla abineda Gartner, ti metan apede te chesta ocajion doestrei grups musicai dles valedes ladines, dl Trentin y dl Friul che se à arvejiné da n trat al patrimone musical tradizional: MarMar Cuisine (Val Badia), Loris Vescovo (Friul) y Destrani Taraf (Trentin).
L'idea é chela de mete apede stii, esperienzes y sensibeltés desvalives, ti dajan l muet a musizisc' dl post de laoré deberieda con na steila dl "pop".
Chest sarà n event prestijoul che arà efec positifs sibe per l "prestije" dl lingaz tles generazions plu joenes che per l renom di luesc olàche al vegnirà tegnù l conzert. La direzion artistica dl projet é tles mans de Roberto Colombo.
La "permière" sarà en domenia ai 14 de setember, a Cianacei, da les 20.30; l dì do, lunesc ai 15 de setember da les 20.30, conzerteiei a Trent tl "Teatro dell'Auditorium ".
|
