Incompatibelté de aconsiadours dl Istitut Ladin?
L'arat dl Istitut Ladin y la delibera dl assessour Mussner é sen ence gauja de na interogazion dla Lista Ladins al govern provinzial sun l'incompatibelté de valgugn aconsiadours. L Istitut ladin Micurà de Rü con senta a San Martin de Tor vegn manajé da n consei d’aministrazion de 9 membri. Sce l’ofize per la scola y l istitut pedagogich vegn aratés istituc provinziai, spo àn ben 5 sun 9 membri dl consei d’aministrazion che à n liam plu o manco diret con l govern provinzial. Co pò pa chesta composizion garantì l’autonomia y l’imparzialité de n consei dl Istitut Ladin? Sun l retrat: entratant na senteda dl Consei d'Istitut, sen contesté. Demé persones fidedes dla Svp laite?
Te sia interogazion damana perchel la Lista LADINS dandaldut sce la composizion dl consei d’aministrazion é conforma a la lege.
Inant damana i LADINS co che la provinzia fej da pratiché l control soura i organs y les deliberes dl istitut, zenza ruvé te conflic de incompatibelté. I aconsiadours con n liam diret con l govern provinzial fossa: l president Hugo Valentin (raprejentant dl govern), l assessour Mussner, sia secreteria Edith Ploner, l diretour dl IPL Theo Rifesser y l Intendent Roland Verra (sen ence president dl IPL).
Mussner y Ploner fova vegnus metus sciche raprejentanc dles unions culturales, sen cuerei enciaries tl govern provinzial per cont dla Svp. Rie da se imaginé che unions che laora per l lingaz ladin fossa stedes a una con na impostazion culturala sciche ala vegn a lum tla delibera, dantfora les Unions di Ladins dles does valedes.
